Azgynlyk (Hekaýa), Malaý ýazyjysy S. K. Pottekkat

Şol gün irden içine tüwi atylan çorbany iýip, egnine paltasyny atyp, Andi
tä garaňky gatlyşýança,iş gözleginde
ýola düşdi. Ýöne odun çapýançynyň kömegine hiç kim mätäç däl bolara çemeli.
«Odun çapýan, agaç owradýan» diýip baran ýerleriniň ählisinden şol bir jogaby
eşitdi:''Gerek däl, gidiber''

Agşam düşmeziniň öň ýanam ýagyş ýagdy. Andi ýol ugrundaky öýleriň biriniň
bassyrmasynyň aşagynda garaşmaly boldy. Daşyň üstünde garaşyp, ýagşyň ýagşyny
synlap oturşyna-da pikire çümdi.

Onuň iýmäge nämedir bir zat satyn almaga puly ýokdy. Öýe bolsa, iň bolmanda
tüwi eltmelidi, ýogsa öýdäkiler aç galjakdy.Irden ýola düşende onuň bir ýarym
ýaşly ogly gyzdyryp ýatyrdy.Oňa iň bolmanda ot-çöpden taýýarlanan arzan derman
almalydy welin, derman almalydy. Ýöne puly nireden aljak?

Andi tüwi satyn alar ýaly puly nireden tapjagyny bilmän, ahyry keýpsiz
halda öýüne rowana boldy.Daş-töwerekde adam saýgartmaýan tümlükde ol öýüniň
gapysyna ýetdi. Birdenem ol öýden hümür-sümür sesleriň gelýänini saýgardy.

Eýwan garaňky. Andi ogrynlyk bilen öýe girdi. Otaga göz aýlady—ol ýer hem
garaňky. Ine birdenem ol pyşyrdy eşitdi:

—Çaltrajyk gitseňizläň. Ine hä diýmän, çagamyň kakasy geler...

—Goýsana, Andi üstümize duýdansyzlykda gelmez. Biz onuň gelenini daşaryň
ýagtysyna bileris...Oňa çenli bolsa...

—Goýsana, eý Hudaý, siz näme edýäňiz. Gerek däl, pikirem etmäň...

—Oň ýaly bolsa men gideýin. Eger saňa bir zat gerek bolsa, maňa habar et,
eşitdiňmi?

—Maňa hiç zadam gerek däl. Çaltrak gitseňiz bolýar.

—Seretseňizläň, indi ol meni kowýar. Gündiz bolsa näz eden boldy. Şeýtmedik
bolsaň men bärde bolarmydym diýsene.

Andi posa seslerini eşitdi.

—Baryň, gidiň, barsaňyzlaň! Çaga aglaýar ahyry.

Otagda kerosin çyrasyny ýakdylar. Onuň ýagtysyna Andi öz aýaly Ammunyň we
aklawçy Sukumaranyň keşbini saýgardy.

Bar gören-eşiden zatlary ony ýyldyrym uran ýaly etdi. Muňa nädip ynanjak?
Ol garaňkylykda duran ýerinde doňup galdy.

Aklawçy Sukumaran ýer eýesidi, örän baý
adamdy. Andiniň öýüniň duran ýeri hem onuň garamagyna degişlidi. Andiniň
Sukumarana elli rupiýa bergisi bardy—jaý salanda we başga çykdajylary üçin karz
alypdy. Mundan başga-da Sukumaranyň elinde Andiniň gol çekip beren 25 rupiýalyk
bergi haty bardy. Şonuň üçinem Andi oň bilen baş goşmak islemedi. Ol munuň soňunyň
nämä baryp direjekdigini bilýärdi.

Sukumaranyň gitmekçi bolýandygyny görüp, Andi ses çykarmajak bolup,
seresaplyk bilen öýüň burçuna bardy we şol ýerde bukuldy.

Elektrik fonarynyň ýagtysyna Sukumaran basgançaklardan düşüp çykyp
gitdi.Andi garaňkylyga duwlanyp, egnini diwara söýäp kän oturdy.

Ýarym sagat geçdi. Andi ýerinden galyp, eýwana bardy we hemişekisi ýaly
gapyny kakyp gygyrdy:

—Aç gapyny!

Ammu gapyny açdy we oňa ýagtylyk bermek üçin eli çyraly çykdy. Oňa üns
bilen seretdi-de:

—Hiç zadam getirmediňmi?—diýip sorady.

Andi özüniň hemme zatdan habarlydygyny bildirmejek boldy:

—Hiç zadam getirmedim, asla hiç zat!

—Menem hiç zat bişirmedim. Öýde ýekeje däne-de tüwi ýok. Çaga-da huşsuz
ýatyr, gyzdyryp.

—Näme etsekkäk? Menem gazanç edip bilmedim-dä.

Olar eýwanda biri-biriniň ýüzüne seredip esli durdular. Soň Ammu otaga
girip gitdi we Andä kümüşden rupiýany uzadyp:

—Baryň, tüwi, gök önüm we çaga üçinem derman alyň—diýdi.

