Mubarek Hadys - Sadaka sogaby barada

Ahyrzaman pygamberi Muhammed sallallahu aleyhi we sellem aydypdyrlar:
 
Hiç musulman ýokdurki agaç oturdyp ösdürer ýa ekin eker, şolaryň hasylyndan guşlar, adamlar ýa haýwanlar iýer. Şeýle bolsa bu iş sebäpli şol musulmanyň nama agmalyna (amal kitabyna) sadaka sogaby ýazylar.
 
Adam balalaryndan başlap garynjalara çenli bolan jan biten jandar ýa dogrudan-dogry ýada sebäp bilen daýhanlar tarapyndan öndürilýän hasyl bilen ýaşaýarlar. Şonuň üçin daýhanlaryň hyzmaty ýer ýüzüniň ýaşaýşyna sebäpdir. Allah tagala bu dünýäde her bir zady özüne mynasyp sebäbe baglanlygy we sebäp ýerine ýetirilmän sebäpleýin zat bolup bilmejegi mälim. Ýaşaýyş üçin gerek bolan baýlyk we diriligiň sebäpleri: daýhançylyk, maldarçylyk, senagat we söwdadan ybarat. Şu zatlar sebäbinden ynsanlar özleriniň bedenlerine hereket, göwünlerine şatlyk bererler hem-de tamakinlik harlygyndan gutularlar. Eger adam ogullarynyň ryzklary we başga dünýewi hajatlary hiç bir muşakgatsyz we hereketsiz gelip dursa mundane peýda çykmaz, belki azarlar, zulum we pisatlar artar. Şol hünärleriň birden-birine ähmiýet bermedik adamlar aç galmaga ýada batyl we ýaramaz kärlere baş goşmaga mejbur bolarlar. Şeýle bozuk kärleriň birinjisi we haramlygy Kuran aýaty bilen sabyt bolany “humar”dyr. “Humar” diýip ortada pul goýup oýnalýan oýunlaryň hemmesine aýdylýar. Bir zadyň barabaryna bolmanlygy üçin utup almak halkyň malyny batyl ýol bilen iýmek hasap bolar. Şonuň üçin bu diňe şerigat nazarynda däl, belki akyl jihätinden hem örän gabahat kärdir. Mahlasy: “Ýagşylyk et! Derýa düýbüne at! Balyk bilmese Halyk (Allah) biler” diýilişi ýaly ýere tohum saç, agaç ek, miwe ýetişdir! Özüňden başga jandarlar hem peýdalanarlar. Bu bolsa seniň üçin sadakadyr. Resulullah hazratlarynyň ummatlary üçin beren gymmatly öwütleri şudur. Munuň bilen amal eden adam elbetde bereket tapar, inşä Allahu.