Şerigatyň ýoly gitdigiçe inçelýär

Kuranyň Maide süresiniň 3-nji aýatynda şeýle buýrulýar:
"Maslyk /läş/, gan, doňuz eti, Allahda başganyň adyna kesilen, boglup, urlup öldürilen, ýokardan togalanyp ölen, süsülip ölen, ýyrtyjylaryň iýen haýwanlary ölmezden öň damagy çalnanlaryň daşyndakylar, dikilen daşlar /butlar/ üçin kesilen haýwanlar we pal oklary bilen bagt gözlemegiňiz size haram kylnandyr".
Bilşimiz ýaly, eti iýilýän haýwan soýulan, kesilen wagty Allahyň ady göz öňünde tutulyp, "Bismillah Allahü Ekber" diýilýär. Bu Ýaradanda rugsat almaklygy aňladýar. Rugsat edilmezden haýwan kesilmez. Elbetde, bir alada bilen ýatdan çykyp, Allahyň ady ýatlanmazdan haýwan kesilse, zeleli ýokdur. Ýöne gep munda däl. Men başga bir wawwaly zat barada sorajak bolýan. Ýagny, ýat ýurtlara, uzak ülkelere gidip, okaýarys, işleýäris, gezelenç edýäris. Şol ýerlerde ýerli naharlary hem iýmeli bolýarys. Ol tagamlary kim nähili taýýarlady? Mal kesilende şerigatyň düzgünleri berjaý edildimi? Bu zatlary anyk bilip bolanok. Şoň üçin Yslama uýýan ynsan, umuman musulmanlar näme etmeli? Bilmeýänler bardyr, geliň, pikir alyşalyň!