Tapmaz sen

Niçe işi akyl bilen jem etseň
Pelek çaşyr bir gün hasap tapmaz sen
Bu jan saglygynda haýyr gazangyl
Ýer astyna girseň sowap tapmaz sen

Munda bir iş etseň sen anda çawly
Sen hem ýagşylardan alawer bowly
Häli bir pilledir eý adam ogly
Aglap-aglap gelseň sorag tapmaz sen

Ýigrimi ýaşynda äriň ne gamy
Ýakar dagy daşy erider demi
Bir gün öter ýigitligiň möwsümi
Alymlar kem bolup edep tapmaz sen

Ýigit bolup gezgil ýagşy at bilen
Bedew münüp gezgil perizat bilen
Ömrüňi ötürgil jemagat bilen
Mesjidi ýykylsa mährap tapmaz sen

Magtymguly görüň niçik joş oldy
Bir käse meý içip jana noş oldy
Ýaranlar sag bolsa bir gün hoş oldy
Her gün käse doly şerap tapmaz sen