bi-ÇÄRE-ler

Şol günem beýleki günler ýaly irden hasyr-husur turdular-da, el-ýüzlerini çalam-çupur ýuwuşdyryp, kimler baýdagyny, kimler plokatyny alyp özlerine garaşyp duran awtobusa tarap ýöneldiler. Heniz özlerine doly gelip bilmedik söwda institutynyň talyplarynyň käsi içinden igense, käsi ýolbaşçy mugallymlaryna ullakan “sagbolsun” aýtdylar. Bu gün entägem sport eşikli gitmeli edildi. Ýogsam köplenç gyzlardyr oglanlar sowugyň aňzagy, yssynyň jöwzasy diýmän şol bir eşiklerini geýmeli edýärdiler. Sport eşikleriň içinden ýaşyryn azajygam bolsa ýyly zatlar geýmäge mümkinçilikleri bardy. Ynha, özlerine ýuwaş-ýuwaş gelen talyplaryň galmagalynyň üstüni basyryp, awtobusyň azajyk tarryldyly sesi ugrandyklaryndan habar berdi.
Barmaly menziliň ýollary häzirden ýapykdy. Ýogsam, çäräniň başlamagyna “bary-ýogy” 4 sagat bardy ahyry. Talyplaryň awtobuslary goýberilýärdi. Söwda institutynyň talyplary ilkinji bolup gelendiris öýdýärdiler. Aslynda bular iň soňkularyň hatarynda geldi. Haýran galaýmaly, sagat ýaňy 5:00 bolupdy. Beýlekiler näçede geldilerkä?!
Her kim ýerli ýerinde goýuldy, baýdaklar, şarlar paýlandy. Şarlary ikiden-üçden paýlaşan talyplar, olary çişirip, baýdaklaryny galgadyp, repetisiýa geçip gördüler. Bularyň bary 45 minut wagtlaryny aldy.
Ýene sanlyja minutdan, has takygy 3 sagat 15 minutdan dabara başlamalydyr. Her kim ertiriň salkyn we arassa şemally howasyndan dem almaga derek, gözlerini uly nägilelik bilen süzüp, ýüzlerini asyşdyryp, “durmaga” başladylar. Olaryň nägileligi göýä, belki-de asla hiç kimiň pikiňine-de däldi. Mugallymlar bolsa bu ýerik entek gelmedik ýolbaşçylardan ses eşitmekden gorkularyna reňkden-reňke girip, talyplaryň arasynda terbiýeçilik işlerini geçiren bolýardylar. Olaram adam bolany üçin içlerinden talyplara haýpy gelýänleri-de ýok däldi. Ýöne gynandyrýan tarapy, olaryň sany bir eliň barmaklaryndan geçenokdy. Gelen-gelmedikleriň hasaby alyndy, gelmedik ýek-tük bagtyy ýatanlar bolsa, belkem özlerine beriljek temmilere-de razy bolup ýatandyrlar.
Kakalarynyň beren pullaryny harama çykarmajak bolup, okuwdan kowulmagyndan howatyrlanýan talyplar, özleri üçin edilýän aladalara jogap edip, talaplary berk berjaý edýärdiler. Dagy näme, sport çäreleri, medeni çäreler, olaryň ruhubelent hem-de sagdyn, göwnaçyk hem-de erjel bolmaklary üçin uly goltgy berýär ahyry. Bularyň bary olaryň bähbiti üçin ahyry.
Ynha durulýan pursatda söwda institutynyň bir talyby Myratgeldi : “Ukymam alyp bilmedim, azajyk giç gelsegem bolardy şu taýa” diýip içini hümledip dur.
Başga bir tehniki institutynyň talyp gyzy Maral bolsa: “Käşgä, şu ýerdejik oturyp, hatda, azajyk ýatyp bolsady” diýip, içinden pikir ýüwürdýärdi.
Galan talyplaryň dilinde bolsa umuman: “Ir getirýärler”-den başga zat ýokdy. Biçäreleriň kellelerine: “Çäre nämä gerek” diýen sorag haçan öwsüp geçerkä?! Boluşlary şu bolsa-ha...
“Bää, irden howlugyp, aýak ýoluna-da gidip bilmedim” diýip, sport institutynyň erjel talyby Atajan içini gepletse, “Bolman geçen çäre” diýip, uniwersitetiň akyllyrak talyplarynyň biri hasap edilýän Bibijan her kimden ogrynça pikir öwürdi.
Wagt çalt geçýär. Ýöne muňa içlerinden sekunt sanap duran talyplary şu wagt ynandyrmak gaty çetin bolsa gerek?! Olaryňam muňa ynanaslary, umumy ýaşaýyş jaýyna gidip, ýorganyň astyna giresleri gelip durdy. Häzir olara çäräniň başlamagyna 1 sagat galdy diýseň, ynanjak gümanlary bolmaz. Olaryň küýi her ýerdedi, ýöne şu ýerde däldi.
Ýolbaşçylar sepeläp ugrady. Her kim olara umytly nazarlaryny dikmeýärdi. Sebäbi düşünje nazarlary giňemedik bu talyplarda umyt diýen düşünje, häli-şindi hakyky manysynda dörejege meňzänok.
Zehinli talyplar ýok däl. Ynha gaharly bakyşlaryny iň öňde duranlara gazaply dikip duran abraýly uniwersitetiň zehinli talyby Serdar, olara uçgun saçyp içini batly hümletdi: “Bu zatlaryň bir gün soňy geler welin...”
Yzyny getirip ýetişmänkä ullakan şowhun we “begençli” el çarpyşyk pikirini sowatmaga ýetişdi...
-Yhlas Halysow

SalamTurkmen Copyright 2012 www.facebook.com/salamturkmen

Göçürilen ýagdaýynda fb.com/salamturkmen çeşmesi hökmany görkezilmeli! Makala awtorlyk hukugyna registrasiýa edilendir!

Haladyňyzmy?

Hawa(93%, 14 adam)

Yok(6%, 1 adam)