Geliň, goşgy okalyň 14

           *     *     *
Göýä Aýsyz gije azaşan ogry
Terk eden ýyllarma dolandym yza.
Garaşanym dogry, garanym dogry
Öýkesi näzinden agdygrak gyza.
 
Gujagma buz bolup gireniň üçin
Ojagňa ot bolup, göz ýumup girdim.
Göz ýetirmek aňsat, ylalaşmak kyn,
Men bolsa, gussadan bireýýäm irdim.
 
Ýyllar möhrün maňlaýyma ýelmedi,
Kör düýämi başga köprä ideýin.
Gyz günüňde, kyn günümde gelmediň,
Gül günümde, dul günüňde nädeýin?!
 
Iki körüň ýoly düşmezmiş sowa,
Süýtde agzy bişen üflärmiş suwa.
 
            *     *     *
Adamlara, aýdymlara ynanyp,
Ýüregmi aýamda göterip gezdim.
Ýagşylyga maýsa kimin yranyp,
Ýamanlyga welin, gaýa deý dözdüm.
 
Gara çynym bilen uýdum päklige,
Sadalyga uýdum, güp gitdim gepe.
Ýaşadym gol bermän ýeke-täklige,
Ýaşasyn gözellik! Gitdikmi, şepe?
 
Dost öňüne atdym ünjä gidende,
Kä gyz ýaýdananda öňüne atdym.
Nämüçindir her sapar jigg edende,
Taňrym, bu nämekä? Pikire batdym.
 
Ýazyk, günä öz-özünden ötülýär,
Erkgala deý boşap galan gursakda.
Men ýüregmi güjeňlänme ökünýän,
Has pugtarak gizlemeli pursatda.
 
Men ony taplamak isledim diňe,
Gorap dilden-gözden üstün ýapmadym.
Ýöne ahyr bir gün bakamda siňe
Ýekejede abat ýerin tapmadym.
 
Gyýym-gyýym gyýylypdyr jigerim,
Dilim-dilim dilinipdir jigerim,
Bu görünýän gara-gara tegmiller
Azaşan, aldanan, ýalňyşan ýerim.
 
Öz çägiňden çykmak şeýle bir aňsat,
Yzyňa dolanmak çaklaşyňdan kyn.
Mundan çepe gitseň, keramat aňtap,
Gaýdyp geleriňden gelmeziň ýakyn.
 
Käte ýat illere nesibäm çekdi,
Käte saklatmady gözümiň ýaşy.
Çykaranym bir näzijek ýürekdi,
A yzyna saldym bir tokga daşy.