Mulk (Tebärek) surasy
Bu süre Mekkede nazyl edilen bolup, otuz aýatdan jemlenendir. Süre bütin älemler mülküniň patyşalygy Öz elinde bolan Allah tagalanyň çäksiz beýik-bereketlidigini tassyklamak bilen başlanýar. Şu sebäpden, ol “Mülk süresi” diýip atlandyrylandyr. Käbir neşirlerde ony “Tebärek süresi” diýip hem atlandyrýarlar.Bu sürede Allah tagalanyň ölüm we ýaşaýyş nygmatlaryny näme üçin ýaradandygy hem-de Onuň ýedi gat asmany we ondaky möwjudaty (barlyklary) nähili takyk hikmet-tertip bilen ýaradandygy beýan edilen aýatlar bilen bir hatarda ahyret hakynda we ol Günde käfirleriň duçar bolýan azaby hem-de olaryň çekýän bipeýda efsun-nedamatlary dogrusynda habar berýan aýatlar hem bardyr. Soňra Ýeru-asmandaky Allah tagalanyň ylahy gudratyna delalat edip duran dürli-dümen aýat-alamatlar tefsirlenýär hem-de käfir we mumin hakynda ybratly mysallar getirilip, barça ynsanlar Allah tagalany razy edýan Dogry Ýoly tutmaga çagyrylýar. Işbu süräniň manysy esasynda birnäçe hadyslar rowaýat edilen bolup, olardan biri ymam Tirmiziniň rowaýat eden, ine, bu hadysy-şerifidir: Pygamberimiz sallallahu aleýhi we sellem aýtdy: “Hakykatdan, Allahyň Kitabynda özi otuz aýatdan ybarat bolan bir süre bar ki, ol (şol süräni okap, amal edip ýören) kişini şefagat eder we hatda Kyýamat gününde ony dowzahdan çykaryp, jennete girizer. Ol Tebärek süresidir”.
Arhiwiň ýagdaýy
● Doly tekst
● 10/10 teswir saklanypdyr
Ýazylan saýty: ertir.com · Çeşme: Web Archive nusgasy — ertir.com, 2 awgust 2012 ý. · Asyl sahypany gör ↗
Teswirler 10
Rahman we Rahym bolan Allahyň ady bilen:
1. (Barça älemler) mülki – patyşalygy Öz elinde bolan – Allah bereketli beýikdir. Ol hemme närsä kadyrdyr.
2. (Eý, ynsanlar, Ol) siziň haýsylaryňyzyň gözel – ýagşy amal edýändigiňizi synag etmek üçin ölüm we ýaşaýyşy ýaradan (zatdyr). Ol gudratly we geçirimlidir.
Düşündiriş: Diýmek, Allah tagala her bir ynsanyň, ine, şu durmuşy dünýäde edip ötýän amallaryny synap, ahyretde şol amala görä sylag-jeza bermek üçin ölümi we ýaşaýyşy ýaradan eken. Işbu aýaty Kerimde ölüm sözüniň ýaşaýyş sözüniň yzyndan getirilmegine sebäp, ölüm kelemesiniň mazmunynyň ýaşaýyş kelemesiniň manysyndan tereňligidir. Çünki, ýaşaýyş sözi şu ötegçi dünýäde ýaşamagyň başlanyşyny bildirse, ölüm sözi ahyret diýaryndaky baky durmuşyň ebedi ýaşaýyşyň soňy bolup görünse-de, aslynda ol baky durmuşyň başlanyşydyr. Bu dogrusynda pygamberimiz sallallahu aleýhi we sellem şeýle diýen: “Janym elinde bolan zada – Allaga kasam ki, siz meniň sözlerimi olardan (ölülerden) ýagşy aňlaýan dälsiňiz. Olar diňe jogap berip bilmeýärler, bolany”.
3. (Ol) ýedi asmany gatma-gat ýaradan zatdyr ki, siz Ol Rahmanyň ýaradyşynda bir tapawut-nogsany görmersiňiz. Hany indi gözüňizi ýene (göge) gaýtadan aýlaň, (olarda) bir husur, jaýryk görermikäňiz?
4. Soňra gözüňizi (göge) gaýta-gaýta gezdiriň, gözüňiz size ýadap ysgyndan gaçan ýagdaýda gaýdar (emma Allah tagalanyň ýaradan asmanlaryndan birem aýby-nogsan tapyp bilmez).
5. Hakykatdan, Biz iň ýakyn asmany çyraglar (ýyldyzlar) bilen bezedik, we olary şeýtanlara atylýan daşlar edip goýduk. Biz olar (şeýtanlar) üçin (ahyretdäki) dowzahy – ot azabyny hem taýýarlap goýandyrys.
