Ezizowyň emri bilen...

Biz soňky pellämiz güýjümiz jemläp,

Jepa çekip, ör boýmuza galypdyk,

Ahmyr bilen; 

                    "Bu durmuşy ýene bir

kerpiç beýgeldäýsek!" - diýip ölüpdik...

..."Gyzlaryma" atly goşgyny ýazan Gurbannazaryň öz şahsy durmuşynda hem bir uly arzuwy bardy. Ol  dört gyzyndan soň ogla garaşyp, ogul arzuwyny edýärdi. Ogul bolsa, onuň adyna "Serdar" dakmak niýeti bardy (Serdar kakasy ýogalanynyň aý ýarym yz ýany dünýä indi, onuň adyna "Gurbannazar" dakylmaly boldy).

Beýle diýsem, Gurbannazar gyzlaryna mähir-mylakatsyz ýa göwnüçökgün bolandyr öýütmäň: gyzjagazlaryny onuňky ýaly apalaýan, gowy görýän kaka az-azdy. Gurbannazar körpe gyzy Ogulabat hakda käte şeýle diýerdi: "Şu Olakga bir zady gizlese - çilim bolsun, galam bolsun, - özünden başga ýeke adamam, hatda ЦРУ-nyň işgärleri gelse-de, tapmaýar ony şu öýden... Baý, munuň ýeserjedigini!"...

Dört gyzym, dört nury didäm,

Gulak goýuň sözlerime:

Dört ogul deý, dört iner deý

Kuwwat beriň dyzlaryma...

Hawa, bu setirler onuň gyzlaryna bagyşlan goşgularynyň birinden alyndy.

Şahyryň galamdaşy Amanmyrat Bugaýewiň aýtmagyna görä, "Gyzlaryma" atly bu şygyr şahyryň iň soňky okan şygry eken. Ezizowy şol komandirowka gidişlikde 1975 - nji ýylyň 28 - nji sentýabr güni Krasnowodsk raýonynyň Gyzylsuw obasyndaky sekizinji mekdebiň okuwçylary, mugallymlary el çarpyp, gaýta - gaýta goşgy okamaly edipdirler. Ol hem hemişeki okaýan goşgularyny boldum edip, çykyşynyň ahyrynda şu goşgusyny okapdyr:

Ýigit kimin, bir är kimin

Iliň - günüň hoşy boluň,

Adyňyz - abraýyňyz bilen

Bir hataryň başy boluň.

Oguldan ýanyp ýörenler

Çeke - çeke ahy - zary,

Diýsin, sizi ýüze sylyp:

"Wah, gyz dogsa bolmaýarmy!"

Bu ýagdaýlary men şahyryň "Uzak ýaýlada enäniň hüwdüsi" atly goşgusyny agzamak üçin aýdyp otyryn. 

Eýýäm güneş batypdyr,

Aý-da agyl atypdyr,

Garagolja Serdarym

Süýji uka batypdyr...

Erkek adamyň hiç mahal-da aýagynyň başam barmagyna sallançagyň bagyny orap, el işiniň arasy bilen bäbek hüwwalap oturanyny gören ýokdur. Ýöne şeýle-de bolsa, bu hüwdüden Gurbannazaryň "öz sesi" eşidilýär. Bu onuň şahyr ýüreginden çykan hüwdüsi, folklor zanrynyň formasyna "gizlenilip" beýan edilen iň arzyly sözleri.

Şahyryň şu bentde ulanan ("beren sütemlerin hiç kimse bilmez"!) çeper tärlerine nazar aýlap göreliň.

Ezizow turuwbaşdan öz "garagolja Serdaryna" älem soltanynyň özboluşly alamatlaryny berip, ony şeýle bir romantiki belentlige göterýär welin, bary - ýogy oýnam setirde (on bir sözde!) zeminiň täji ynsan balasynyň juda nepis, iňňän şahyrana portretiniň gizlenip ýatandygyny okyjylaryň birentegi birbada aňşyryp - da ýetişmeýärlermikä diýýärin.

Ynha mysal. Näme üçin "GARAGOLJA Serdarym"?

Sebäbi. Ol uzakly gün, içerini bazar eýläp, bir ýerde durmandyr-emedekläpmi, "ýörjen-ýörjen" bolupmy, ASMANDAKY GÜNEŞ ÝALY hemmäniň kalbyna mähir, ýüzüne nur saçyp, süýşüp-aýlanyp ýörüpdir. Indi ýatypdyr.

Onuň bolupjyk ýatyşyna-da bir serediň - "Aý-da agyl atypdyr!" Asmanda Aý agyllanynda, nähili bolýanyny biz bilýäris ahyry... Eýsem, bu ýerdäki "agyl atmak" gepiň ýa "kapiýanyň gerdişine" getirilen sözlermidir? Aý agyllanynda, onuň daşyna gadym ýagşyzadalaryň, pygamberleriň roýunyň daşyndaky ýaly kümüşsöw nimf - keramatly halka aýlanýaraa: külli Ýewropanyň (Aziýanyňam!) buýsanjy bolan ikonalary ýada salaýyň!

Ine şu nimfiň (agylyň) içindäki asmanyň Aýyna meňzeş nurana roý hem - sallançakda "süýji uka batan" Serdarjygyň roýy - ýüzi-dä!.. Ol sende, ünsli okyjyda, hut şeýle assosiýasiýany döretmeli...

Annaberdi Agabaýew.