ALLATAGALA UKLAMAÝAR

Musa alaýhyssalam hezreti Allatagaladan sorady: - Eý, bar Hudaýa! Sen heý bir uklaýarsyňmy? Derrew Hezreti Allatagala Jebraýyl alaýhyssalamdan iki çüýşe iberip: - Bu iki çüýşäni Musa alaýhyssalamyň eline bergil we zynhar bu çüýşeleri syndyrmagyl diýip aýtgyl - diýdi. Jebraýyl alaýhyssalam çüýşeleri alyp Musa alaýhyssalama getirdi we: - Allatagala bu iki çüýşäni saňa iberdi we zynhar bulary syndyrmagyl diýip tabşyrdy - diýdi. Musa alaýhyssalam ol çüýşeleri eline aldy. Eýse hezreti Allatagala "Bar Musany tutgul" diýip, ukyny iberdi. Uky gelip, Musa alaýhyssalamy tutdy. Onsoň Musa  alaýhyssalam ýykyldy. Çüýşeler elinden gaçyp syndy. Ondan soň hezreti Allatagala sorady: - Eý, Musa alaýhyssalam, çüýşeleri ne üçin syndyrdyň? Musa alaýhyssalam: - Eý, bar Hudaýa! Uky gelip, meni biygtyýar etdi. Men ýykyldym. Şonuň üçin çüýşeler syndy - diýdi. Onda Haktagala aýtdy: - Eý, Musa alaýhyssalam! Sen uklasaň iki çüýşäni hem saklap bilmeýärsiň. Eger men uklasam, on sekiz müň älemi kim saklar? Onda Musa alaýhyssalam aýdan sözüne toba etdi. Patyşa Hojanyň "Gülzar" atly kitabyndan