HAKYKATY DIKLIGINE GÖMDÜLER

 
Hakykaty gömdüler.
Dikligine gömdüler –
Bir metr aşak,
Bir ýyldan çykypdyr
Kellesin gaşap.

Hakykaty gömdüler.
On metr çuñlukda –
Ýene dikligine.
Hakykat on ýyldan
Çykypdyr ýene.

Hakykaty gömdüler.
Dikligine gömdüler –
Ýüz metr teýde,
Hakykat ýüz ýyldan
Bolupdyr peýda...

Bu işde ýetmezlik bilinmän durmy,
Ýatyryp gömseler boljakdy kemsiz.
Ah, ýöne hakykat şeýle bir keçjal,
Ony nä, ýatyryp, gömüp bolýarmy?!

DÜNÝE

Durky päliwan dünýe,
Görki hüýr-jenan dünýe,
Owsun atyp owadan,
Bagrymy badan dünýe.

Wyjdanla wyjdan dünýe,
Deýýus diýer: ”Şam dünýe”.
Agyz ýarman, Hudaý dek
Baryna çydan dünýe.

Aňlara aýan dünýe,
Parhsyza peýan dünýe,
O ýana – o ýan dünýe
Bu ýana – bu ýan dünýe.

Ýagşysy ýaýran dünýe,
Ýürek dek urýan dünýe.
Adalatyñ ýolundan
Mytdyldap barýan dünýe.

Awtory Bapba Gökleň.