X planetasynyn hekayaty

Býuronyñ agzasy dodaklaryny eliniñ arkasy bilen süpürip, myhmany utandyrman, dowam etdi.
  – Adamlar öwlüýä bilen döwletden gorkmasalar, onda başbaşdaklyga garaşyber. Gabrystanlyk diýmek näme? Bu taryh, däp-dessur, tejribe! Ýurduń binýady bu üç läheńe daýanmasa, onda ol islendik ötegçi şemala hallan atar durar. Heý-de, biz muña ýol berip bilerismi? Ýok. Gabrystanlykda biziñ milli döwlet gurluşymyzyñ
esaslary ýatyr. Biz döwlet dolandyrylyşynda öz halkymyzyñ geçmişini döredijilikli peýdalandyk. Netijede ýurtda ilki “Üç Ýyllyk Gümbaşlyk”, soñra “Bäş Ýyllyk Ümsümlik”, indem “On Ýyllyk Asudalyk” yglan edildi; olam kem-kemden “Ählumumy Baky Dymyşlyga” ösüp geçmeli. Bu syýasat eýýäm öz miwesini berdi: ýurtda dymyşlyk edil gonamçylykdaky ýaly çuñ we ol mundan beýläk-de çuñlaşdyrylar. Bu jenap ýoldaş Prezidentiñ geçiş döwri üçin işläp düzen öñdengörüji parasatly Programmasy; özümiz üçin näçe kemsidiji bolsa-da, men Býuro agzalarynyñ-da ýurduñ ösüş programmasynyñ detallaryndan habarsyzdygyny boýun almalydyryn – bu döwlet syry.

– Jon Lennon diýýäniñ kim bolýar? – diýip, jenap ýoldaş Prezident alada galyp sorady. – Olam Ýazyjylar guramasynyñ agzasymy?
  – Ah, jenap ýoldaş Prezident! – Hyrly Durgur badamjan dodaklaryny süýjedip ýalady. – Siz niçiksi hoşniýetli adam! Siz öz merhemetiñizi bütin dünýä çaýmaga höwesek. Eger-de Jon Lennon diri bolan bolsa, bu günki gün, gör, ol niçiksi sylaga ýetjek ekeni! Onuñ siziñ eliñizi öpmegi özüne bagt saýjagyna men birjik-de  şübhelenemok. Arman, ol iñlis öldi. Meniñ poemam siziñ ölmez-ýitmezligiñize bagyşlanan, Jon Lennon bu ýerde ýöne bir perde,  şol perdäniñ añrysynda Siziñ gahrymançylygyñyz ýaýbañlanýar!

Men size bir Gündogar tymsalyny aýdyp bereýin – meniñ öler aşym Gündogar tymsallary – olarda bize gerek parasat bar. Hawa, ana onsoñ, ýañky aýdyşym ýaly, ir döwürde Ependi gawun ogurlygynda garawula üstüni gapyl basdyrypdyr. Sypara ýer galmansoñ, ol çermegini sypyrypdyr-da, beýlesindäki sygyr lapbyjyñ üstünde çommalyp oturyberipdir. Añyrdan gelen garawul muny görüp: ”Ýeri, molla Ependi, günortanyñ garañkysynda bakjada sümsünip ýörmäñ näme?” diýip herrelende, ol: ”Men meýdan edip otyryn” diýip çyglypdyr.
”Onyñ sygyr lapbyç ýaly-la” diýip, garawul onuñ üstüne abanyberipdir welin ol: ”Eýse, sen nä maña adam  şekilli meýdan etmäge wagt berdiñmi!” diýip, aşakdan ýokaryk onuñ üstüne herrelýärmiş.
Biz öz ýurdumyzda demokratiýany ýokary depginde gurýarys, ynanmarsyñyz, iş şeýle bir gyzgalañly gidýär welin, hatda käte gülüp kese ýykylaýmaly zatlar bolýar. Ine, meselem, bizde eýýäm ösen demokratiýanyñ bardygyna garamazdan, entek özümize demokratik partiýanyñ biledinem çap edip ýetişemzok.