6. Perwerdigärlerine käfir bolan kimseler üçin jähennem azaby bardyr. Şeýle ýaman akybet bu!
7. Haçanda olar (jähenneme) taşlananlarynda, gaýnap duran (jähennemiň edil eşegiň aňňyryşy ýaly) bir bögürip perýadyny eşiderler.
8. Ol (dowzah) gazapdan bölünip, set para bolup gitjek bolar. Her haçan oňa bir topar (käfir) taşlananynda, onuň goragçylary olardan (käfirlerden): “Size (durmuşy dünýäde) birem ägählendiriji- pygamber gelmändimi?” diýip soranlarynda;
9. Olar diýerler: “Hawa, hakykatdanam hem, bize ägählendiriji gelipdi, (ýöne biz ony) ýalançy hasap edendiris we: “Allah (hiç kime) hiç närse inderen däldir, siz diňe uly zalalatda, gümralykdasyňyz” diýendiris”.
10. Olar (käfirler) ýene: “Eger biz (duýduryjy pygamberiň sözlerini) diňläp, akyl ýörediji bolanymyzda, dowzah eýeleri hatarynda bolmazdyk” diýerler.
11. Ine, olar öz günälerini boýun aldylar! Indi ol dowzah eýelerine heläket bolgaý!
12. Elbetde, gaýypdaky (gözlerine görünmeýän) Perwerdigärlerinden gorkýanlar üçin geçirim we uly sogap-sylag bardyr.
13. (Eý, ynsanlar), siz sözüňizi ýaşyryň ýada äşgäre ediň (barybir Allah bilip durar). Elbetde, Ol kalblardaky syrlary bilijidir.
14. (Eýsem sizi) ýaradan (Öz ýokdan bar eden närselerini) bilmezmi?! Ol mähribandyr we (her närseden) habardardyr.
15. Ol (Allah) siziň üçin Ýeri hakisar – boýun sunujy edip goýandyr. Bes, onuň (Ýeriň) her tarapynda (seýri-syýahat edip ýa söwda bilen ýada daýhançylygy kesp edip) ýörüberiň we (Allahyň beren) ryzky-ruzundan iýiň. Ýalňyz Onuň huzuryna dirilip çykmak – gaýtmak bardyr.
16. (Eý, Mekke käfirleri), ýa siz (küfrleriňizde aýak diräp duruberseňiz) asmandaky zadyň sizi ýere ýuwtduryp goýbermeginden, bes, öz-özünden (ýer) titräp, (sizi basyp galmagyndan) hatyrjemmisiňiz (gorkmaýarmysyňyz)?!
17. Ýada siz asmandaky zadyň üstüňize daş ýagdyrmagyndan hatyrjemmisiňiz?! Häli (azaba giriftar edileňizde) Meniň duýduryşymyň nähilidigini bilersiňiz!
18. Derwaka, olardan owalky kimseler hem (öz pygamberlerini) ýalançy hasap edendirler. Bes, Meniň inkärim – azabym nähili boldy?!
19. Olar üstlerinde (ganatlaryny) ýaýyp we ýygnap (uçup ýören) guşlary görmedilermi?! Olary (guşlary) ýalňyz Rahman (diňe gökde) saklap durar! Elbetde, Ol barça närsäni görüp durandyr.
20. (Eý, müşrikler), Rahmandan özge size ýardam berýän, siziň üçin goşun-ýardamçy bolan şol zadyň özi kim?! (Allahdan özge birem medetkär ýokdur). Käfirler bolsa, hemişe azaşmadadyrlar (aldanýandyrlar. Şonuň üçin olar özleriniň sygynýan but-senemleri olary Allahyň azabyndan gutaryp biler diýip hasaplaýarlar).
21. Eger (Rahman) Öz ryzkyny kesse, size ryzk-ruz berýän şol zadyň özi kim?! (Allahdan başga birem ryzky-ruz beriji ýokdur). Ýok, olar (käfirler) garşy gidişde (tekepbirlikde, men-menlikde) we (Hakdan) daş düşmekde batdylar.
22. Eýsem, ýüzi aşak (ýagny, aýagynyň astyndan özge tarapa garamazdan) ýörýän kimse Hak ýoly taparmy ýada kaddy rast ýagdaýda Dogry ýoldan ýöreýän kişimi?!
