Buşluk,şu gün Mübärek Beragat gijesi!

Beragat gijesi Meret aýynyň 15-i gijesidir. Beragat ýalkanmak, günä geçişlik
gijesidir. Bu gijede edilen doga-dilegleriň Allatagalanyň dergähinde kabul
bolýandygy buşlanýar. Hezreti Aly bu gije barada Pygamberimiziň şeýle
diýendigini gürrüň berýär: «Şaban (Meret) aýynyň 15-nji gijesi bolanda namaz
okaň, gündizine-de oraza tutuň. Çünki Allatagala şol gün şeýle diýer: ''Toba
eden barmy, ýalkaýyn, istigfar edeni magryfat edeýin. Menden bolelin rysk
dileýäne rysk bereýin, bela-betere uçrana afyýet bereýin» Meret aýynyň 15-i
Beragat gijesi okalýan namaza salatül-haýr (haýyr namazy) diýilýär. Beragat
gijesindäki namaz 10 ýa-da100 rekagat okalýar. Bu namazy okan kişi şol ýylyň dowamynda
dünýäden ötse, şehitlik mertebesine ýeter diýilýär.

Bu namaza şeýle niýet edilýär: «Allahym, niýet kyldym seniň razylygyň üçin
namaz okamaga, meni ilähi afuw we keremiňe ýetir, gaflatdan, dünýe we ahyret
kynçylyklaryndan halas eýle, sadyklaryň depderine ýaz, Allahu ekber»

Eger 100 rekagat okaljak bolsa, her rekagatda bir gezek Fatyha süresi we 10
gezek Kulhualla süresini okamaly. Her iki rekagatdan bir salam bermeli. Eger 10
rekagat okaljak bolsa, her rekagatda bir gezek Fatyha süresi we 100 gezek
Kulhualla süresini okamaly. Her iki rekagatdan bir salam bermeli.

Yslam alymlary kätip perişdeleriň bu gijeden indiki Beragat gijesine çenli
bir ýylyň dowamynda boljak işleriň meýilnamasyny Lewhi-Mahfuzdan göçürip
düzýärler we Gadyr gijesinde jemläp düzýärler diýen pikirde. Bu gijede
mahlukatyň bir ýylyň içindäki ryzklaryna, baý ýa-da garyp, abraýly ýa-da zelil
boljakdyklaryna, doguljaklara ýa-da öljeklere degişli maglumat Alla tarapyn
perişdelere habar berilýär.

Goý, Allatagala Beragat gijesinde toba edenleri bagyşlasyn, günälerimizi
geçsin! Bu gijede edilen ähli doga-dilegler Allatagalanyň dergähinde kabul
bolsun!

Şu ýyl
Beragat gijesi iýul aýynyň 26-syndan 27-sine geçilýän gijä gabat gelýär.