MÜBÄREK günler we gijeler (4)

REGAIP GIJESI
Üç aýlar diýip hasaplanylýan Rejep, Meret we Oraza aýlary ruhy taýdan beýleki aýlardan has üstündir we örän bereketlidir. Rejep aýy gelen wagty mähriban pygamberimiz şunuň ýaly doga edipdir: "Allajan, sen bize Rejep we Meret aýyny mübärek et we bizi sag-aman Oraza aýyna ýetir" (Jamius-Sagir, j.5, s.131).

Rejep aýynyň ilkinji juma gijesi (anna agşamy) "Regaip gijesidir". Bu gije Allanyň rehmetiniň we bagyşlamasynyň bol eçilen, dogalaryň kabul edilen bir mübärek gijesidir. Hormatly pygamberimiz şeýle diýipdir:

"Bäş sany gije bardyr, hut şol gijelerde edilen dogalar, okalan aýatlar yzyna gaýtarylmaz, kabul ediler. Olar:

• Rejebiň ilkinji juma gijesi;

• Merediň on bäşinji gijesi;

• Juma gijeleri;

• Orazanyň baýram gijesi;

• Gurbanlyk baýramynyň gijesidir." (a.g., eser, j.3, s.454)

MAGRAÇ GIJESI

Allatagalanyň çakylygy boýunça hormatly pygamberimiziň bir gije Mekgede Mesjidi Haramdan Kudusdaky Mesjidi Aksa göterilip, şol ýerden Jebraýyl bilen bilelikde bütin asman gatlaryny aşyp "Sidretülmünteha" diýlen ýere çenli belentlige galypdyr. Bu ýerden has öňe gidip, pygamberimiz (s.a.s.) beýik Alla bilen habarlaşypdyr.

Bu mukaddes ýolagçylygynyň Mekgeden Kususa çenli bolan bölümine "Isra", Kudusdan başlap dowam eden bölümine-de "Magraç" diýilýär. Pygamberimiziň baş wagt namazy ummatyna Magraç sowgady hökmünde getiripdir. 

Magraç wakasy pygamberimiziň iň uly täsinliklerinden biridir. Hijriden bir ýarym ýyl öň Rejep aýynyň 27-nji gijesinde bolup geçipdir.