Kalby gineldyan mübärek hadyslar

turkmentalyp· 24 iýul 2010 ý. 17:38 · 630 gezek okaldy· halanan: 11teswirler.com

Pygamberimiz sallallahu aleyhi we sallam aydypdyrlar:

Siziň biriňiz jany sag, gulagy dynç bolup, ertire çyksa, şol güne ýeterlik azygy hem bolsa, göýä ýer ýüzüniň maly şonuň huzurynda jem boldy.

(Jamygy Tirmizi, 2 j. 58 sah.)

Elbetde, şu zatlar uly baýlyk bolup, halkyň aňyndaky "bagt" diýilýän zatdyr. "Bagt" diýilýän zat asla dünýäde barmy? Ýokmy? Bu sowalyň jogaby adamlaryň tebigatyna garap bolar. Dünýäde bar sagadaty görmeýänler we başgalaryň gaýgysyny edip ýanyp-köýüp ýörenler bar. Onuň tersine bolgusyz zatlary "bagt" hasap edip şatlanyp ýörenler hem bar. Bu hili adamlaryň jogaby hersiniň öz halyna görä boljagy tebigydyr. Padşahlaryň biri dünýäde "bagt" gözläp tapsa-da alyp bilmän ýören ekeni. Özüniň münejjimi: "Bagtly kişiniň köýnegini geýseň sagadata ýetersin" diýip geneş beren. Onsoň padşaga geýdirmek üçin köýnek gözläp bütin memlekete aýlanypdyrlar. Ahyry bir bagtly diýilýäni tapypdyrlar weli, onun garyplykdan ýaňa egninde köýnegi ýok eken. Şeyle-de bolsa-da bagt-sagadat diýilýän zadyň dünýäde barlygyna şübhe ýok. Ýa uly, ýa kiçi, ýa dowamly, ýa dowamsyz, garaz, dünýäde hakykatdan hem bar. Kynçylykdan soň ýeňillik, gam-gussadan soň şatlyk, hassalykdan soň saglyk-salamatlyk ýaly zatlaryň her biri hakyky bar bolan sagadatlardyr. Diýmek, baryna kanagat etmek, şükürli, sabyrly bolmak "bagt" bolup, kanagatsyzlyk we tamakinlik betbagtlykdyr. Bu hadys şerifiň aňladýany hem şoldur.

Arhiwiň ýagdaýy

● Doly tekst

● 12/12 teswir saklanypdyr

Ýazylan saýty: teswirler.com · Çeşme: Web Archive nusgasy — ertir.com, 7 maý 2012 ý. · Asyl sahypany gör ↗

Teswirler 12

turkmentalyp 24 iýul 2010 ý. 17:41 +9

Pygamber aleyhissalam aytdy:

Özüňden petwa sora (habar al)! Ýagşylyk şol bolarki kalbyň hem janyň hem onda kararlanar. Günä şoldurki ol işde ýürek karar tapmaz, wyždan azaplanar . Adamlar bir zada petwa berseler hem sen özüňden petwa sora.
(Ahmad ibni Hanbal Musnedi, 4j. 238sah.)

“Illerden sora emma öz bileniňi et” diýen bir nakyl bar. Bu hadys şerifiň manysy hem şoňa meňzeş. Bu söz elbetde hemme kişi üçin däldir. Belki göwünleri päkize, akyllary kämil, ýagşy bilen ýamany seljerip bilýän, her işiň netijesini aňlap bilýän adamlar üçindir. Şeýle-de bolsa resulullah hazratlary şu hikmetli sözi bilen işde oýlanyşykly we özbaşdak pikir ýöretmäge maslahat berýär. Haýwanlar ýaly her bir yşaratyň yzyndan çapyp ýörmekden we akyl işletmän, oýlanman, gözüňi ýumup halkyň yzyna eýermekden gaýtarýar. Akyl işletmäge, pikir ýöretmäge, seresap bolmaga ündeýär. Şonuň üçin her zat hakynda şol zatdan başy çykýan adamlardan soraşmaga, dünýä işi bolsun, ahyret işi bolsun, bilýänlere maslahat salmaga, şonlukda özi hem bilenini orta atmaga borçlydyr. Çünki her kim öz halyny özi ýagşy biler we başgalara görä çyn yhlas bilen pikirlener. Wabysa ibni magbat atly bir sahaba „ýagşylyk nämede, ýamanlyk nämede“ diýip resulullahdan soran wagtynda şu hadys bilen jogap beripdir.

turkmentalyp 24 iýul 2010 ý. 17:44 +9

Pygamberimiz sallallahu aleyhi we sallam aydypdyrlar:

Wyždanyňy biynjalyk edýän işleri taşla.

