Bir samsyk sorag bar

Çagalygymdan bäri birki sany samsyk sorag hiç kellämden çykanok. Bir gezek takwa ýaşulularyň birinden sorap gördüm welin, "Nämetjek bu zatlary bilip? Ony bilinçäň Kurandan bir aýat öwren!" diýip jogap berdi. Şondan bäri hiç kimden soramok. Bir zat diýäýermikäler öýdüp gorkýan. Şeýlelikde sorag şeýle:
Atamyz Adam Aleýhissalam ýaradylanda ýaňy dünýä inen kiçijik bäbegiň şekilinde, keşbinde, sypatynda däl-de, kämillik ýaşyndaky ynsan görnüşinde ýaradylypdyr. Ol näçe ýaşly ynsanyň keşbinde ýaradylypdyr? Bu bir. Ikinji sorag, eger Adam Aleýhissalam 30 ýaşly adamyň keşbinde ýaradylan bolsa, 40 ýyldan soň ol 70 ýaşly adam bolýarmy? Şeýle bolsa, ýaradylanyna 40 ýyl bolan adam nähili logiki esasda 70 ýaşly bolsun?  Başgaça aýtsak, ýaradylanyna bir ýyl bolan wagty ol bir ýaşyny dolduran bolýarmy? Ýa-da bu zatlar Adam Aleýhissalamyň Behiştde ýaşan döwrüne gabat gelýänligi üçin hasap edilenokmy? Beýle bolsa, Behiştden çykarylyp, Ýere getirilen wagty ol näçe ýaşly bolýar? Ýa Behiştde ýaşan döwri onuň ömrüniň hasabyna girenokmy?