Gözellik we sagdynlyk

Gözellik diýilse, gelin-gyzlaryň arasynda diňe ýüz-gözüne, daş keşbine, geýim-gejimine üns berip oňýanlary-da duşaýýar. Ýöne bu nadogrudyr. Çünki adamyň her bir synasy gözel bolanda, hakyky gözellik sazlaşygy emele gelýär. Gözellik we sagdynlyk rubrikamyzyň şu gezekki sahypasynda biz aýaga edilýän ideg barada gürrüň açmakçy.

Ökjäniň ýarylmagy, megerem, hemmeler üçinem ýakymsyz hem-de betgelşik ýagdaý bolsa gerek. Ökjesi ýarylan adam özüni birahat duýýar, aýagyndaky yza zerarly agsabrak ýöremeli bolýar, jaýryklary biri göräýse, yzyndan özüni oňaranok diýlen gep ediläýjek ýaly pikirde gezip, ynjalykdan gaçýar. Onsoňam, ökje jaýryklaryndan bedene infeksiýanyň geçmeginiň ahmaldygyny hem unutmaly däldir. Geliň, ilki bilen ökjede jaýryklaryň näme sebäpden emele gelýändigini seljereliň. Ökjäniň ýarylmagyna:

1. Deri keselleri (neýrodermit, psoriaz, süýjibaş, dermatoz) hem-de ökjäniň derisiniň kömelejikler (gribok) arkaly zeperlenmesi (bu ýagdaýlarda lukman gözegçiliginden geçmeli);

2. Süýji keseli;

3. Galkan şekilli mäziň işiniň bozulmagy;

4. Aşgazan-içege ýollarynyň funksiýasynyň bozulmagy (meselem: aşgazan sowuklamasy);

5. Bedende A hem-de E witaminleriniň ýetmezçiligi;

6. Sintetiki süýümlerden dokalan jorap, dar köwüş, pes ökjeli şypbyk geýmek ýaly ýagdaýlar sebäp bolup biler. (Pes ökjeli şypbyk her gezek ädim ädilende, ýeri tozadyp, ökjä hapanyň siňmegine getirýär).

Ökje ýarylmagy ýaly ýagdaý emele gelende, deri keselleri lukmanyna ýüz tutmaly. Deride hiç hili kem (deri kömelejikleri, infeksiýa) ýok bolsa, onda endokrinologa görnüp, degişli bejergileri almaly. Eger-de ökje ýarylmagynyň sebäbi hiç hili kesel bilen bagly bolmazdan, aýaga edilýän nädogry ideg sebäpli ýüze çykan bolsa, onda oňa öý şertlerinde ýapgylar, bugly hammamjyklar, deri iýmitlendiriji hem-de gurplandyryjy emleri etmeli. Munuň üçin degişli kremler, dermanlyk otlar, ösümlik ýaglary, hat-da miwedir bakja önümleri hem peýdaly bolup biler.

Ökje jaýryklarynyň galyň gatlaryny aýyrmak üçin ilki bilen aýak üçin niýetlenen hammamjyklary ulanmaly. Onuň dowamlylygy 10-15 minut bolmaly. Hammamjykdan soňra, ökjäni ýörite aýak üçin niýetlenen çotga ýa-da daş bilen gyryp, deriniň ýumşan gatyny usullyk bilen aýyrmaly. (Deri ýumşakka aýak arassalaýjy serişdeleri güýçli basyp ulanmaly däldir. Sebäbi deriniň näzik ýerlerine şikes ýetip, olaryňam, soňy bilen gatamagy mümkin). Şu çäreden soň aýaga krem ýa-da degişli ýapgylary çalmaly.