Goşgular
Öpüji bolma
Köňlüm, menem saňa joşaýyn öwüt:
Hiç atyňy ýeke çapyjy bolma.
Kişi maşgalasy - in mukaddes zat,
Päliň azyp, gözün gypyjy bolma.
Il içre gezeniň görülmesin geň,
Ýa utul, ýa-da ut - bolma deňe-deň.
Atyş, tutuş, duşmanyňy özüň ýeň,
Özgäň ýykanyny depiji bolma.
Imandan geçseň geç, geçme aryňdan,
Ýaşa oňňut edip golda baryňdan.
Bir kemçiniň göwni üçin ýaryňdan
Yrsarap, bahana tapyjy bolma.
Rysgyňy iýjek bol halal saçakdan,
Hiç mähre garaşma sowan gujakdan.
Başarsaň sypjak bol okdan, pyçakdan,
Ýöne adalatdan sypyjy bolma.
Nebis köli kenaryny ýykmasyn,
Eli bilen eden egnin bukmasyn.
Aç öl, emma mesiň oklan lukmasyn
Ýalym-ýulum edip gapyjy bolma.
Manysyz, boş ömri ajal ýolaýsyn,
Ysgalmaýan güller solsa solaýsyn.
Şa däl-de, şalaryň şasy bolaýsyn,
Öňünde dyzyňy epiji bolma.
Iň esasy zady unudypdym tas,
Meň şu haýyşyma pugta gulak as:
Ýüzüňe gara çek, dodagňa köz bas,
Ýöne nadan elin öpüji bolma.
Arhiwiň ýagdaýy
● Doly tekst
● 13/13 teswir saklanypdyr
Ýazylan saýty: ertir.com · Çeşme: Web Archive nusgasy — ertir.com, 2 awgust 2012 ý. · Asyl sahypany gör ↗
Teswirler 13
Sargyt
Başarsaň seýran et ýedi yklyma,
Hiç ýerde kök urma, öz iliňe gaýt.
Gepleseň gepläber keseki dilde,
Ýöne aýdymyňy öz diliňde aýt!
Seňrigini ýygrar düşünmedikler,
Düşünenleň ýaş aýlanar gözüne.
Düwün-düwün, çigin-çigin ýumaklar
Öz iliňden başga nirde çözüler?
Gaýry dilde uruş, söguş, dawalaş,
Ezizim sözüni öz diliňe goý.
Kiçijek bir meýlis - köp dili bilmek,
Öz diliň saklamak - ullakan bir toý.
Diliň däl-de, sözüň gysgasy ýagşy,
Sargydym bar köp dil bilýän adama:
Ne-hä öz diliňde, ne özge dilde
Bir-ä dileg etme, birem aldama.
Goşgularyň awtory Şiraly Nurmyradow
Gowy goshgylar eken sagbol agam! Yene
tapsan yene yaz sheyle goshgylar...
Watan
küýseginde
Agam ýok, gara-da ýok,
Ganam ýok, ýara-da ýok.
Bir
täsin ile düşdük -
Begem ýok, töre-de ýok.
Haýwan adam deňinde,
Adam Hudaý deňinde,
Boýnun sallap duran ýok
Patyşaňam önünde!
Şagal şagal ýerinde,
Gurt ýerinde gurt eken.
Özünde doglan bolsaň
Ýaşalaýjak ýurt eken.
Ýöne biz bir gelmişek,
Azaşyp ýol salmyşak,
Her Täze ýyl toýunda
Aglap dutar çalmyşak...
Daşary
ýurtdan gelen turkmeniň aşgabatly garyndaşy bilen gürrüňi
- Eýesin depermiş semrände eşek.
- Aý, öz eşegmiz-dä, gylaw alýa-da.
- Hany, mertebä-de ýeten ýaly şek?
- Aý, namysdan ölen barmy... Bolýa-da.
- Millet guldan beter ezilýän eken.
- Ýene, şükür... Türme mundan aňsatmy?
- Ynsan hukuklary bozulýan eken.
- O diýýäniň näme? Iýilýän zatmy?
- Gabra itýämişler ýuwaş-ýuwaşdan.
- Göni gyraýmaga çekinerler-dä!
- Saňa nä ýetenok bol-elin aşdan?
- Aý, bir boldum edip çekilerler-dä.
- Duluňdaky saçagam-a boş ýatyr,
- Aý, iliňem bizden artyk güni ýok.
- Alnyňda bahar ýok, diňe gyş ýatyr.
- Aýlawly gürleme... Hiç zat bilemok.
- Öýüň iç-daşam-a kirmi, hapamy...
- Oňa derek asmanymyz arassa!
- Haçan doýurjak ol ýekegapany?
- Aý, iýse iýsin-dä, ýetim neresse.
- Bilýämiň haýwanyň in bir mekirin?
- Goýaly şu gepi... Gözüm çekedir.
- Dur onda... Hudaýyň ikimi, birmi?
- Alla jan ýekedir. Özem tekedir!
* * *
Şöhrat ýöremesin ömrüň öňünden,
Ömrüň hol öňünden abraý ýöresin.
Şöhrat bilen abraý çalyşsa
ornun
Adalat, hakykat kaýdan döresin?!
Aýdylan: «Abraý bir gyrkylan erkeç»,
Bir sypansoň aňsat-aňsat tutdurmaz.
Ol özüne baha keser, özüni
Şöhrat kimin gara şaýa satdyrmaz.
Şöhrada ýetmegiň müň bir ýoly bar,
Diňe ýeke-täkdir abraýyň ýoly...
Geç kerwen deý üýren itiň deňinden,
Bolsun päk arzuwdan gursagyň doly.
Şöhrady gazanýar kimse der bilen,
Kimse ony satyn alýar zer bilen,
Kimse oňa ýetýär ýalbaryp, diläp,
Kim lebini ýalap, guýrugyn bulap.
Abraý – dag başynda mumyýa kybap,
Ret eýlär günäňi, baýdagy – sogap,
Gazansan – aperin! Ýitirseň – nälet,
Senden, diňe senden soralar jogap!
Dik dur dag başynda, ýaýna sährada,
Päliň pes tut, kowalaşma şöhrada.
Mukaddes zat ýokdur imandan beter,
Ony baýdak edip depäňde göter!
goshgylar goni tocka cuyleyami!!!
Her ýyl $ 1,000 baýrak bilen zynjyr alýan şahyrlaryň ählisiniň ýazan şygyrlary bir ýana, bu şygyrlar bir ýanadyr.
Şiralyň bir goşgusy bardy, Täçmämmet Jürdekow hakda:
Tutuş ömürine ýazan eseri
Bapbaň bir şygryna degmeýän nadan!
Bapbaň goşgularyna-da sözüm ýok!
Gaty gowy papylashanyna sag bol
Go$gulara söz yok,paýlasyp durun.
Shahyryn kop setirleri gowy eken.
Mukaddes zat ýokdur imandan beter,Shiraly shahyr Bapbadan gowy diyjek boldunmy ya tersinemi?
Ozam shahyryn kabir yerlerinde pikirler dogry gelmedi oytyan:
Imandan geçseň geç, geçme aryňdan, ****
Ony baýdak edip depäňde göter! ****
Ters gelyan yaly pikirler .
kabir shahyrlaryn goshgysyny gorsem ezizowyn shu
setirleri yadyma dushyar:
yazjak bolsan onat goshgy yazmaly,
onarmasan zayalama syyany....
shu gazetde goryan kabir yazyjysumaklamyn goshgysy
tuys shuna dogry gelyada bara....