BIZIŇ BARYMYZ BAŞDA ÇAGADYK…

Bir mekdepleriň birinde "Gün we deňiz" atly surat sergisi gurnalypdy. Sergide 1-2-3-nji synp okuwçylaryň çeken suratlary görkezilýärdi. Mekdebiň diwar tagtalary dürli-dürli suratlardan doludy. Çekilen suratlaryň her biri çagalaryň dünýäsine açylan aýry bir penjiredi. Menem şol penjireden olaryň jöwahyr köňül dünýäsini bir salym synlamaga durdum. Suratlaryň hersinde diýen ýaly nazarym eglendi. Çagalar reňkleriň üsti bilen öz dünýälerini bize açyp görkezýärdiler. Ýöne näçämiz şol suratlaryň arkasyndakylary görmegi başarýar? Bilmedim...
 Bir surat şeýleräk. Mähnet agajyň depesinde ullakan ýürek dur. Oýlanyp görüň! Manysyz surat ýaly bolup görünýär. Belkem şu suraty çeken çagajyk: "Her bir agajyň ýüregi bar. Olary ynjytmaň. Olara zelel bermäň. Başardygyňyzdan agaç ekiň " diýjek bolandyr. Belkem has başgarak, has çuňňur hakykatlary oýarmak isländir. Ýene bir suratda bolsa, ýoldan derek agajy ýöräp gelýär. Ýoluň iki gyrasyndan bägül bilen çigildem oňa baş egip salam berýärler. Sen bu ýerde näme düşünjek? Çagalaryň eserlerine çeperçilik gözi bilen seretmän, tersine tagaşyksyz suratlaryň arasyndan many gözlemek niýeti bilen seretmeli. Başgaça aýdanyňda manysyzlykdan many gözlemeli. Ýogsam çeperçilik gözi bilen seredýän adam olaryň işine pes baha berjegi ikiuçsyzdyr. Asyl maksat şol eserleriň ruhuny görmek...
Tebigata, Äleme, barlyga, janly-jandarlara siňe sereden islendik adam, bularyň ählisiniň ajaýyp sungat eseridigine göz ýetirer. Ýöne welin tebigatdaky, Älemdäki şol sungat eserlerini döreden bir gudratyň bardygyna göz ýetirmeklik bolsa aýratyn paýhasyň önümidir. Bar zat çemeleşişiňe bagly bolup durýar. Men çagalaryň suratlaryny synlanymda, çagalaryň nä derejede hakykata ýakyn surat çekendigine üns bermedim. Sebäbi olardan beýle zada garaşmaklyk – ýalňyş netijä elter. Men şol suraty çekmek bilen çagalaryň näme diýmek isleýändiklerine, olaryň kalby bize näme diýip çawuş çakýandyklaryna düşünjek boldum. Gowyny görýän gowyny pikir eder. Gowyny pikir edýän adam, durmuşyndan lezzet alar. 
Her suratyň deňine baranymda, göýä diýersiň suratlar gürleýän ýalydy. Olaryň gepine düşünjek bolýardym. Çagalaryň suratlary kalbymda nähilidir bir geň duýguny oýarýardy. Duýgularym gursagymda lemmerlenip, meni ebedilik güzerine eltdi. Men bolsa çaga ýaly, şol güzeriň başynda kagyzdan gämi ýasap suwa göýberýärin. Özüm gidip bilmämsoň, arzuw-hyýallarymy ynjytmazlyk üçin ýasan gämimi göýberýärdim. Gämilerim gözden ýitýänçe seredip durýardym. Şol gämi meniň küýsegim, hyýalymdy. Adamyň etsem goýsamy, arzuw-hyýaly gör nähili çäksiz. Adamyň ýüregi ebedilige teşne...
