Towuk

Salam agzalar. Bu günki nahar duhowkada taýýarlanýan towuk. Türkmen nahary hä däl, ýöne talyplar üçin ýeňil taýýarlamasy bolan naharlaryň birisi.

Gerekli önümler: Bir bitewi towuk, 4-5 sany kartoşka, 2 sany pomidor, makaron, 2 kubik bulýon (towukly ýa-da gök önümli), mayonez, 2-3 diş sarymsak, duz we burç.

Bu nahara türkmen nahary diýip bolmasa gerek. Ýone talyplar üçin bişirmesi aňsat bolan naharlaryň biri. Ilki bilen towugy yuwmaly we içini arassalamaly. Gapmany suwdan dolduryp, gaýnaberende towugy hem içine atmaly. Üstüne 2 kubik bulýony atyp 20-25 minut güýçli otda gaýnatmaly. Towugyň eti gowy bişmegi üçin pyçak bilen käbir ýerinden deşip çyksapyz gowy bolar. Towuk bişenden soň bir tarelka çykaryp goýmaly.

Towuk taýýar bolýança kartoşkalary arassalap, hersini iki bölege bölüşdirip taýýarlamaly.

Towugy çykarandan soň gaýnap duran suwda 10 minut kartoşkany hem gaýnatmaly. Kartoşkanyň doly bişmegi zerur däldir. Kartoşkany hem soňundan aýry gaba çykaryp goýmaly.

Indi duhowka salmak üçin towuk we kartoşka çaljak maýonezi taýýarlamaly. 2-3 diş sarymsagy arassalap, gyrgyçdan gyrmaly we bir gapda 4-5 nahar çemçesi maýonezi üstüne goýup gowy garyşdyrmaly.

Duhowkany 180 gradus gyzgynlykda gyzdyrmaly. Protiweniň üstüne folga ýazyp çalaja ýag çalmaly. Merkezinde gaýnadylan towugy goýmaly we onuň ähli tarapyna sarymsakly maýonezi çalyp çykmaly. Gyrasynda gaýnan kartoşkany düzüp çykmaly we isleg boýunça pomidory hem ikä bölüp goýup çykmaly. Kartoşkany hem sarymsakly maýonez bilen örtüp çykmaly. Ahlisiniň üstüne isleg boýunça duz we burç (eger guradylan petruşka oty bar bolsa ony hem sepse bolar) sepmeli.

Duhowkada 35-40 minutdyň dowamynda gyzartmaly. Towuk we kartoşka taýýar bolmagyna 10 minut galanda towuk we kartoşka gaýnan suwynda makarony hem gaýnatmaly.

Ählisi taýýar bolanda makaronyň suwuny dökmeli. Her kime aýratyn gapda makarony guýmaly we towukdan kesişdirip goýubermeli.

Işdäňiz açyk bolsun!

Hormatlamak bilen Aýjagaz we Bibijan (=AýBibi=BibiAý=) 🙂