Düşündiriş: Işbu aýaty Kerim käfir bilen mumin hakynda getirilen ybratly bir mysaldyr. Oňa şeýle düşünmek lazym. Dinsiz-etagatsyz kimse birem ylahy gollanmasyz, geçen gününi hem, ertir-gelejegini hem unudyp, diňe şu gününi nähili geçirmek gamynda, şu günüň aladalaryny çözmek bilen sergezdan, awara galyp, ýagny, diňe aýagynyň aşagyna garap gün geçirýär. Diýmek, onuň ertir, birigün ýolundan çykjagy anyk bolan her hili daşa – böwede büdräp, ýüzin ýykyljagynyň ujy iki däl. Emma iman-ygtykat eýesi bolsa, Ýaradan iberen Ylahy Gollanmasynyň görkezen Dogry Ýolunda, göwresini dik tutup, edýän her bir iş-amalynda diňe häziriň hözirini gözlemezden, belki, ertiri – Kyýamat günündäki hasap-kitaby we sogap-sylagy oýlap barýar. Şunlukda, bu günüň, ýagny, ötegçi dünýäniň arzan matalary ony öz saýlap alan Dogry Ýolundan azaşdyryp bilmeýär.
23. (Eý, Muhammed, ol käfirlere) aýdyň: “Ol (Allah) sizi (ýokdan) bar eden we siziň üçin gulak, göz kalp (bagyş) eden zatdyr. Siz bolsa, entegem az şükür edýärsiňiz”.
24. Aýdyň: “Ol sizi Ýer ýüzünde ýaradandyr. Siz (Kyýamat gününde) ýalňyz Onuň (alnyna) toplanarsyňyz”.
25. Olar: “Eger rastgöý bolsaň, (hany aýt) işbu wada (edilen Kyýamat güni) haçan bolýar” diýerler.
26. (Eý, Muhammed, olara) aýdyň: “(Kyýamatyň haçan kaýym boljagy hakyndaky) bilim ýalňyz Allahyň huzuryndadyr. Men diňe bir açyk ägählendirijidirin, bolany”.
27. Bes, haçanda olar (Kyýamat gününde wada edilen azaby özlerine) ýakyn halda görenden soň, ol käfirleriň ýüzleri garalyp gider we (olara): “Ine, şu siziň islän närsäňizdir” diýiler.
28. (Eý, Muhammed, ol käfirlere) aýdyň: “Hany, habar beriň, eger Allah meni we meniň bilen bile bolan kişileri heläk etse ýada (ömrümizi uzyn etmek bilen) bize rehim-şefagat etse (Özüniň izin-ýgtyýarydyr. Emma) indi käfirleri (ýagny, sizi) kim agyr azapdan halas eder?!”
Düşündiriş: Mekke käfirleri hemişe Muhammed aleýhissalama we onuň sahabalaryna ölüm – heläkçilik dileýärdiler. Şonda Allah tagala tarapyn pygamberimiz sallallahu aleýhi we selleme ýokardaky aýat nazyl edilip, käfirlere şeýle jogap bermäge oňa emr edildi: “Biz muminler iki gözel akybete göz tutup ýaşaýarys. Olaryň biri, siziň arzuw edişiňiz ýaly, din ýolunda gurban bolup, jennete ýetmek bolsa, ikinjisi aman galyp, siziň üstünizden özümiziň umyt eden ýeňşimize ýetmekdir. Emma siz käfir bolup, (üstesine) kimiň hemaýatyna garaşýarsyňyz?!”
29. Aýdyň: “Ol (Allah) Rahmandyr. Biz Oňa iman getirdik we ýalňyz Onuň Özüne töwekgel etdik – söýendik. Häli siz kimiň açyk zalalatdadygyny bilersiňiz!”
30. (Eý, Muhammed, ol müşriklere) aýdyň: “Hany, habar beriň, eger (öz-özünden içer) suwlaryňyz (ýer teýine) siňip gider bolsa, onda kim size akar suw getirip biler?!” (Jansyz butlaryňyzmy?! Bes, näme üçin ol bipeýda, jansyz butlara Rahman Allaga şärik etdiňiz?!)”.
Alla razy bolsun sagbol dostum yhlasyna.
Алла мырадына йетирсин.
bizde tebarek cykylya, sadakalarda, yaslarda, ayat okalanda. Shonda shu sure okalya. Alla razy bolsun agam.
bizde tebarek cykylya, sadakalarda, yaslarda, ayat okalanda. Shonda shu sure okalya. Alla razy bolsun agam.
sagbol dos paylashanyna. Allah razy bolsun !
Turkmen Talyp sagja bol dost paylashanyna! ALLA RAZY BOLSUN!!!
Gyzyklanyp okanynyz uchin minnetdar. Allah shu suränin manysyny okamak bilen Ozune yakyn etsin we dogry yola salsyn. Huday ishlerinizi ugruna etsin, elbetde bar zat Onun elindedir.
Sag bol ýetireniñe
Haladym 👍