Erteleme...

 Entäk dogan wagtyň düşünmelidiň her başlangyjyň bir soňy bardygyna. Wagty gelende geldiň aramyza we perdeler açylandan soň geldiň sahnamyza, dogduň, gözüňi açdyň ýagty ýaly görünýän, bu garaňky jahana. Köp wagt geçmänkä ertelemegi öwrendiň. Aýnap kakaňy az garaşdyrmadyň agzyndan çykjak kaka sözüne. We emedekläp gezdiň birnäçe aý gapdalyňdakylar seniň ýöremegiňe garaşýan wagty. 
 Adam islemese wagt geçip dur. Indi sen ol öýüň çagajygy däldiň. Şeýdip bir ýerlere ýazdyrdylar adyňy. Mugallym geldi gelmedi diýip žurnal doldurýan wagty, sen bu günüm nädip geçer diýen pikir içindediň. Soňky gijä ertelediň her gezek iň kyn iň möhüm egzaminlara taýynlanmagy. 
 Her gün täze planlar etmekden kelläň ýazmakdan barmaklaryň agyryp gitdi. Iň kyn başlangyçlary ertirlere goýduň mydama, saňa bir zat öwretjek bolsa ertirler. Durmuş bu ertelenmeyär. 
 Gidip özgäň ýary boldular, söýüp, söýgüňi açmany ertelän gyzlaryň. Sen bir zatlar pikirlenip otyrkaň otagyňda, arzuwlaryňy ogurladylar zalym ogrylar. Sensiz gijede üşedi seni söýýänler. Sen bolsa, öz gaýgy aladalaryň içinde derleýädiň şo wagtlar. Kelläňde bir topar çylşyrymly mysallar, eden işleriňe puşmanlyklaryň, edip bilmedikleriň bolsa çekiç degýän ýaly urup dur kelläňe. 
 Ýok bolup gidenleri unutsaňda biraz, ýüregiňde ýaradyr şolar bilen ýaşap bilmedikleriň. Durmuşda käşgäleriň peýdasy ýokdur emma käşge bilýänleriňi edip bilsediň. Seňki dogry wagty turup gygyryp, ýalňyş wagtyňda-da sümüp bilsediň. 
 We ejeňe o gülü uzatmak üçin käşgä, käşgä köp garaşmasadyň. Sebäbi güller ejeleriň elleride gözeldir, başyna goýulan o daşyň gapdalynda däl. 
 Ömründen ýitirermiş mydam ertire garaşýanlar. Belki-de bu gün bütün ynsanogluna kömegiň deger. Aýdyp oturma bilýän, bir gün senem gowy ýaşarsyn. Ýöne eger sen şol güne çenli ýaşasaň. Sen maňa düşüneňok dosdum. Durmuşy erteläp bolanok. Biwagt we taýyn däl wagtyň tutar bir gün ýakaňy ajal. Yzyňdakylary göz ýaşyna gark eder ol gün. Ýene saňa ýüzlenýän dostum bugünki ýaly wagtyň bol bolmaýa ertirem. Wagtyň soňky demiňi bermäge zordan ýeter ertirlerde-de. Ýuwaş-ýuwaş gözüň ýumulup başlar, entäk öňüňde bir süri etmeli işleriň sanawy duran wagty. Sowuk teniňden bilerler gaýdyp gelmejegiňi. 
 Gaýrat et, gaýrat et garaşma indi ýekeje bolsada ýagşylyk etmäge we garaşdyrma hiç kimi.
 Ömür bu ertelenmez...