Halkara derejeli eminimiz Begenç Allaberdiýewi tanalyň

2010-njy ýylda geçirilen futbol boýunça dünýä çempionatynda jemi 5 oýuna eminlik eden Rawşan Irmatowy bilýäňizmi? Özbegistanly, häzirki wagtda Aziýanyň iň gowy emini. «Hmmbähh, Merkezi Aziýadanam bular ýaly betler çykýamaý» diýýän bolmagyňyz mümkin. Elbetde, olar ýalylar diňe goňşymyz Özbeklerden däl, hat-da bizden hem çykýar. Şu temamda şeýle eminlerimiziň biri barada öz bilýän zatlarymy paýlaşmakçy.

Halkara derejeli eminimiz Begenç Allaberdiýew 1966-njy ýylyň 15-nji fewralynda Aşgabat şäherinde doguldy. Mundan 15 ýyl töweregi öň Milli çempionatymyzyň oýunlarynda eminlik edip başlady we häzirki wagt çenli hem Milli çempionatymyzda abraýly eminlik edip gelýär. 2000-nji ýylda «Halkara derejeli emin» diýen ady alyp, FIFA, AFC derejesindäki ýaryşlara eminlik etmäge hukuk gazandy we 45 ýaşaýança (Halkara ýaryşlarynda 45 ýaşa çenli eminlik edip bolýar), ýagny 2011-nji ýyla çenli Türkmenistanyň adyndan birnäçe halkara ýaryşlarynda eminlik etdi. Begenç Allaberdiýewiň özi kömekçi emin, ýagny gapdal emin. Halkara ýaryşlaryna hem baş emin däl-de kömekçi emin bolup gatnaşdy.

Gatnaşan halkara ýaryşlarynyň iň ulusy 2005-nji ýylda Germaniýada geçirilen FIFA Confederations Cup ýaryşydyr. Bu ýerde Begenç, toparçalarda oýnalan Argentina-Awstraliýa (4-2) oýnunda gapdal emin bolupdy. Şol oýny özüm TW-da görüpdim. Begenç Allaberdiýew gowy eminlik edipdi.

Confederations Cup ýaryşynyň nähili uly ýaryşdygyny men aýtmamda-da özüňiz hem bilýänsiňiz. Bu ýaryşa diňe saýlama ýygyndylar, ýagny her kontinentiň çempionlary gatnaşýarlar. Muny başgaça «2-nji dünýä çempionaty» diýip hem atlandyrýarlar. Soňky ýyllarda bu ýaryşyň abraýy has hem ýokarlandy. Şeýle abraýly ýaryşa Türkmenistanly biriniň emin bolup gatnaşmagy bolsa, elbetde guwandyryjy.

Begenç Allaberdiýew mundan başga-da 2004-nji ýylda geçirilen futbol boýunça Aziýanyň çempionatyna, şeýle-de 2007-nji ýyldaky futbol boýunça Aziýanyň çempionatyna kömekçi emin bolup gatnaşdy.

Ol halkara ýaryşlardaky 11 ýyllyk karýerasynda bulardan başga-da ýaşlar ýygyndylaryň Aziýa çempionatynda, Aziýanyň Çempionlar ligasynda (AFC Champions League) birnäçe oýunlarda eminlik etdi.

Begenç Allaberdiýew halkara eminlik karýerasyny tamamlandan soň, häzirki wagtda Gökjelileriň «FK Gökje» futbol toparyny türgenleşdirýär. Maşgalaly - bir ogly we bir gyzy bar. Ogly ýalňyşmasam «Talyp Sporty» komandasynda futbolçy öýdýän. Begenjiň Batyr Allaberdiýew diýip dogany bar, olam futbol adamsy, ýagny tälimçi.

Başga-da birnäçe Halkara derejeli eminlerimiz bar: Çarymyrat Gurbanow, Kakabaý Seýidow, Mämmet Mämmedow, Bagtyýar Atajanow, Igor Barabaş, Raşid Pälwanow, Maksat Seýitgulyýew, Berdimyrat Nyýazdurdyýew, Allabergen Sapaýew.. Bular hem Aziýanyň dürli derejeli ýaryşlarynda gatnaşan Türkmen eminlerimiz. Nesip bolsa maglumat tapsam bular barada hem temalar açaryn.

Goşmaça: Bu gün gije El Clásico bar. Gyzykly oýun bolar, görüp bilseňiz görüň.

Bu gün «El Clásico» bar. Haýsysy utmaz?

Barcelona(33%, 3 adam)

Real Madrid(55%, 5 adam)

Deňme-deň(11%, 1 adam)