Iň uly ymam EBU HANIFE

Ebu Hanife yslam dünýäsiniň ösdürip ýetişdiren iň uly alymlarynyň biridir. Ol ýiti we çuň bilimli, ýokary derejeli zehini we belent mertebeli ahlagy bilen yslam dünýäsinde bir ýyldyz ýaly şöhle saçypdyr, musulmanlara şamçyrag bolup, aýdyň ýol görkezipdir. 

Hanife uly bir dana bolmak bilen birlikde, ol Alla üçin ybadatda, ynsanlara ýagşylykda, dürslükde, dogruçyllykda we arassa ahlaklylykda yslam dünýäsinde nusga alarly bir uly şahsyýetdir.

Ol 40 ýyllap ýassy täreti bilen ertir namazyny okar eken, tutuş gijelerini yzygiderli ybadat edip, ýatman geçirer eken. Bir rekat namazda Mukaddes Gurhany başdan aýaga çenli okandygy aýdylýan Ebu Hanife diňe Oraza aýynda her gije bir, günüň dowamynda-da bir, jemi 60 gezek Gurhany soňuna çenli okap çykýan eken. 

Gününi söwdagärlik, alym-satym işi bilen dolandyrýan Ebu Hanife örän dogruçyl bolupdyr, özünden öň beýleki adamlar hakynda oýlanýan eken. Günleriň birinde, bir aýal oňa satmak üçin ýüpek don getiripdir. Ebu Hanife onuň bahasyny sorapdyr. Aýal hem oňa 100 dirhem bolsa bolýar diýipdir. 

Ebu Hanife: 
 - Munuň bahasy ýüzden köpräkdir, näçä berjegiňizi anyk aýdyň - diýipdir. Şonda aýal ýüz-ýüzden köpeldip, ahyrynda 400 dirheme çykypdyr. 

Ebu Hanife: 

 - Ýok, ondan hem gymmat bolmaly - diýipdir. Ol aýal: 

 - Siz näme meniň bile oýun edýärmisiňiz?! - diýipdir. Ebu Hanife: 

 - Neneňsi geň-täň adam, gidiň-de bir adam getiriň, gelsin şu dona baha kessin. Ol aýal bir adam çagyryp getirdi. Baha kesdirdi. Soňunda Ebu Hanife dony 500 dirheme satyn aldy. Alyjy özi bolan ýagdaýynda-da ol satyjynyň bähbidini gorap, dogruçyllyk babatda nusga alarly adamkärçiligi görkezipdir. 

Ebu Hanife 55 gezek haja gidipdir. Iň soňky sapar gideninde Käbäniň içine girip, iki rekat namaz okapdyr. Namazynyň birinji rekatynda Alhamdan soňra Gurhanyň ýarysyny, ikinji rekatynda bolsa galan bölegini okap, iki rekat namazda tutuş Mukaddes Gurhany okap çykypdyr.

Yslamyň esaslary (ynanç, ybadat, ahlak, pygamber) kitabyndan, Ankara-2003