Ýatlamada galan enemiň sözleri. (Oýlanma)

Çagalykdan galan bir ýatlama. Anyk doly beýan ederden kynrak çemeli, çünki ýatlamada gepleşigimiziň diňe öňi hem-de soňy galypdyr. Myhman otagynda otyrys. Enem hem-de men. Penjiräniň öňünde, atlaryny her näçe synanyşsam-da, öwrenip bilmedik güllerim bar. Daşarda bütin sesine gygyrýan satyjyny hasaba almasak, töwerekde sessizlik höküm sürýär. Adam näme satýar, düşünmeýärin. Bilesim hem gelmeýär, bedenimde bolsa maňa nätanyş bolan ýadawlyk bar...
Öňümizde çäýnekdir käse dur, emma çaý içmeýäris. Çaýym eýýäm sowan borly. Ýüregimem gysýar. Näme bolupdyr, nämä gynanypdyryn ýadyma düşenok, emma ýüregim daglanypdyr şony bilýärin...
Enem pyşyrdap, şu sözleri diýýär: "Allatagala guluny synagdan geçirermişin. Her bir işde haýyr bardyr. Allatagala öz söýen guluny hasam beter synarmyşyn..." Synagdan geçmek islemän, kynçylyga döz gelmeýän çaga ýüregim bilen: "Nämüçin synagdan geçirýärkä?" diýip soranym ýadymda. "Yşygyň gymmatyny bilmekleri üçin, Allatagala ilki bilen guluny garaňkylykdan geçirer, şondan soň bolsa ýagtylyga çykarar..." "Bor-la welin, men yşygyň gymmatyny bilýärin ahyryn" diýip, garşylyk görkezipdim. Şeýle-de bilýän zadymy bilmek üçin synaga mätäç däldim ahyry. Enem ýylgyrdy-da: "Bilýänsiň gyzym,emma gözleriň birden ýagtylyga açylanda, bir kör kimin yşygyň gözelliginiň gadyryny bilermiň? Kyn pursatlarda ýüregiňi päk tutmagy başarmalysyň... "
Şol wagt enemiň sözleri täsir eden bolarly. Uzyn gün kör ýaly ýaşasam, gözümi açanymda, yşygy başga gözler bilen görerinmikäm diýen umyt bilen, gözlerimi ýaglyk bilen daňyp, garaňkyda ýaşajak boldum. Uzyn gün öňüme çykan zatlary süsdüm ýördüm, emma agşam golaýlanynda bu oýundan irdimde, tapyr-tupur akylym başga zatlara bökdi we basymjak bu bolan gepleşigi-de unutdym. Ençe ýyllap unutdym. Unutdym, emma welin geçen hepde täzeden ýadyma düşdi. Şol çagalykda bolan wakanyň täzeden ýadyma düşüşi, neneň geň. Ýatlaýaryn, sebäbi ömrümiň iň kyn hepdelerinden birini arka taşlapdym...
Şol jümleler ýüregim gysyp, ýüregimde iňkis galanda, ýadymyň bir çüňkünden çykdy-da geldi. Göwnüm synyk halda, şol jümleleri içimden gaýtalaýaryn... "Allatagala guluny synagdan geçirermişin. Her bir işde haýyr bardyr. Allatagala öz söýen guluny hasam beter synarmyşyn..."
Käte Adam hasaplap ýüregimiziň töründe orun berenlerimiz, sözleri bilen ýüregimize ýara salyp bilýärler.. Ýegenim: "Nädip adam bolmaly?" diýen soragyna nädip jogap berjegimi bilmedim. Ahyry ak list aldym-da Elip, Dal, Mim harplaryny ýazyp, adam diýip ýazdym. "Diňle indi, Elip harpy dik duran adama meňzeşdir, görýärmiň.. soňra Dal harpy epilip duran adama, Mim bolsa sejde edip oturan adama meňzeşdir. Biz esasy şulary ýerinde ýetirmegi başarmaly, ondan soňra bolsa.. Eh, sen entek ýuwaş-ýuwaş öwrenersiňem-le, howlukma hany.." diýdim, çünki bu ýaşda oňa bu zatlary düşündirmek kynrakdy... We başga mysallar bilen düşündirip başladym. Käteler meň özüm Adam sözüniň elip harpynabir degýänmikäm diýýärin. Ýa-da şol harlaryň hiç birine hem degmeýänleri depäme çykaryp, gara gaýgy bolup ýörünmikäm...