FiRuZnaMa

Men Buzurjmihrden soradym:
 - Isleýän zatlaryň ählisini özünde jemleýän nämeleri Hudaýdan dilesemkäm?

 - Saglygy, kuwwatlylygy hem howpsyzlygy.

 - Işimi kime tabşyrsam, göwnejaý borka?

 - Soňa mynsyp adama.

 - Men kimden ätiýaç etmeli däl?

 - Saňa göriplik etmeýan dostuňdan.

 - Haýsy zady hiç wagt ýatdan çykarmaly däl?

 - Işe gümrä bolmagy.

 - Haýsy işi ýaşlykda, haýsy işi bolsa garrylykda berjaý etmeli?

 - Ýaşkaň bilim almaly, garrylykda-da ony ile paýlamaly.

 - Adamy özgeleriň öňünde peseldýan zat name?

 - Öz başarýan zatlaryňy mazamlamak.

 - Bigäne dostdan nädip halas bolmaly?

 - Onuň üç täri bar: ýanyna barma, edýän işleri bilen gyzyklanma hem hiç hili kömek sorap ýüz tutma.

 - Işlerimiziň şowuna bolmagy nämä bagly: öz erjelligimizemi ýa-da Allanyň merhemetinemi?

 - Erjelligimiziňem Allanyň merhemetidigini unutma.

 - Nähili häsiýetler ýaşlara, nähili häsiýetler bolsa garrylara mahsus bolmaly?

 - Ýaşlar-a uýatly hem batyr, garrylaram bilimli hem kanagatly bolsa gowy.

 - Kethudalyk kime ýaraşar? Ol nähili ýagdaýlarda özüni arkaýyn duýup biler?

 - Haýyrdyr şeri aýyl-saýyl etmegi başarýan adam kethuda bolup biler. Onuň arkaýynlygy şol işi özi ýaly birine tabşyryşyna bagly.

 - Asuda ýaşamak üçin kimden gaçarak durmaly?

 - Ýaraňjaňlardan hem açgözlerden.

 - Iň jomart adam kimdir?

 - Berenine şatlanýan adam.

 - Dünýäde adam üçin ömürden gymmat zat barmy?

 - Olar üç sany: ynam, söýgi hem Watan!

 -  Biziň hiç wagt bütin dolulygyna eýe bolup bilmejek zadymyz barmydyr?

 - Olar dört sany: saglyk, hakykat, bagt hem ýürekdeş dost.

 - Haýyr iş edeniň gowumy ýa-da şerden gaçarak duranyň?

 - Şerden gaçarak durmak - haýryň özenidir.

 - Ýagşylyk ýamanlyga öwrülip bilermi?

 - Eden ýagşylygyňy diliňe çolamak ýamanlykdyr.

 - Ýigrenji adamlardanam ol-bi zat öwrense bolarmy?

 - Alym-a ýugrenji, ýigrenji adam-da alym bolup bilmez.

 - Bilimi bezeýän zat näme?

 - Dogruçyllyk.

 - Batyrlygyň nähili alamaty bolýar?

 - Rehimdarlyk.

 - Paýhasly adamyň haýsy işi öwgä has mynasyp?

 - Erbetligiň ýoluny kesse.

 - Nähili ýamanlyk has zyýanly?

 - Gizlin edilýäni.

Toplan Kakabaý Gurbanmyradow