Kelemli dolama (golubsy)

Salam agzalar. Bu günki taýýarlanyşyny gürrüň berjek naharymyzdan öň käbir bildiriş etmek isleýän zatlarymyz bar:

• Siz bilen paýlaşýan ähli suratlarymyzy özümiz düşürýaris we emblemany goýup, köpçülige ýetirmek üçin taýýarlaýarys. Şonuň üçin =Naharlary özüňizem bişirip bilýäňizmi?= diýen soraglara jogap: Hawa. Özümiz bişirýäs, we bişirýän wagtymyz surata düşürýäs. Suratlar ählisi özümize degişli.
• Logony goýmagymyza sebäp: suratlary başga ýerde ulanyljak bolanda hem çeşmesiniň bildirilmegi. Emblema feysbukdaky =Turkmen cuisine= sahypasynyň logosy.
• Paýlaşýan naharlarymyzyň takyk adyny dogry goýup bilmeýänligimiz hem mümkin, ýöne başga tarapdan seretsek, her kim her hili atlandyryp biler. Köp ýagdaýda welaýatdan welaýata hem üýtgäp biler. We reseptlary hem hiç ýerden göçürilenok, reseptlar öz tejribämize laýyklykda şu wagta çenli öz öwrenenlerimiz. Şonuň üçin bu diýýäniňiz o dälä diýmäňde, dogry hasaplaýanyňyzy özüňiz teswiriňizde ýazyň ýa-da aýratyn tema edip açaýyň 🙂

Indi bolsa nahara başlalyň 🙂

Kelemli dolama (Rusça golubsy diýilýär)

Gerekli önümler: 1 kelem, 500 gr üwelen et, ýarym käse bürünç (tüwi), 4-5 sogan, 1 bulgar burç, 2 käşir, 3-4 pomidor ýa-da tomatny pasta, 2 kartoşka, duz, burç we ukrop.

Ilki bilen kelemiň düýbüniň gaty ýerini kesip aýyrmaly, ýa-da kesip aýyrman goýmalyda, gaýnap duran suwly gazanda 10-15 minut gaýnatmaly. Gaýnandan soň, kelemiň her ýapragy aýratyn aýyryp we içine et dolap bilinjek derejede ýumşak bolmaly.

Kelem gaýnaýança etini taýýarlap bilersiňiz: üwelen etiň we 2-3 sany soganyň (eger sogany et maşyndan geçirmane mümkinçilik ýok bolsa, maýdajyk dogramak hem ýeterlik) üstüne ýarym käse bürünji (tüwini) atyp, oz islegiňe görä duz we burç sepip, garmaly.

Kelem ýumşanyndan soň suwdan çykaryp, gyzgynlygyna her ýapragyna az-azdan taýýar bolan eti tegelap goýmaly we dolamaly. Dolamalary bir gazanyn ya gapmayn düýbünde örüp çykmaly.

Soňra aýratyn tabada (sa(a)jda) maýda dogralan 2 sany soganyň, 1 bulgar burçunyň, we 2 sany käşiriň üstüne biraz duz sepeleşdirip gyzgyn ýagda gowurmaly.

Bulary 7-10 minut gowuranyňdan soň (ýumşaberende) 2 sany kartoşkany kiçi böleklere bölüşdirip atmaly, we 2 minut kartoşkany hem garylandan soň dogralan pomidory ýa-da tomatny pastany goşmaly.

Ählisiniň üstüne ýarym käse suw guýup, 5 minut gapak ýapyp gaýnatmaly. Bu önümleriň tabada doly bişmegine zerurlyk ýokdur. Soňra tabadakylary hälki dolama örüp goýulan gapmanyň üstüne guýmaly we onun üstüni ýapýan derejede gaýnag suw guýmaly.Nahara isleg boýunça duz sepmeli. Biz köplenç nahara has üýtgeşik we gowy ys bermek üçin lawrowy list goýýarys(ýekeje ýaprak ýeterlik) (iňlisçe bay leaf diýilýär)

Suw guýanyňyzdan soň haýalyrak otda 25-30 minut üstüne gapak ýapyp gaýnatmaly. Taýýar bolandan soň islege görä diňe dolanan kelemleri çykaryp, tarelkada kelemli dolama görnüşinde, ýa-da çuňurak gapda çorbaly kelem dolama görnüşinde hem alyp bolar. Tarelka guýulandan soň üstüne birazajyk ukrop sepip äberibermeli.

Işdäňiz açyk bolsun!

Hormatlamak bilen Ayjagaz we Bibijan 🙂 (Keçeli agzanyň öňki temamyzda bellik edişi ýaly =BibiAý= 🙂 )