Geliň, goşgy okalyň 7

                *     *     *
Sen örän owadan, juda owadan,
Çirk tapylmaz didaryňdan, didäňden.
Maňa diňe seni görmek ýeterlik
Müň gözeli synlap, söýüp, seredip,
Olaň kaddy-kamatyndan, keşbinden,
Bakyşyndan, ýylgyrşyndan, gülşünden,
Summatyndan, suratyndan, bolşundan,
Öz gözleýän gözelligmi idänden.
Sen örän owadan, juda owadan,
Hatda saňa seretmäge çekinýän,
Utanýan dünýäniň bigörklüginden,
Seň şekiliň ýöne-möne şekil däl,
Bu gözellik çözüp bolmaýan matal,
Ony çözen azaşar öz aklyndan,
Sen adamyň ilki laýdan ýasalyp,
Megerem, soň jan berilen aslyndan.
Kemsiz gözel bolmaz diýleni dogry,
Ýöne ýeke gözel bar bolsa kemsiz,
Bir nusga bar bolsa Allatarapyn,
Şol gözeliň ýalňyz nusgasy sensiň.
Saňa ynsam, jynsam, bu tebigatam,
Ýigitlerem, gyz-gelinlerem maýyl.
Sen dünýä inipsiň bütin ömründe
Ýalňyz gezek joşan wagty Hudaýyň.
Derýadym - agdym men öz kenarymdan,
Deňizdim men - görüp, yza çekildim,
Howalasy belent, howasy belent,
Dagdym - synyp, aýagyňa ýykyldym.
Şahyrdym, waspyňa söz tapmadym men,
Bagşydym, ses-sedam galmady meniň,
Aşykdym, yşkymy giderdim elden,
Dindardym, din-hudam galmady meniň.
Men seni özüme rowa görmän
Taý gözledim seniň görküňe laýyk.
Seň husnuňy görüp, diýdi: - El-aman! -
Bar halaýyk, peri-peýker, melaýyk.
Hiç kimse bu bagta eýe çykmady,
Gorkdy, ürkdi, bimynasyp bolmakdan,
Ýok, ýok, nämynasyp bolmakdan däl-de,
Gorkdy dünýä gözelligi bozmakdan.
Onsoň seni ýalňyz goýmajak bolup,
Täk özümiň het edenmi bagyşla!
Saňa taý gözledim ýeriň ýüzünden,
Saňa taý tapmadym özümden başga!
 
             *     *     *
Bu gelen bagtymmy, ýa-da baharmy?
Dolanmakmy geçip giden ýazlarma?
Ala gözlim, bakyp beýle gaharly,
Ýatlamalar üçin meni ýazgarma.
 
Geçen hoş gün gaýtalanyp köňülde,
Alsa meni seniň söýgiň elinden,
Gyýylma, biz bagty görmän geçsegem,
Geçmeris oň hesretiniň deňinden.
 
Bahar gaýtalanar, bagt gaýtalanmaz,
Gaýtalansa, diňe düýşde görner ol.
Sebäp bagtam edil şowakör ýaly,
Öz gözleýän adamsyny görmez ol.
 
Özümi undamda ýatlama berlip,
Senem unudýaryn, meni bagyşla!
Bu dünýäde meniň bagtym barmy nä,
Ýatlamadan başga hem senden başga?!
 
Goşgularyň awtory şahyr Atamyrat Atabaýew.