"HAS GOWUSYNY" nähili saýlamaly?! (3)

"Pulany ogrulykda tutulypdyr" diýen gürrüň köpe ýaýranda, obadaşlarynyň biri: "Ogurluk ýaly biabraý zat ýok. "Ogry" diýleninden-ä, "tirýeki" diýleni HAS GOWY" diýip, dile getiripdir. Ýyl aşyp ýetişmänkä ýaňky ýigidiň agzyny hapalandygyny hyşy-wyşlar arkaly her kim eşidip galdy. Sebäbi bu onuň göz öňüne getirip bilýän beýleki bir zatdan "HAS GOWY ýagdaýy". 

Has gowusyny saýlap, isläp, diläp alyp bolýarka, öňündenem has erbedini, has şumuny, has beterini dile getirmek nämä gerek? Biziň ýüreklerimize kimdir biri ýa-da hiç kim düşünmeýändir öýtsegem, iň bolmanda, şol ýüregi ýaradan düşünýär. Perwerdigär durmuşyň gylla ýarysyny öz islän gowy zatlary bilen gurşasa, galan ýarpysyny biziň isleýän gowy zadymyz bilen doldurýan ýaly görünýär. Biz-ä "HAS GOWUSY" diýip dilimize getirsek, OL hem göwnümizi ýykmajak bolup, şony berse, bizem ýene diläp alan zadymyzdan nägile bolsak, onda biz diňe göwnümizi däl, eýsem Ýaradanyň öňünde ýalançy bolup galdygymyz bolar. 

Ýusubyň husny-görküne maýyl bolan Züleýha ony dürli ýollar bilen özüne imrindirjek bolupdyr. Emma Ýusup "Şol gabahat işi edenimden-ä zyndana düşenim HAS GOWY" diýipdir. Seýdibem, bu wakalaryň yzysüre Ýusup töhmet zerarly zyndana atylypdyr. Köneden gelýän şu taryhy kyssa giňişleýin düşündiriň beren alymlar, ulamalar, danalar: "Eger-de, şol wagt Ýusup zyndana däl-de, halas bolmaklygy dile getiren bolsady, Allatagalla ony halas etjekdi, ýöne "zyndana düşenim HAS GOWY" diýensoň, OŇA bendesiniň isleýän HAS GOWY ýagdaýyny bagyş etdi diýýärler. Saýlamak ygtyýarynyň haçan  we nähili röwüşde öz haýrymyza bagyş ediljekdigi näbelli. 

Muňa garamazdan, her bir zadyň HAS GOWUSYNY saýlap almaklyga endik etmeli. "HAS GOWY" diýip, öňküden-de mojuk bir zady dile getirip otursak, ussasy özümiz bolan ömür binasynyň mermerine derek hek, kerpijine derek kömür goýmaly bolarys. 

Ýa-da käbir pursatlarda gowy zada gözümiz düşende: "Beýle zat bize nesip edesi ýok-la" diýmän, "Tüweleme, bize-de Hudaý ýetirsin" diýip, ýagşy röwüşde hem ýaňzydyp bolýar ahyry. Diliňe bitýärmi, diýmeli. Emma günde-günaşa "HAS GOWULARYŇ" giden tapgyryny dile getirsek-de, olaryň ençemesi halamaýan zadymy bolýar duruberýär. Bir zat welin düşnükli: saýlanylan "HAS GOWULARYŇ" özümize zyýany bolup çykmazlygy üçin, hakykatdan-da HAS GOWULARYNY dile getireliň. Ýaramaz söz bilen özümizem, ömrümizem aldamalyň!

Rahmet GYLYJOW, Nesil gazeti