Bagtyň işigi “Bagt köşgi”

Häzirki gün paýtagtymyzyň durkuny öz üýtgeşik binagärlik görki bilen bezeýän kaşaň ymaratlaryň iň öňdäkileriniň biri hem “Bagt köşgüdir”. Ýaş çatynjalaryň ilkinji ädýän gapysy, resmi nikadan geçilýän, ähli oňat arzuwlaryň hakykata öwrülmeginiň umydy bilen girilýän mekany: “Bagt köşgi”. Türkmeniň toýlarynda arzuw edilýän iň ýörgünli dilegdir: Bagtly boluň! Maşgala ojagynyň başlangyjy – toý; ojagyň odunyň ömürlik bolmagy – bagt. Maşgala ojagynyň sarsmazlygy ähli dilegleriň esasy özenidir. Şonuň üçin hem türkmen nika gyýylýan ýere Bagt köşgi diýýär. Garaşsyzlygymyzyň şanly 20 ýyllyk ýubileý baýramçylygynda gurlup, adamlaryň hyzmatyna berlen paýtagtyň “Bagt köşgüniň” täze binasy hem milli äheňde gurlandyr. “Bagt köşgi” türkmen paýtagtynyň günorta-günbatar böleginiň binagärlik keşbine sazlaşykly goşuldy. Şol ýerde soňky ýyllarda ýaşaýyş jaýlary, Konstitusiýa binasy, Maslahat köşgi, edara ediş binalarynyň toplumy, 20 müň orunlyk “Aşgabat” stadiony, 2 müň orunlyk Aşgabat” myhmanhanasy guruldy. Umumy meýdany 38 müň inedördül metrden gowrak bolan 11 gatly bina üç basgançakly desgadan ybaratdyr, onuň her bir tarapynda sekizburuçly ýyldyzyň şekili bar. Uly sütünlerde ýerleşdirilen kub ýokarky basgançagy emele getirýär we bu ýerde döreýän ýaş maşgalalaryň agzybirligini, wepalylygyny we berkligini beýan edýän, Türkmenistanyň kartasyny şekillendirmek bilen simwoliki ýer şaryny aňladýan 32 metr diametri bolan şary özünde jemleýär. Binanyň 4 girelgesi älemiň 4 tarapyny aňladýar. Köşk gün şöhlesine göwher syçyrantgylar bilen lowurdaýan, agşamlaryna bolsa aýdyň çyralar bilen nurlandyrylýan süw çüwdürimleri bilen bezelendir. Köşgüň töweregindäki milli äheňde ýerine ýetirilen özboluşly çyralar, oturgyçlar we bezegiň beýleki parçalary binanyň daşky keşbiniň sazlaşykly üstüni ýetirýär. Köşgüň jaýlarynyň içki bezegi hem milli äheňde ýerine ýetirilipdir. Nikany dabaraly ýagdaýda hasaba almak üçin toý mekanlarynyň altysy köpugurly merkeziň düzümine girýär, şolaryň her biriniň öz ady bar, toý mekanlarynyň üçüsi baýramçylyk çärelerini geçirmek üçin niýetlenendir, olaryň ikisi 500 we biri 1000 orunlykdyr. Sag ganatyndaky 1000 orunlyk “Ak ýol” we 500 orunlyk “Älem” toý mekanlarnyň bezelişi, gurnalyşy we dabaralary geçirmek üçin şertler döredilen. Köşgüň dokuzynjy gatynda şaryň merkezi böleginde nika baglaşmak üçin “Şamçyrag” atly altyn zal ýerleşýär. Onuň diwarlary milli şaý-sepler bolan “şelpäni” ýatladýan altyn sapaklar we haly gölleriniň “altyn” şekilleri bilen bezelipdir. Uly hyr görnüşli hrustal çyra “Şamçyragyň” hakyky bezegidir. Zal lowurdap duran ýyldyzly asmanyň görnüşinde ýerine ýetirilipdir. Sazandalar üçin ýörite ýer bellenipdir. Şeýlelikde, köşkde bir wagtyň özünde ýaş çatynjalaryň ýedi jübütine nika hakyndaky şahadatnamany resmileşdirmek hem-de dabaraly ýagdaýda gowşurmak üçin şertler döredildi. Bu ýerde banket zallarynyň ýedisi, dükanlaryň otuz altysy, kafeleriň ikisi, ähli zerur toý hyzmatlary edilýän ýerler, şol sanda toý egin-eşikleriniň, gelnalyjy ulaglary bezemegiň salonlary, zergärçilik önümlerini we milli şaý-sepleri kireýine berilýän salonlar, fotosalonlar we gözellik salony, 22 sany oňaýly otaglardan ybarat bolan myhmanhana hem ýerleşýär. Üçünji we dördünji gatlarda dolandyryş jaýlary we arhiw bar. Binanyň ýerzemininde 300 awtoulag üçin niýetlenen ýapyk awtoduralga, tehniki jaýlar bar. Galyberse-de, “Bagt köşgi” binasynda “Janin” we “Gülzaman” atly şereketleriň ýöriteleşdirilen dükanlary hem bardyr. Olarda toý lybaslary we toý dabaralaryny geçirmek üçin niýetlenilen dürli zatlar görkezilýär. Häzirki günde ýaş çatynjalar resmi nikadan geçmek dabarysyny bagt toýlarynyň dowamynda amala aşyrýarlar. Şeýle hem gelnalyjynyň dowamynda “Bagt köşgüne” baryp, nikadan geçýänleriň sany hem ep-esli artdy. Binany fon görnüşinde goýup, onuň öňünde surata düşmek däbi ýaşlaryň arasynda giňden ýaýrandyr. “Bagt köşgüniň” içiniň gaty owadanlygy, onuň islendik künjünde surata düşmekligiňe aňsatlyk döredýär. Ilkinji nobatda hem Hormatly Prezidentimiziň portretiniň öňünde ýadygärlik surata düşmekden başlanýar. “Bagt köşgünde” ýörite üç aýlyk okuw hem geçirilýär. Ýurdumyzy her künjeginden gelip, bezegçilik we guramaçylyk ugry boýunça kurs alyp bilýärler. Kurslaryň nyrhy 3 aýlyk nyrhy 600 manatdyr. Onda 3 ugur boýunça okadylýar: toý dabaralaryny gurnamak we alyp barmak, wideo-foto opperatorlaryny taýynlamak we bezeg işlerini gurnamakdyr. Berýän sertifikatlary bilen welaýat merkezlerindäki salynjak “Bagt köşklerinde” işlemäge mümkinçilik bolýar. Häzirki gün “Bagt köşgi” binalarynyň gurluşygy ähli welaýat merkezlerinde amala aşyrylýar. Şeýle-de, okuwyň dowamynda öwrenen maglumatlaryňy öz başyňa hem ulanmak mümkinçiligi döreýär. Sebäbi bu günler bezeg işleri bilen meşgullanýan dürli şereketleriň sany artyp ugrady.
Ýaş çatynjalara toýdan soňky durmuşynda-da egsilmez bagt, bagtly maşgala bolmaklaryny Beýik Biribardan dileýärin.