BIR goşgynyň BÄŞ terjimesi...

Михаил Лермонтов

ПАРУС

Белеет парус одинокий 
В тумане моря голубом!..
Что ищет он в стране далекой,
Что кинул он в краю родном?..

Играют волны - ветер свищет,
И мачта гнется и скрипит...
Увы, - он счастья не ищет
И не от счастья бежит!

Под ним струя светлей лазури,
Над ним луч солнца золотой...
А он, мятежный, просит бури,
Как будто в бурях есть покой!

ÝELKEN

Agaryp görünýär ýalňyz bir ýelken
Mawy duman içre, äpet ummanda,
Ol näme gözleýär uzak ülkeden?
Näme ýitiripdir dogduk mekanda?..

Tolkunlar oýnaýar, sygyrýar ýel hem,
Gämiň bogaldagy çüýräp, ses edýär,
Ne-hä öz bagtyny agtarýar ýelken,
Ne-de öz bagtyndan baş alyp gidýär.

Astynda tolkunyar gögümtil umman,
Üstünde Kuýaş dur tylla nar ýaly...
Oň pitneli kalby küýseýär tupan,
Gaý-tupanda rahatlyk bar ýaly!

Atamyrat ATABAYEW

ÝELKEN

Deňiz içre ýalňyz ýelken agarýar
Mawy dumanynda umman-derýanyň!..
Ol alys illerde näme agtarýar?
Nämesinden geçdi eziz diýaryň?..

Tolkunlar oýnaşýar, sygyrýar şemal,
Bogaldak jygyldap egilýär barha...
Wah, bagt gözläp tapjak bolanok kemal,
Ýä däl ol bagtyndan gaçgaklap barýar!

Aşakda dury suw göm-gök çüýşe deý,
Üstünde tylla Gün, şugla çar ýany...
Ol bolsa birahat, gaý oň küýsegi,
Tupanda kalbyna aram bar ýaly!

Bäşim ÖDEK

ÝELKEN

Agaryp görünýär bir ýalňyz ýelken,
Mawy deňiz içre, ümür-dumanda.
Ýurdunda ýitiren zadyny, belkem,
Agtaryp ýör ýat ýurtda, ýat ummanda?

Ýel tolkun turuzýar, mertlik hökmandy,
Döwlenokdy, hiç baş berenokdy ol...
Ýok, ol bagtyň gözlegine çykmandy,
Bagtyndan gaçybam ýörenokdy ol!

Gidip barýan ýoly nurana ýoldy,
Sebäbi üstünde ýagty gün bardy...
Ýata suw deý durmuş onuňky däldi,
Ol apy-tupanda rahat tapýardy!

Hemra ŞIR

ÝELKEN

Mawy deňiz dumanynda
Ýalňyz bir ýelken agarýar.
Näme goýduka Watanda
Ýer ýurtlary gözläp barýan?

Tolkunlar oýnaýar ýele,
Bogaldak kä ýakyn, kä daş.
Ol bagtyndan gaçýandan däl,
Ýa-da däl ol bagta ýoldaş.

Depesinde altyn şöhle,
Aşagynda deňiz mawy.
Ol diňe tupan dileýär,
Gaýda rahatlyk bar ýaly.

Bägül ATAÝEWA

ÝELKEN

Ýalňyz ýelken agarýa-la
Göz deňizde duman içre!..
Ýat illerden ne ideýär?
Ýa galdymy yzda didar?..

Tolkun oýnap, şuwlap şemal,
Bogaldak egreldi şumal...
Bagt gözläb-ä uçan däl ol,
Bagtyndanam gaçan däl ol!

Asty ap-ak köpük bary,
Üstü Günüň altyn nury...
Küýseýär ol gaý-tupany,
Gaýda bar deý rahat many!

Şadurdy ÇARYGULYÝEW

Haysy terjime has gowy bolupdyr?

Atamyrat ATABAYEW - 1-nji(55%, 5 adam)

Bäşim ODEK - 2-nji(22%, 2 adam)

Hemra ŞIR - 3-nji(11%, 1 adam)

Bägül ATAÝEWA - 4-nji(11%, 1 adam)

Şadurdy ÇARYGULYÝEW - 5-nji(0%, 0 adam)