Andiniň ýüzi çytyldy.Ol ilki pula, soň Ammuň ýüzüne seretdi. Ammuň gözüniň
içine seredip:

—Bu rupiýa saňa nireden düşdi?—diýip sorady.

Ammu aljyrady. Soň özüni ele aldy:

—Kalýaniniň dynç güni gurnan lotoreý oýnunda utdum.Ilkinji utuş maňa nesip
etdi.

—Kalýani ony saňa haçan berdi?

—Şu gün irden.

—Näme? Şu gün irden? Ýalançy! Men onuň düýn agşam Tirura gidenini öz gözlem
bilen gördüm. Men hemmesini bilýän. Bu rupiýany saňa Sukumaran bermedimi näme?
Eýsem, bir sagat mundan öň sen oň bilen bärde...

Ammunyň ýüzi ak tam boldy. Ol yranyp gitdi we göwresini ýere goýberdi. Şol
wagtam oňa Andiniň güýçli urgusy degdi. Ammu bosagaň öňüne süýnüp gitdi. Andi
eline ilen agaç bölegi bilen ony rehimsiz ýençdi.

—Eý Hudaý! Meni urmaň!—diýip Ammu gygyrdy—Dogrudanam, bu puly maňa jenap
aklawçy berdi.

—Nämäňe sen ony öýe goýberdiň we beren
puluny aldyň?

—Men mundan artyk açlyga çydap bilmedim... Çaga-da ýarawsyz... Tüwi satyn
alyp oňa çorba bişirip bermek gerekdi... Haçanda jenap aklawçy öýlän ýerlere
seretmäge gelende men ondan ýarym rupiýa soradym.

—A soň?

—Ol iki rupiýa berdi-de «Agşam geleýinmi?» diýip sorady. Menem hiç zat
jogap bermedim.

—Hiç zat jogap bermedim diýsene?!

Andi gaharyna bäs gelip bilmän, aýalyny ýenjip bilşiçe ýençdi. A ol bolsa
diňe agyra döz gelip bilmän gygyrdy.

Haçanda ol gygyrmasyny kesende, Andi elindäki agajy bir ýana taşlady we ol
ýerden ýok bolup gitdi.

Sukumarandan aryny almak üçin, ol bar bolan zatlary onuň aýaly
Minakşikkuttä aýtmagy niýet etdi.

Adwokat Sukumaran üç gatly jaýda ýaşaýardy. Andi göni aşhana tarap ýöneldi.
Sebäbi ol aşpez Gowindannaýar bilen gürleşip, 
Sukumaranyň aýalyny çagyryp bermegi haýyş etmekçi boldy. Emma aşhana
gulply bolup çykdy we golaý-goltumda Gowindannaýar görnenokdy.

Öýde adam bara meňzänokdy.

Andi öýüň arka tarapyna aýlandy we öýüň sag ganatynyň ýanyna bardy. Çüňkden
ikinji otagdan sesler gelýärdi.

Andi penjiräniň golaýyna bardy we tutynyň arasyndaky yşdan içerik seretdi.

Otaga stol çyrasy öçügsi yşyk berýärdi. Krowatda, ak prostynyň üstünde
ýarym-ýalaňaç Minakşikkutti ýatyrdy. Ýanynda Gowindannaýar otyrdy.

Ýylgyryp ýatyşynaMinakşikkutti
Gowindannaýaryň boýnuny mylaýym sypalady:

—Hojaýynyň seniň iş hakyňy azaltjak bolýar, ýöne şoň üçin gitjek
bolaýmagyn, eşitdiňmi,Gowindan? Saňa näme gerek? Köýnekmi, pulmy? Bularyň
hemmesini sen menden alarsyň. Ýöne diňe gitme.

Ol birden Gowindany gujaklady. Çyra söndi...

Andi yzyna öwrüldi we öýüne gaýtdy. Ol bolan zatlary akylyna sygdyryp
bilmän, haýran galypdy.

Öz aýaly açlykdan ölmezlik üçin nädogry iş etdi. Bu düşnükli. Ýöne ol näçe
pikir etse-de, 35 ýaşly Minakşikkuttiniň 17 ýaşly aşpez ýigit bilen beýle işe
baş goşmasyna teý düşünip bilenokdy.

—Her niçik-de bolsa, meniň Ammum şu baýyň heleýinden-ä ýagşy eken— diýen
netijä geldi.

Andi öýe girende, Ammu şol öňki ýatan ýerinde huşsuz ýatyrdy.Ol kerosin
çyranyalyp, otagy agtaryp çykdy.
Rupiýa çüňkde ýatyrdy. Puly alyp, aýalyna ýüzlendi:

—Eşidýäňmi, Ammu. Maňa sebedi we çüýşäni ber. Men bazara tüwi hemem gerekli
önümleri almaga gideýin.

Ammuwa täzeden jan giren
ýaly boldy. Ol zordan ýerinden galdy we adamsyna sebedi hemem çüýşäni alyp
berdi. Adamsyny bazara ugratmak üçin daşaryk çykdy.