DOGAN...
Dogan doganyň galasy
BIZE SEN GEREK!
Geçen agşam düýş gördüm. Düýşüme sen giripsiň, dogan! Köýten dagynyň depesine, dinazawrlaryň aýak yzlaryna tarap dyrmaşyp barýarmyşyň. Egniňde-de ak reňkli sport eşigi. Men bolsam, aýagyň taýyp ýykylaýmagyňdan howatyr edip, howsala bilen aşakdan seredip durmyşym. Sen dagyň depesine çykyp, «Gel!» diýýän terzde maňa eliňi salgaýaň. Yzyň bilen ýokarlygyna dyrmaşyp barýan wagtymam oýandym. Şondan soň gözüme uky gelmedi. Sen hakdaky pikirlere, ýatlamalara gark boldum.
Dogan! Biz köplügem däl. Sen, men we uýamyz Maral. Türkmende öňden-ahyra ogul perzende aýratyn göz bilen seredilmegine biz, naçarlar boýun alyk-la. Uýam ikimiz mydama seniň hyzmatyňa gaýymdyk. Bäş ýaşyňa çenli arkamyza hopba edip gezdik seni. Senem «şomykam» diýip, ýöremäge başlaňsoňam ýaltalyk edip, bize özüňi götertdiň ýördüň. Maral çepiksijedi, boýam pesdi. Seni arkasyna alan wagty onuň göwresi hasam kiçelip, ýere girip barýan ýaly görnerdi.Onda-da men öý işine başagaý wagtym ol seni oýnatjak bolup çyr-çytyrdy.
Çaga wagtymyz her ýylyň bahar paslynda dynç günleri maşgalamyz bolup Köýten dagyna gezelenje giderdik. Dagyň gerşlerine çykyp, çigildem ýygardyk. Gaýnarbabanyň şypaly suwuna düşüp, hezil ederdik. Maral ikimiziň nah matadan tikilen birmeňzeş köýnegimiz bardy. Suwa düşenimizde şol köýnegi geýerdik. Bir gezek sen «Menem şonuň ýaly köýnek geýjek» diýip, baý aglapdyň-a! Ejem şonda Maralyň egnindäkini alyp, saňa geýdiripdi.
10 ýaşyňdadyň. Daga gezelenje gidenimizde birdenkä seni ýitirdik. Dogrusy, birbada ýanymyzda ýokdugyňa ünsem bermändiris. Sebäbi sen hemişe-de bizden aýrylyp giderdiň-de, ýütgeşik bir dag otuny ýa-da gülälek ýygyp gelerdiň. Bir gezeg-ä, çebşejigem tutup getiripdiň. Ýokdugyňy aňaýanymyzda-da şol wagt ýene-de bir täsinligiň gözlegindesiň diýip arkaýyn bolardyk. Gümpüldäp atylan tüpeň sesine barymyz tisginip gitdik. Aramyzda seniň ýokdugyňa göz ýetiren kakam aljyrap, «Rahym, Rahy-ym...» diýip, ikiýana elewredi. Çar tarapa ýaýrap, seniň gözlegiňe çykdyk. Öňki oýnaýan ýerleriňe belet bolamsoň, men şol tarapa ylgadym. Ullakan daşyň aşagynda çugutdyryp oturşyňa, sen ses bereňokdyň. Ylgap baryp, gujagyma aldym. Gözüň ýaşa dolduryp, sandyraýan elleriňi gaýra tarapa uzatdyň. Eli tupeňli hyýrsyz pyýadanyň keýik owlajygyny egnine alyp, dagdan aşaklygyna düşüp barýandygyny görüp galdym. Sen şonda dert tapyndyň. Birden-birden endamyňa güýçli gyzgyn gelip, gijelerine samrap çykardyň, towsup turardyň. Bejergiň uzaga çekdi. Seni gaýgy edip, ejem janyň saçy birden duw-ak bolupdy, şonda. Lukmanlar nämedir bir zatdan gaty gorkandygyňy aýtdylar. Ýüregiňdäki gorky keýik owlajygynyň gözüňiň alnynda jan beren pursatynda galypdy.
