2017-nji ýylda Aşgabatda geçiriljek Aziýa Oýunlarynyň emblemasyny we talismanyny döretmek boýunça halkara bäsleşigi yglan edildi. (Bildiriş)

B I L D I R I Ş

Türkmenistanyň Milli Olimpiýa komiteti, Türkmenistanyň Syýahatçylyk we sport baradaky döwlet komiteti we Türkmenistanyň Medeniýet ministrligi 2017-nji ýylda Aşgabat şäherinde geçiriljek «Ýapyk binalarda we söweş sungatlary boýunça V Aziýa Oýunlarynyň» (5th Asian Indoor & Martial Arts Games Ashgabat - 2017) nyşanyny (emblema) we talismanyny döretmek boýunça
HALKARA BÄSLEŞIGI
yglan edýärler

Türkmenistanyň Prezidenti hormatly Gurbanguly Berdimuhamedowyň alyp barýan il-ýurt bähbitli syýasatynyň netijesinde berkarar döwletimiziň bagtyýarlyk döwründe ähli ulgamlarda bolşy ýaly, sport ulgamynda hem belent sepgitlere ýetildi. Türkmen döwletiniň pähim-parasatly Baştutanynyň egsilmez sahawaty bilen ilatymyzyň bedenterbiýe we sport bilen giňden meşgullanmagyny, türkmen ýaşlarynyň beden taýdan sagdyn täze nesliniň kemala gelmegini, ýokary hünärli hem-de halkara derejeli ussat türgenleri we ýygyndy toparlaryny taýýarlamak üçin amatly şertleriň döredilmegini, ýurdumyzda halkara, şeýle hem sebit ýaryşlarynyň üstünlikli geçirilmegini üpjün etjek sebitde deňi-taýy bolmadyk Olimpiýa şäherçesiniň, sport toplumlarynyň, dynç alyş we sagaldyş merkezleriniň gurluşygynyň giň gerim bilen ýaýbaňlandyrylmagy munuň aýdyň subutnamasydyr.

2010-njy ýylyň 19-njy dekabrynda Aziýanyň Olimpiýa geňeşi bilen Türkmenistanyň Milli Olimpiýa komitetiniň arasynda 2017-nji ýylda Aşgabat şäherinde geçiriljek «Ýapyk binalarda we söweş sungatlary boýunça V Aziýa Oýunlaryny» (5th Asian Indoor & Martial Arts Games Ashgabat - 2017) geçirmek hakyndaky ikitaraplaýyn resminama gol çekilmegi gözel paýtagtymyzda Merkezi Aziýa sebitinde ilkinji bolup üsti ýapyk binalarda Aziýa oýunlaryny geçirmäge hukuk berdi.

Bu halkara sport bäsleşiginiň maksady Garaşsyz, hemişelik Bitarap Türkmenistanda 2017-nji ýylda sebitde ilkinji gezek Aşgabat şäherinde geçiriljek «Ýapyk binalarda we söweş sungatlary boýunça V Aziýa Oýunlarynyň» (5th Asian Indoor & Martial Arts Games Ashgabat - 2017) nyşanyny döretmekden, şeýle hem milli sportumyzyň mundan beýläk-de ösmegine ýardam bermekden, halkymyzyň bedenterbiýä we sporta, sagdyn durmuş ýörelgelerine bolan höwesini artdyrmakdan ybaratdyr.

Bäsleşige hödürlenilýän işler çeperçilik sungatynyň şu aşakdaky ugurlary boýunça ýerine ýetirilmelidir:
- grafika-plakat işleri görnüşinde;
- kompýuter grafikasy usulynda.

Bäsleşige gatnaşyjylar öz döreden işlerini elektron görnüşde DVD, CD disklerde ýa-da beýleki elektron ýatdasaklaýjylarda hödürläp bilerler. Olar bäsleşige hödürleýän işleriniň ýanyna özleri hakynda maglumatlary goşmalydyrlar (işleýän ýa-da okaýan ýeri, wezipesi, öý salgysy, telefon belgisi). Bäsleşige hödürlenilýän işleriň sany çäklendirilmeýär.

Eserleriň çeperçilik derejesine, hiline we many mazmunyna, döwrebaplygyna, milliligine, özboluşlylygyna Türkmenistanyň Olimpiýa komiteti, Türkmenistanyň Syýahatçylyk we sport baradaky döwlet komiteti hem-de Türkmenistanyň Medeniýet ministrligi tarapyndan döredilýän emin agzalary tarapyndan baha berilýär.

Bäsleşigiň netijeleri 2012-nji ýylyň sentýabr aýynyň ikinji ýarymynda Türkmenistanyň Döwlet çeperçilik akademiýasynyň sergiler jaýynda bäsleşige hödürlenen eserleriň görkezilmegi arkaly jemleniler we eminler topary tarapyndan saýlanylan iň oňat işler ýeňijini tassyklamak üçin Türkmenistanyň Ministrler Kabinetine hödürleniler.

Bäsleşikde iň oňat nyşan diýlip ykrar edilen eser bir sany baş baýrak 1000 (bir müň) amerikan dollary bilen sylaglanylar.

Bäsleşige hödürlenilýän işler we awtor baradaky gysgaça maglumatlar 2012-nji ýylyň 20-nji sentýabryna çenli Türkmenistanyň Syýahatçylyk we sport baradaky döwlet komitetiniň sport bölüminde hasaba alynýar.

Salgysy: Aşgabat şäheri, Puşkin köçesiniň 17-nji jaýy.
Habarlaşmak üçin telefonlar: 92-76-86, 92-00-69, 92-34-47.

«TÜRKMENISTAN» GAZETI

Gyzyklanýanlar üçin peýdasy deger diýen umyt bilen gazetden göçürdüm.