Ünji

Ünji

Günbatarda Gün ýaşdy
Gan agladyp şapagy.
Ünji inip, ýüregim
Sabyr-karar tapmady.

Hamala çogly Güneş
Gaýdyp dogmajak kimin,
Sumat bolup ýagtylyk
Gara bürendi zemin.

Çogun deň çoýýan Güneş
Agras, hoşgylaw, pes päl.
Hoş gal, öten günlerim,
Öten şu günüm, hoş gal!

Gözýetimde şapagyň
Gyzyl saçy gyrkyldy.
Gündiz ýadan bulutlar
Ýyldyz sanap irkildi.

Sagat dähedem-dessem
Peýdasy ýok tijäniň.
Bar reňkleri öçürip
Şol bir bolşy gijäniň.

Garaňkydan gorkmasam,
Gije gaty görmesin.
Bir reňkli galam bilen
Güni çyzyp ýörmesin.

Ertir irden ýene-de
Horaz täsin heň eder.
Elwan öwser Gündogar,
Gözün gyrpyp Gün dogar.

07.04.2012.