Gyrgyzystanda türkmen studentleriniň ýagdaýy

Gyrgyzystanyň Bilim ministrliginiň maglumatyna görä, häzir Gyrgyzystanyň ýokary okuw jaýlarynda 2000-den gowrak türkmenistanly studentler okaýar.
Gyrgyzystanyň Bilim ministriniň ýokary bilim boýunça birinji orunbasary Boris Kubaýewiň aýtmagyna görä, ýurtdaky kollejlerde, tehnikumlarda, ýokary okuw jaýlarynda okaýan türkmen studentlerine hiç hili demonstrasiýalara, mitinglere gatnaşmaly däl we öýden çykman oturmaly diýlen duýduryş berlipdir.
"Wakanyň başlanan güni we ertesi studentlere öý işlerini berip, öýden çykman oturmaklaryny tabşyrdyk we olary sapaklardan boşatdyk. Şu mahala çenli bize Gyrgyzystanda okaýan 2000-den gowrak türkmenistanly studentleriň mitinglere gatnaşandyklary ýa-da olara fiziki taýdan şikes ýetendigi barada maglumat gowuşmady" diýip Kubaýew aýtdy. Kubaýew Gyrgyzystanyň Türkmenistandaky ilçisiniň-de Bilim ministrligine jaň edip, türkmen studentleriniň ýagdaýy bilen gyzyklanandygyny, türkmen studentleriniň howpsuzlygyny goramak üçin Ministrligiň goşmaça çäreleri görýändigini sözüniň üstüne goşdy.
Bişkekdäki Amerikan uniwersitetinde okaýan türkmenistanly studentler hem özleriniň dynç we parahatdyklary habar berilýär.
Bişkekdäki Amerikan uniwersitetiniň jemgyýetçilik bilen gatnaşyklar bolüminiň başlygy Kimel Tohtamyşew Bişkekde mitingleriň başlanmagy bilen uniwersitetiň ýapylandygyny aýtdy: "Studentler 12-nji aprelde okuwlaryny dowam etdirip başlarlar. Biz olara öýden çykman oturmagy berk tabşyrdyk. Şonuň üçinem biziň studentlerimiziň demonstrasiýalara gatnaşandygy barada hiç hili maglumat berilmedi. Bişkekde ýagdaý gowulaşýar. Bazarlar işläp, dükanlar

açylyp başlady."