(Ahmad ibni Hanbal Musnedi, 5j. 252 sah.)

Göwnüňe doly makul bolman ikirjiňläp edilýän işler köplenç peýdasyz bolýar. Şonuň üçin resulullah göwün karar tapmaýan, iňkise goýýan işleri etmezlige emr edyär. Bu perman megerem ýagşy-ýamany seljerýän, peýda-zelele ähmiýet berýän adamlar üçin bolsa gerek. Ýogsa ýürekleri bütin garalan ybadatdan we ýagşy amaldan lezzet almaýanlaryň wyždanlarynda karar bolup-bolmazlykda hikmet ýokdur.

turkmentalyp 24 iýul 2010 ý. 17:46 +8

Pygamberimiz sallallahu aleyhi we sallam aydypdyrlar:

Ýagşy işleriň seni şatlandyrsa we bozuk işleriň gaýgylandyrsa, onda sen mumin bendesiň.

(Ahmad ibni Hanbal Musnedi, 5j. 252 sah.)

Allah tagala senden razy bolarly sogap işleriň üçin şatlansaň we hylapy şerg (şerigata ters), günä işleriň üçin hem gamlanyp puşman etmegiň elbetde muminligiň alamatydyr. Çünki imany ýok adam üçin ýagşylyk bilen ýaman işleriň arasynda kän bolmaz. Özleriniň hatalaryny ýatlap gaýgylanyp, wyzdanlary ynjalyksyz bolmagy we ýagşy işleri ýadyna düşende özüniň geljegi hakynda umudy artmagy, belki şol gelejek üçin köpräk hereket etmegi musulman adama tebigy halatdyr. Megerem eden ýagşylyklaryny ýatlap howalanyp, gabarylyp öz ýanyndan özüni Allah tagalaga ýakyn bendelerden hasap edip, sen-sen diýlenine magrurlanyp (tekepbirlenip), özüni başgalardan artyk saymak akmaklykdyr. Häsiýetiň şeyle bolsa ahwalyň çatakdyr.

turkmentalyp 24 iýul 2010 ý. 17:48 +8

Pygamberimiz sallallahu aleyhi we sallam aydypdyrlar:

Eger bir günä iş eden bolsaň, şonuň yzyndan bir sogap iş etgin, ol ýagşy iş öňki ýaman işiň günäsini öçürer, ýok eder.
(Ahmad ibni Hanbal Musnedi. 5j. 129 sah.)

Bu hadysdan maksat bir günäge mübtela bolan bende derhal toba etsin ýa-da bir dürli ýagşylyk edip şol hatasynyň apuw bolmagyny (geçilmegini) umyt etsin.

turkmentalyp 24 iýul 2010 ý. 17:49 +9

Pygamberimiz sallallahu aleyhi we sallam aydypdyrlar:

Eger malyň bolsa onuň eseri sende görünsin.

(Suneni Nisaýi. 2j. 296 sah.)

Resulullah huzuryna bir sahaba köne-küşül eşik bilen girdi. Pygamberimiz munuň baýlygy, garyplygy hakynda soraşdyrdy. Bu sahaba malynyň barlygyny aýdandan soň resulullah bu hadysy aýdypdy Pygamberimiz şol adamyň har bolup ýörüşini halamady we Allah tagalanyň beren nygmaty bendede zahyr bolmaly ekenligini aýtdy.
Emma golum giň diýip çendenaşa bahaly lybaslar bilen bezenip, howalanyp, tekepbirlenip ýörmek musulmana mynasyp iş bolmaz. Geýim geýmek isripçilik derejesinde bolmazlygy şertdir.