AFC Asian Cup 2015-e barýan ýoldaky garşydaşlarymyz belli boldy

Giç ýagşy futbol fanatlary.

Ilki bilen tema başlamankam täze ýyl üçin azajyk dileglerim bar. Bilýänsiňiz, geçen ýyl-a türkmen futboly üçin ýaman pese düşüşlik ýyly bolupdy. Täze ýylda dilegim, türkmen futbolymyz üçin bu ýyl bir geçen ýyl ýaly biderek ýyl bolmasyn. EnşAlla futbolymyzda öňe gidişlik ýyly bolar diýip umyt edýän.

Ýeri bolýar, geleýin tema. 2011-nji ýylyň dekabr aýynda AFC-nyň (Asian Football Confederation) Kuala-Lumpurdaky ştab kwartirasynda bolup geçen bije çekilşikden soň, AFC Challenge Cup 2012-niň final tapgyrynyň toparçalary belli boldy. 2011-nji ýylda Aziýanyň yzagalak 20 Milli ýygyndysynyň gatnaşmagynda Şri-Lankada geçirilen saýlama oýunlardan soň final tapgyra galmagy başaran 8 Milli ýygyndy, mart aýynyň 8-19-y aralygynda Nepalda geçiriljek final tapgyrynda 2 toparçada çykyş ederler.

Bije çekilşigiň netijesi boýunça Ýazguly Hojageldiýewiň tälimçiligindäki Milli ýygyndymyz A toparça düşdi. Toparçalar şeýleräk:

A toparça
Nepal
Türkmenistan
Maldiwler
Palestina

B toparça
KHDR
Hindistan
Täjigistan
Flippinler

Milli ýygyndymyzyň geçirmeli duşuşyklarynyň tertibi:
8.03.2012ý. Türkmenistan - Maldiwler
10.03.2012ý. Palestina - Türkmenistan
12.03.2012ý. Nepal - Türkmenistan

1/2 Final:
16.03.2012ý. Toparçalarda 1-nji we 2-nji orny eýelänler.

Final:
19.03.2012ý. 1/2 finalyň ýeňijileri.

Şu ýerde esasy bellemeli bir zat bar. Ýaryşda ýeňiji bolan Milli ýygyndy 2015-nji ýylda Awtraliýada geçiriljek futbol boýunça Aziýanyň çempionatyna gatnaşmaga hukuk gazanar. Şol Asian Cup 2015-e barýan ýoldaky garşydaşlarymyza ýokarkylar. Toparçamyzdan-a kynçylyksyz çykarysmykak diýýän (Çykaýmalam!). Biz üçin esasy kyn oýunlar 1/2 finalda hem-de finalda (eger çykyp bilsek) bolar.

Ýadyňyza düşýän bolsa, AFC Challenge Cup 2010-da biz finalda KHDRlylara penaltylardan soň 5-6 ýeňilipdik we Asian Cup 2011-e gatnaşmak mümkinçiligimizi soňky pursatda ýitiripdik. Nesip bolsa bu ýyl şeýle ýagdaýyň gaýtalanmagyna ýol bermeris diýip umyt edýän. AFC Challenge Cup 2012-ni ýeňeris we Asian Cup 2015-ä gatnaşarys. Nesip bolsa.

Bu ýaryşyň duşuşyklary Nepalyň Kathmandu şäheriniň 3000 adamlyk "Halchowk" stadionynda hem-de 25000 adamlyk "Dasarath Rangasala" stadionynda geçiriler.

Indi şu ýaryş barada azajyk durup geçmekçi. Şu ýylky ýaryşy geçirmek üçin Maldiwler, Nepal hem-de Palestina döwletleri isleg bildiripdiler. Hany biz? Näme üçin biz isleg bildiremzok? Mümkinçiligimiz ýok diýmäň. Mümkinçiligimiz aňryýany bilen bar. Nädip diýýäňizmi? Ýaryşy geçirmek üçin Aşgabat şäherinde 25000 adamlyk "Aşgabat", 28000 adamlyk "Köpetdag", 30000 adamlyk Olimpiýa stadionlarymyz bar. Ýa bolmasa her welaýatymyzda 10000 adamlyk gowy stadionlarymyz bar. Geljek myhmanlary dowolnyý edip biljek myhmanhanalarymyz bar. "Futbol bolýarmyş.." gürrüňini eştseler stadionlara ylgap gitjek türkmen futbolfanatlarymyz bar. Hawwa, hemme zadymyz baram welin, şonda-da biz şu ýaryşy özümizde geçirip bilemzok, iň bolmanda geçirmek hem islämzok.

Şu surata serediň. AFC Challenge Cup 2012-niň finalynyň oýnaljak 25000 "Dasarath Rangasala" stadiony.

Indi ýokarky suratdaky stadiony öz stadionlarymyz bilen deňeşdiriň.

Biziňkiň kem zady barmy? Elbetde ýok. Şonuň üçin bular ýaly derejeli ýaryşlary geçirmek üçin bizde mümkinçilik köp. Diňe isleg ýok.

Bu ýyl 4-njisi geçirilýän AFC Challenge Cup 2006-njy ýylda Bangladeşde (Ýeňiji: Täjigistan), 2008-nji ýylda Hindistanda (Ýeňiji: Hindistan), 2010-njy ýylda bolsa Şri-Lankada (Ýeňiji: KHDR) geçirilipdi. Bu ýaryşy AFC özüne degişli futbolda yzagalak döwletler üçin her 2 ýyldan gurnaýar. AFC Challenge Cupyň nobatdakysy 2014-nji ýylda bolmaly. Hany nesip bolsa şony özümizde geçirip bilmerismikäk. Wahh, bizem şu ýaryşy özünde geçirýän döwletlerden kem ýerimiziň ýokdugyny biläýsekdik-dä..

Oglanlarymyza-da üstünlik arzuw edýän. Asian Cup 2015-e barýan ýolda yza ýol ýok, diňe öňe oglanlar!