Gözler

GÖZLER
Her kimiň aýry-aýry bakyşy bar. Her kimiň dürli-dürli görüşi bar. Her kimiň başga-başga garaýşy bar. Kim bakanyny görse, kim görjek zadyna bakýar. Kimler göze görülýäni görýär, kimler göze görülmeýäni hem görýär. Kimiň gözleri owadan, kimler owadan görýär. Bakyp hem görüp bilmeýän, gözden gaçyrýan zatlarymyz, belki gözümize dürtülip duran zatlardan has ýakyndyr.Gözler, dünýäni owadan edýär, bakyşlary owadan edýär, owadanlary owadan edýär. Bu gözlerimize eýe bolmak üçin näme berdik?! 
Eýsem, gözlerimiz bize ähli zady görkezýärmikä ýa-da görüp bilmeýän zatlarymyz hem barmyka? Göze görünmeýän zatlarymyza ýok diýip bolarmy? Olary görüp bolmazmyka? Söýgimiz, gaýgymyz, şatlygymyz, küýsegimiz... göze görünmeýärmikä?Aslynda, ähli bar bolan zatlary görmek mümkindir. Duýgylarymyzy görüp bilmegimiz üçin bize göwün gözi berlipdir. Göwün gözi bilen seretmegi, adaty seretmekden tapawutlandyrýan zat, bu gözler bilen hemme zady görüp bilýäris. Biz nygmaty görýäris, göwün gözi nygmaty bereni görýär. Biz ýagyş damjalaryny görýäris, ýüregimiz şol damjalardan dörejek goşgy setirleriniň ylhamyny görýär. Eýsem, ylhamy bereni görmek üçin nähili göz gerekkä?! Arassamy, nurlymy, owadanmy, hakykymy..?
Belki, Leýlini Leýli edýän Mejnunyň gözleridir. Mejnuna: “Leýli üýtgeşik gyz däl ekeni” diýeninde Mejnun: “Oňa meniň gözlerim bilen hem seredip gör!” diýipdir. Mejnunyň kalp gözi adaty gözlerinden üstün çykypdyr.
Enä bolan söýgimizi nädip görkezip bileris? Özümizi alyp barşymyz bilen, enä hormat goýup, ýa-da oňa elimizden gelen hyzmaty edip... Ynha, ýekeje görünmeýän zady görkezjek bolup näçe hereket sarp edýäris.Şeýle belent derejeli duýgulary görüp bilmek üçin olara laýyk göz gerekdir.
Alys ýurtlaryň birinde bir dilegçi ýoluň çetinde öňüne el ýaglyk düşäp, “Doglandan bäri kör” diýip ýazylgy tagtajygy hem ýanyna goýup öten-geçenden “garaşyp” durupdyr. Onuň bu ýagdaýy şol ýerden geçip barýan biriniň ünsüni çekipdir. Onuň öňüne seretse pul oklan ýok eken. Muňa gynanypdyr-da, tagtajygy alyp başga bir zatlar ýazypdyr. Agşam wagty ýene-de dilegçiniň ýanyndan geçeninde, öňünde pul barynyň üýşenini görüpdir. Onuň ýazan jümlesi: “Ynha ýene bahar geler, güller açylar, daş-töwerek al-elwana bürener, guşlar uçuşar. Emma men muny ýene-de görüp bilmerin”.
Adamyň gözünde gudrat bar. Gözler gürlän mahaly sözleriň geregi ýok. Gözleriň çözjekleri sözlerde däl-de, özlerinde. Gözler duýgularyň baryny gözümize görkezýär. Ýerlikli seredip bilsek, bakyşlarymyz bilen täsirimizi ýetirip bilýäris. Başgalaryň duýgularynyň aýnasy gözler, gözümize gözlär, gözümizi gözlär.
“Görer gözüň gymmatyny” Magtymguly atamyz aýdyp geçen bolsa, “Göreçleriň görjek zadyny” Gurbannazar halypa görkezip gidipdir. Görjek zatlarymyz şeýle gymmatdyr welin, gözlerimiz olardan-da gymmatdyr. Belki, töwerekde uçuşyp ýören pikirler göwün gözleri bilen görlüp, duýgy gözleri bilen bezelip, akyl gözleri bilen serenjamlanýandyr.
“Uzadan ýerimize ýetýän bu alajalarymyzy” degenini deşýän “gözden gorap”, bize berlen bu nygmatyň “sagbolsunyny” haçan berip gutaryp bolar?
Hawa, gözel görýäniň pikirlenişi-de gözeldir. Gözel pikirler durmuşdan lezzet almaklygyň gözbaşydyr. Gözelligiň gözbaşy gözler, göwnüňe görä gözlär.