Synpdaş oglanym bilen biri-birimize synymyz oturýardy. Ýöne enem-atam bu söýgä çürt-kesik garşy çykdy. Nämemiş, ol oglanyň kakasy märekede kakamyň göwnüne degenmiş. Marala näme gerek diýsene! Düşüner-düşünmez: «Hütdük ýaly hökümet jaýynda ýaşaýarlar. Iliňki ýaly mal-gara-da ýok şolarda» diýip, jedir-jedir edipdi şonda. Ejemiň öwredenlerini gaýtalaýany ýüz-gözündenem bes-belli bolup durdy. Söýgi, bagt zatdamy, dälmi soň-a düşünendir Maral janam. Senem murty tabap başlan ýetginjekdiň. «Şoňa barsaň, menem arkaýyn ýaşamaryn» diýip, gyzarylyp gidip barýardyň. Göreşmegiň ýerine «Ene-atamy, jigilerimi närza edip bagtly bolarynmy?!» diýip menem ilkinji söýgimden dänip oturyberipdirin. Ýöne şonda-da senden gaty görmedim, dogan. Belki, senem Maral ýaly öwredilenini edensiň. Birinji synpdan bir partada oturyp, bileje ulalan gyzyň bilen durmuş gurup, hakyky, arassa söýginiň nämedigine soň düşündiňem-le...
Maral ikimiz ýokary bilim aldyk. Senem onunjy synpy tamamlap, ýokary okuwa ýerleşdiň-de, soňundan okap ugruň bolmady. Ahyram okuwyňy taşlap, oba gaýtdyň. Görüp otursak, seniň hünäriň eliňde eken. Agaja dil bitirýärdiň. Ýasaýan aýna-gapylaryňy görüp, haýran galardyk. Jaý ussasydyň. Kerpiçleri nagyşlap örüşiňi synlanlar «Bä, tüweleme!» diýerdiler. Alla tarapyn berlen şol hünäriňem saňa at-abraý, rysgal-bereket getirdi.
Uzakda ýaşamsoň, atam öýüne baran wagtym biz doganlar bolup üýşýäris. Mesawy gürrüň edip oturan wagtymyz sen şo-ol öňki çaga häsiýetiň bilen gelip, dyzymyň üstüne kelläňi goýup ýatardyň. Saçyňy sypalap, kelläňi owkalap bermegimi islärdiň. Soň-soňlar beýtmäňi goýduň. Belki, töweregiňden çekinensiň, belkem ulalansyň. Ýöne häsiýetiň welin üýtgänok. Şol mähremligiň, sadalygyň, ynanjaňlygyň. Seniň baryňa şükür, dogan. Seň barlygyňda göwnüm doly, arkamda dag bar ýaly duýýan özümi. Sen bize hossar, howandar, bize sen gerek, mähriban dogan!
Keýik AHMEDOWA.
Arhiwiň ýagdaýy
● Doly tekst
● 7/7 teswir saklanypdyr
Ýazylan saýty: ertir.com · Çeşme: Web Archive nusgasy — ertir.com, 10 maý 2012 ý. · Asyl sahypany gör ↗
Teswirler 7
gowy ekeni haladym
paylashanyn ucin sagbol
Gowja oylanma!
Yone menin oglan doganymam yok oglan jigimem yok! Joralarmyn,tanyshlarmyn yanynda oglan doganymyn yokdugyny aydyp zeyrenemde koplen shukur et diyyadiler! Shukur edyan gyz jigilem bar olar bolmasa name ederdim!
AAAAAAAAAAAAH DURMUŞ AAAAAAAAH HEMME WAGYT YASHAYAR
KÖP GÖZEL ANYLAR
Gynandyryjy
Ellerine saglyk...
kyn gorman yazanyng un sag bol.👍