Mensiz durmuşyňda Saňa bagt arzuw edÿärin! (Oÿlanma )

Yşk bagyndan birje gül ysgan biri şeýda bilbil bolup ötermiş. Söýgi çeşmesinden ýeke damja dadan biri ömürboýy serhoş gezermiş. Aşyklar birek-birege gowuşmasa, aglaý-aglaý gözleri kör bolarmyş...Adam bir gezek ölýär diýilýär, men ýaşap ýörkäm birnäçe gezek öldüm. Elimde paralanan ýüregimiň parçalary! Bir gün Seniň gitjegiňi, terk ediljegimi bilýärdim, mähribanym, ýöne beýle çalt bolar öýtmändim. Sen «söýgi ýok, söýgä ynanamok» diýip dogry aýdýan ekeniň; çünki söýgi Sende ýok eken, söýginiň nämedigini Sen bilmeýän ekeniň, söýmegi başarmaýan ekeniň. Şol sebäpli-de Sen her kim babatda şeýle pikir edýän bolara çemeli.Sen maňa: «Men azap çekemok, sebäbi men Seni söýmändim. A Sen söýeniň üçin ejir çekýärsiň» diýýäň, söýgülim. Hawa, ýöne her näme-de bolsa, men söýenime puşman däl. Bardy-geldi bir gün bir zada ökünäýsem, ol söýgä ynanmaýan Saňa söýgimi dözenim üçin bolar. Sen şeýle-de menli durmuşy ýatdan çykaryp bilen bolsaň gerek?! Menem gidýärin indi, «ýüreksiz» ýaşamagy menem öwrenjek bolaryn. Bilýärin mähre baýym, Sen mensizem ýaşap biljek derejede güýçli, durmuşa galan ýeriňden dowam edip bilersiň nokatsyz, otursyz. Ýöne men... Men durmuşda hemişe bir zadym kem ýaly ýaşaryn. «Sensiz» ýaşamak nä derejede başartsa, şol derejede ýaşamaga dyrjaşaryn. Adam öz ýetmezi hakda has köp oýlanarmyş, başardygymdan oýlanmajak bolaryn, kim bilýär, belki-de bu soňky oýlanmam bolar?!Hä, ýadymdan çykmanka Saňa sag bolsun aýdýaryn; gysga wagtlygam bolsa, ýarymlygymy we ýalňyzlygymy unutdyranyň üçin. Az möhletligem bolsa, maňa beren bagtyň üçin men Saňa minnetdardyryn, söýgülim! Haýyşym, gidip barýarkaň yzyňa garamajak bol, birden pikiriňi üýtgetmeli bolaýma! Ynan maňa, mensiz durmuşda-da Saňa uly bagt garaşýandyr, sebäbi men Sensiz ýaşaýarkamam gije-gündiz Seniň bagtly bolmagyň üçin dileg edýärin! Barlygymda gaýgy-derde batanyňdan, ýoklugymda bagta çüm, mähribanym!Aýtmasam ynjalmaýaryn... Maňa iň azap berýän zat näme, söýgülim, bilýärmiň?! Henizem gidip-gitmäniňi bilmeýänligim. Sebäbi gitmegi ýüregiňe düweniňde bir sada dost kimin, bolmaýanda ýönekeýje bir tanyş ýaly hoşlaşmagam köp gördüň maňa! Zyýany ýok! Bagta ganat açmak wagtyň gelendir. Mensiz bolsaňam Seniň üçin her säher gün dogup, her gije aý çykar...Hoş gal, mähribanym! Mensiz durmuşyňda Saňa bagt arzuw edýärin! Seniň alnyňdan çykjak ýigidiň Saňa iň az meniň berjek bagtymça bagt bermegini dileýärin! Hoş gal, ýüregimi beren ömrüm!