Ogluna gargan ene
arhiwimdäki betinden we gytyndan ýazgylary paýlaşmagymy dowam edýärin...
---
Ogluna gargan ene
Bu hakykat bolmasady... Ähli kişi, tutuş millet ýalan-ýalan diýip gygyrsady...
Onuň ady Enedi. Näme üçin Allah oňa beýle ady beripdir bilemok. Adamsy ýogalyp bir ogul bir gyz bilen ýalňyz galjakdygy üçinmi? Ýa-da dünýede iň ajy ykbalyň ýene enäniň paýyna düşýäni üçinmi? Ýa-da ýöne dünýä inmezinden sähelçe gün öň ýanynda ýogalan enesiniň ady dakylany üçinmi? Bilmedim. Bilmeýänime-de şükür, bilsedim - ýüregim götermezdi, aklyma sygmazdy...
Onuň ady Enedi. Ýeke gyzyny çykaransoň,oguljygyny on sekiz ýaşap-ýaşamanka öýeren enedi. Niçe ýyl ýalňyzlyga döz gelip, indem üç sany agtyjagyň arlygyny ýuwan enedi.
Soňam ogluna gargan ene boldy. Onda-da ne gargyş - azary etinden geçip süňküne ornan enäniň gargyşy: “Sen ölsediň. Yzyňda gelniň başga birine äre gitsedi. Menem gelniň äre giden öýüne agtyjaklarymy görmäge barsadym” diýdi. Enäniň dilegi kabul boldy. Ertesi ogly özüni asdy. Bu hakykat bolmasady... Ähli kişi, tutuş millet ýalan-ýalan diýip gygyrsady... Ene onuň tabydynyň başynda perýat etdi. Il-gün welin, oba ulukjyn beren gerreçiniň ölenine kän bir gynanyp durmasa-da ony adam ýaly jaýlady. Ejesiniň gargyşyna namys eden ogul - ”Wah, ýeke balam, ýalňyz balam, kysmaty gara balam, men guraýyn” diýen nalyşyna dözüp tabytda ýatan ogul - men diýen ýaşynda bir tümmek guma öwrüldi galyberdi...
Bu hakykat bolmasady... Ähli kişi, tutuş millet ýalan-ýalan diýip gygyrsady...
Men muny ýazmazdym. Häzirem ýazamok. Ýalyny nädip kagyza dolajak. Bu kagyza ýazylan ýazgy bolsady, şol zäheri satyp baý bolýanlar muny äkidip syrtlaryny süpürerdiler. Emma ýalyn beýle işe ýaramaýar. Hawa, gelinem äre gitdi. Ene-de agtyjaklaryny görmäge äre giden gelniň öýüne, gurbady giden ädimleri bilen barýar. Ol köneje pürenjekli bir gysym bolup barşyna galoşynyň köçeleriň ürpek gumuna batýanynam, gözünden syrygýan ýaşam duýanok. Ölidiginem duýanok,diridiginem...
Bu hakykat bolmasady... Ähli kişi, tutuş millet ýalan-ýalan diýip gygyrsady...
Men aglamok. Gözümden ýaş damýan bolsa, ýaşymy ýandak bilen sylaryn. Goý, ýandak ýüzümi ýyrtsyn, gözüme çümüp kör etsin. Gözüm görmez, janym ýanmaz. Ýöne men aglap bilemok. Gözümden ýekeje damja-da ýaş damanok...
Bu hakykat bolmasady... Ähli kişi, tutuş millet ýalan-ýalan diýip gygyrsady...
Arhiwiň ýagdaýy
● Doly tekst
● 12/12 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 26 maý 2012 ý. · Asyl sahypany gör ↗
Teswirler 12
Durmuş-da bu. Käte şeýle zatlaram bolaýýar.Alla gorasyn şeýle belalardan.
Hey Allajaney.Neşe diyilyan zatdan özün goraweri!!!
Okap durkam gözlerim çygjaryp gitdi...
Hudaýa şükür şu wagt neşe belasy azaldy.
In guychli goz chaga enesinki degyar diyilyar. Gargysham sheyledir...Allajan, ozun goraweri, biabraylyk kochesinden yoretmaweri!
Ene-atanyn gargyshyny almak tuys bolmadym diydigi shol adamyn. Ene ansat cagasyna bed dua etmez, halys degnasyna degmesen. Hekayada ene gorgilinin hem sonynda dishi yylgyrmandyr. Gargyshyn bir ujy hokman ony edene-de degyani dogry. Alla gowysyny etsin diyip dine sabyr etmeli basharsan.
Yalnysh bilmesem gara pishik shu hekayaynyn kinosyny cykardylar, turkmen aktyerlary,
ogly narkaman bolanyndan son ejesi halys cydanok, shondan gargysh edip bashlayar,
Men yone sorajak bolyan zadym bar, ejan gargyshy tutyarmy, hany bir yerde eshidipdim, ejan gargyshy
bolmaz, sebabi ol cyn yurekden gargysh etmeyar hicem diyip,
şuny ýazanyň aýtmagyna görä bu hakyky bolan waka. +azajyk edebiýat.
aşgabat, hitrowka.
gargyşlaram materiallaşýandyr-da.
ony görmesegem, ol bar.
gargamajak bolalyň.
Keýpim gowudy welin, bu hekaýany okap pikire batdym. :-(. Gaty gowy ýazylan. Bular ýaly hekaýalary hökman gazete bermeli. 🙂.
Pygamberimiz dowrunde bir yaş oglan öljek bolup yatyr. emma ol kelimesini öwrüp bilman kösenip yatyr eken. Bolmasa yaşayşy öran gowy we durmuşyny in gowy derejede yaşayanlardan biridi.
Emma bir sebpden bolsa gerek, in kritik yagdayda kelimesini öwrüp bilman yatyrdy.
Pygamberimizi çagyryarlar we Pygamberimiz ene atasyny tapyp getirin diyya.
Ol oglanyn enesi narazy eken çagasyndan. Pygamberimiz enesinden razy bolmaklygyny soraya emme enesi hakkyny halal edenok. Pygamberimiz onda oglyn dowzahyn oduna gider diyya we ol yerden uzaklaşjak bolya.
Ene yüregi, derrew hakkyny halal edya. Ondan son bolsa ol oglan kelimesini öwrüp ömrünü tamamlaya.
Allanyn yzyna öwürmejek dogalardan biri de ene atanyn dogasy.
Olara naçe köp yagşylyk edilse de, olaryn hakyny ödap bolmaya.
Menä shu wagta çenli kinosynam,gazetdada okamok.Diñe shu wagt shu ýerde okadym.