Messi dünýäniñ iñ gowy futbolçysy adyny aldy.

Sýurihde 2011-nji ýylyň
futbolçylaryna baýraklaryň
gowuşyrylyş dabarasy boldy.
Onda ”Barselona” futbol
toparynyň we Argentinanyň milli
ýygyndy toparynyň oýunçysy
Lionel Messi ”Altyn top”
baýragyny indi basa üç ýyl yzly-
yzyna aldy.
”Altyn top” her ýyl dünýäniň iň
gowy futbolçysyna berilýän iň
ýokary baýrakdyr. Mundan öň
bu baýragy üç gezek: Mişel
Platini, Ýohan Kroýff we Marko
wan Basten dagy almagy
başarypdylar. Ýöne häzire çenli
”Altyn topa” üç gezek yzly-
yzyna diňe Platini eýe bolup
bilipdi.
2011-nji ýyl boýunça ”Altyn top”
baýragyna Portugaliýanyň milli
ýygyndy toparynyň we ”Real
Madrid” komandasynyň
hüjümçisi Kriştianu Ronaldo,
şeýle-de Ispaniýanyň we
”Barselona” toparynyň
oýunçysy Hawi dagy hem dalaş
edipdi. Ýöne baýraga esasy
kandidatlar Messi we Kriştiano
Ronaldo hasaplanýardy.
Messi bilen Kriştiano Ronaldonyň
klub derejesinde geçiren
oýunlaryndan çen tutusla, onda
portugaliýaly oýunçy özüniň
argentinaly kärdeşinden diňe bir
gezek üstün çykmagy
başarypdy. Geçen ýyl
Ispaniýanyň kubogynyň final
oýnunda ”Real” ”Barsadan”
üstün çykypdy. Şol duşuşykda
toplaryň birini Kriştiano Ronaldo
urupdy. Eger Ispaniýanyň
çempionaty nazaryndan
seredilse, ol Messä görä has köp
top geçiripdi. Ýagny, Kriştiano
Ronaldo 21, Messi bolsa, 17 top
urmagy başardy.
Ýöne 2011-nji ýylda ”Barselona”
Ispaniýanyň çempionatynyň we
Çempionlar Ligasynyň ýeňijisi
bolmagy başarypdy. Çempionlar
Ligasynyň çäklerinde
”Barselona” ýarym-finalda
”Realy”, finalda bolsa ”Mançester
Ýunaýtedi” utmagy başardy. Şol
duşuşyklaryň ikisinde hem Messi
gol geçiripdi.
Ýylyň iň gowy tälimçisi bolsa
”Barselonanyň” treneri Hosep
Gwardiola boldy. Eger-de
komandanyň gazanan
üstünlikleri göz öňünde tutulsa,
onda onuň bu baýraga mynasyp
görülmegi asla geň däl. Bu
baýrak ugrunda Hosep
Gwardiolanyň bäsdeşleri
”Realyň” treneri Žoze Mourinio
we ”Mançester Ýunaýted”
komandasynyň köp ýyllyk
treneri Aleks Fergýussen boldy.
Mourinio ”ýylyň iň gowy
tälimçisi” diýen ady geçen ýyl
alypdy. Fergýunson bolsa FIFA-
nyň başlygy Zepp Blateriň ýörite
baýragyna mynasyp boldy.
Fergýussen ”Mançester
Ýunaýtede” 25 ýyl bäri trenerlik
edýän döwründe komanda
Çempionlar Ligasynyň iki gezek
we Angliýanyň 12 gezek
çempiony bolmagy başardy.
2011-nji ýylda iň gowy goly
salan ”Santos” komandasynyň
oýunçysy braziliýaly Neýmar
diýlip yglan edildi. Ol ”Ferens
Puşkaşyň” adyndaky baýragy
aldy. Bu baýrak ugrunda
Neýmera esasy garşydaş
”Mançester Ýunaýted”
toparynyň oýunçysy, iňlis Ueýn
Roni boldy.
Dünýäniň iň gowy futbolçy
aýaly bolsa Ýaponiýanyň milli
toparynyň oýunçysy Homare
Sawa boldy.

Çe$me: www.azathabar.mobi