"HAS GOWUSYNY" nähili saýlamaly?!

Her birimiziň her bir zatdan has gowusyny saýlap almaga ýagdaýymyzam, mümkinçiligimizem, hakymyzam, ygtyýarymyzam bar. Üstesine, has gowusyny saýlap almaklyk her kimiň borjy bolubam durýar. 

Durmuşa gadam goýduňmy, ýollaryň has gowusyny saýlamaly. Maksatlara maňlaý dirediňmi, olaryň olaryň has gowusyny saýlamaly. Diňe bir maddy zatlaryň däl, pikir, hyýal, düşünje ýaly zatlaryň hem has gowusyny saýlap alyp bilýäris. Hatda dost, ýoldaş hökmünde-de adamlaryň özümize, ýüregimize has gowy görünýänleri saýlap turýarys. Hiç bir zat bize berlen şu mümkinçiligi elimizden alyp bilenok. 

Her kim öz durmuşynyň binägäri. Gurasy gelýän ykbal jaýyny, oňa gerek bolan suwuny, laýyny, hekini, içini-daşyny bezejek serişdeleri, goşlary özi saýlap alýar. Saýlamak mümkinçiligi barka, hiç kimiň özüne ýaramaz zat almajakdygy düşnükli. Şeýdibem öz durmuşymyzy gurýarys. Käteler welin saýlap alan zatlarymyzdan nägile bolup, =ygtyýardaky beýle deňsizligi= gel-gel bize gabat gelmesine gaharlanýarys. =Ýa-da biz has gowusy diýip, mojuk bir zady saýlaýana däldiris-dä, hernä?!= diýip oýlanýarys. Eýsem biz has gowusyny nähili saýlaýarys?

Mundan 15 ýyl çemesi wal orta ýaşly bir adam uzak ýola sapara çykypdyr. Kireý edýän sürüjileriň biri öz ulagyny mazamlap, oňa ulagyň öňki salonyny hödür edipdir: 

=Ýaşuly, ap-akja ulag. Öňi boş dur. Size garaşyp duran ekeni= diýip, sözüniň üstüni ýetiripdir. 

=Mündigim, eglenmän ugraýas dälmi?= diýip, ýolagçy günden goraýan gara äýnegini gözünden aýryp, kisesine salypdyr.

=Hawa, ýaşuly, ugrabermeli= diýip, sürüji ulagyň öňki gapysyny açyp beripdir.

Ýolagçy münmek üçin boýnuny içeri uzadypdyr-da, sakga säginipdir:

=A-how, yzky salonda kiçijik bäbek bar eken-ä! Ýok, kiçijik bäbek bolsa, maňa gerek däl. Barýançam, sesi jägildäp ýüregime düşer. Beýdip gidenimden, iki esse töläp, boş ýa-da bäbeksiz ulagda arkaýyn gidenim HAS GOWY= diýip dillenipdir.

Şeýdibem, ol başga ulagda bir özi gitmese-de, arkaýynlyk bilen barmaly menziline aşypdyr. 

Şol wakadan 5 ýyl soň ýaňky ýaşuly ogluny öýeripdir. Ondan bärem 10 ýyl çemesi wagt geçipdir, emma ýaňky ýaşulynyň agtyk perzende gözi düşmändir. Şunça ýyllaryň azaby, yhlasy, ile eden ýagşylykdyr ýamanlygy, çöplän-u-harç eden sogaby bir ýana, şol hereketi hem bir ýana agram salyp dur. 

Ähli zat huşundan uçsa-da, bar zadyň sebäpkäri hökmünde, =Ýok, kiçijik bäbek bolsa maňa gerek däl. Bäbeksiz ulagda arkaýyn gidenim HAS GOWY= diýen sözler gulagynda ýaňlanyp dur diýýär. Sebäbi bu onuň haçanam bolsa bir wagt hut öz islän, öz saýlap alan =HAS GOWY= ýagdaýlarynyň birirdi.

DOWAMY bar...