Ene-atanyň söýgüsi

Ir wagtlar bir är-aýalyň bir ogly bolupdyr. Olar ogluny biçak eý görer ekenler. Iň gowy zatlardan iýdirip-içirip, iň gowy zatlardan geýdirip ony ulaldypdyrlar. Bir gün ogly ene-atasyna şeý diýipdir: „Indi menem işläp, söwda edip, pul gazanjak. Şeýdip size kömek etjek.“ Ine, şeýdip bir gün söwdagärler bilen ol hem söwda etmäge gitmek üçin goşuny düwüpdir. Goşuny düwüp otyrka kakasyndan sorapdyr: „Kaka, gelýärkäm saňa näme getireýin?“ Kakasy oňa: “Oglum, maňa bölek-büçek ýüp getiräý!” diýip, jogap beripdir. Soňra ejesinden sorapdyr: „Eje, saňa näme getireýin?“ Ejesi hem: “Maňa köýen çörek bölejiklerini getiräý!” diýip jogap beripdir. Oglan ýolda iýen çörekleriniň köýen ýerlerini bir torbajyga salypdyr. Söwdasy oňup, esli zat bilen öýüne dolanyp gelýärkä, kakasyna alan ýüpleri oglana ýolda gerek bolupdyr. Şeýdip ol kösenmän, sag-aman dolanyp gelipdir. Öýüne gelensoň:”Eje, men saňa köýen çörek bölejiklerini getirdim, ýöne kaka, seniň aýdan ýüpleriňi getirip bilmedim. Getirýärdimem welin, olar maňa ýolda gerek boldy“ diýipdir. Soňra bolsa ejesi bilen kakasyndan şo zatlary näme sebäpden sargandyklaryny sorapdyr. Ejesi: “Ýolda çöregiň köýen ýerlerini iýmezligiň üçin şeýtdim“ diýipdir. Kakasy hem: “Sebäbi men saňa ýolda şol ýüpleriň gerek boljagyny bilýärdim” diýip, jogap beripdir. Ähli ene-atalar dilleri bilen aýtmasa-da, uly-kiçi diýmän, perzentlerini eý görýär.

awtory : OGULJENNET GURBANDURDYYEWA.
Gownunizden turar diyip umyt edyan!!!