Degişmeler

                                       *     *
Aldajy gyş günleriniň birinde bir ýolagçy tanşynyňkyda düşläpdir diýýä. Ýatyljak wagty öý eýesi myhmanyna:
- Şepe, şü possuny ýorganyň üstünden ýapynypjyk ýataýgynyň, üşemersiň - diýipdir.
- Aýyrsana, how, it bilen ýatan ýaly edip - diýip, myhman titisiräpdir.
Daňdan öý eýesi turup görse, myhmany hababaýlap, iki bükülip, üşäp ýatyr diýýä. Onsoň ol:
- Myhman, üşeýän bolsaň, üstüňe şu possuny ataýaýyn - diýipdir.
- Wah, adyny tutma-da, tapan-tupanyňy atybersene!
 
                                       *     *
Öňem gümbaşyň biri bazara gitmekçi bolupdyr. Bazarda azaşaýmaýyn diýen gorky bilen biline suw kädiň döwügini dakypdyr. Munam garagol bezzadyň biri görüpdir-de, şoňky ýaly kädi döwügini dakynyp, ýola düşýär. Ýaňky gümbaş seredip görse, hol öňdenem bir guşagy kädili barýar. Şonda ol:
- Be-e, hol barýan-a men welin, men kimkäm? - diýip aljyrapdyr diýýä.
 
                                   *     *     *
Öňde-de bir bagşy üç-dört sany ülpeti bilen bir tanşynyňka myhmançylyga barýar. Öý eýesem gadyr edip, bulara ýekeje toklysyny soýup, söwüş edipdir. Ilki bagyr-öýken, soň şor suw, kakmaç, gapyrga çişlik, eti akyp bişen çekdirme, aý, garaz, kellebaşaýak çorbasyna çenli goýupdyr. Bir toklyny durşuna ötükden ötüren bagşy bilen ülpetleri mes bolup, oturan ýerlerinde uklaşyp galýarlar. Ertesi ir bilen öý eýesi myhmanlaryna çaý çekip ugraýar. Şo mahal bagşy:
-Wah, şu wagt meň göwnüm çaý däl-de, oda daglanan täzeje bagyr isleýär-dä - diýipdir.
Gahary gelen öý eýesi:
- Ýok, ýok, oňa ynanmagyn, halypa. Seň ojagaz göwnüň pohuny iýýändir - diýip dillenipdir.
 
                                     *     *     *
Biriniň aýagynyň guragyrysy bar ekeni. Ol baran ýerinde guragyrydan zeýrenip, adamlaryň ýüregine düşüpdir diýýä. Bir gezegem şeýdip zeýrenip ugranda oňa belet bir adam:
- Äl-aýt, ýykdyň-aý, halys. Juda bolmasa, şo guragyryňy, gel, meň demgysmam bilen çalşaýaly, how - diýipdir welin, ýaňky lak bolupdyr diýýä.