Çagalaryň dünýäsi şeýleräk: Olaryň dünýäsi gül-pürçek. Mydama kebelekler uçuşyp ýör. Ýagyş ýagýar. Agaçlar ýagyşa ezilýar. Bulutlar tüýdilýär. Gögerçinler uçuşýar. Asmanda älemgoşar sallanýar. Olar älemgoşara dyrmyşýar. Maýsalaryň ýüzünde damjalar bulduraşýar. Her damjanyň ýüzünde Gün görünýär. Aryjyk güllerden bal ýygnap ýör. Çagalar hiňňilik uçýarlar. Olar mydama şadyýan. Olarda mydama ala ýaz. Olarda güýzüne ýapraklar saralsa-da, ýere gaçmaýar. Agaçlar altyn ýaprakly agaçlara öwrülýär. Olaryň dagynda hiçkimiň alyp bilmeýän güli ösýär. Olaryň kümüşsöw gijeleri hem başgaça. Asmanda ýyldyzlar sallanýar. Aý olara göz gyrpýar.... 
Biziň barymyz başda çagadyk. Ruhumyzda ýaşaýşa bolsa hyjuw joş urýardy. Göreçlerimiz öwrenmäge teşnelikden ýaňa ýalpyldaýardy. Bar zady öwrenjek bolup, ene-atamyza sorag baryny berýärdik. Sebäbi bar zady ýaňy öwrenýärdik. Soň bolsa ulalýarys we ulaldygymyz saýyn, çagalyk bizden daşlaşýar, daşlaşýar. Ýa biz ondan gaçýarys, ýa-da ol bizden. Iki dostuň aýrylyşyşy ýaly, çatrykda çagalygymyza ellimizi galgadýarys, "Hoş, sag bol" diýýäris. Aýrylyşýanymyz üçin gamlanýarys. Çagalyk gör nähili gözüňe yssy görünýär. Ol hakykatdan hem şeýle. Çagalygymyz biziň kalbymyzda aýratyn orun tapyp, hergiz bizi özüne imrindirýär. Biziň barymyz başda çagadyk..
Çagalar päkligiň nusgasy. Biziň entekler olardan öwrenjek zadymyz juda köp. Diňe bir çekýän suratlaryna däl, eýsem biz olaryň sözleýän her biz sözüne üns bermelidiris. Olaryň göreçlerine syn edip görüň. Eger synlap dursaňyz, siziň nazaryňyz olaryň çäksiz göreçlerinde ýitip gider. Edil bir damjanyň ummanda ýitip gidişi ýaly bir zat. Olaryň uç-gyraksyz hyýal dünýäleri bar. Olaryň şeýle bir parlak, ýiti zehinleri bar. Hormatly prezidentimiziň alyp barýan syýasatlarynyň netijesinde gurulýän täze mekdeplerde, çagalaryň başarnyklaryny, zehinini oýarara ähli mümkiçilikler döredilen. Çagalar üçin edilýän şeýle çäksiz aladalar, biziň ýagty ertirimiz üçin edilýän aladalardyr. Şugünki açylýan täze-täze mekdepler ýene sähelçe ýyldan özüniň miwesini berip başlar we türkmen halkynyň her bir raýaty hormatly prezidentimiziň öňdengörüjiliginiň şaýady bolar. Dogry, adam ömri çäkli bolsa-da, adamzat ýaşaýyşyny dowam etdirýär. Şol sebäpden adamzatyň aladasy üçin, seçilýän tohumlar hökman birgün daragta öwrülip miwä durýar. Bu ýerde maşgala-da, uly jogapkärçilik düşýär. Her bir ojakda dünýä inen "Gymmatlygyň" gymmatyny gaçyrmazlyk üçin, şol "Gymmatlygy" Watanyň, il-günüň bähbidine peýdalanmak üçin her bir maşgala gijesinii gündiz edip işlemelidir. Elbetde der saçman, döwek döwüp bolmaz. Çagalaryň kämil ýetişmegi üçin, olaryň päk ruhuny harsallyklardan aýap saklamak üçin elimizden gelenini gaýgyrmazlyk, biziň her birimiziň mukaddes borjydyr...