2011-nji ýylda Türkmenistanda bolup geçen, halkyň dilinden düşmedik esasy wakalar haýsylar?!

Salam hormatly agzalar.
Ana, ýene bir ýylymyz edil öňki 2010 ýylyň bir-birine hatar gurap geçişi ýaly geçip gitdi. Bosagamyzda bolsa, täze 2012-nji ýyl, luw ýyly. Soňky hepdesine gadam basan şu 2011-nji ýylymyz herkimiň aňynda bir ýatlama bilen galandyr. Kimler üçin gowy, kimler üçin erbet ýyl bolandyr.

Şu temada geçip barýan 2011-nji ýylda Türkmenistanda bolup geçen, halkyň dilinden düşmedik esasy wakalar barada öz bilýänlerimizi ýazalyň. Mysal üçin nähili wakalar ýazmaly diýjekleriňiz bar bolsa, 2010-njy ýylda Türkmenistanda MTS-iň ýapylmagy, Nury Meredowyň aradan çykmagy ýaly wakalar halkyň dilinden düşmändi. Ana şolar ýaly.

Özüm sport bilen gyzyklanamsoň 2011-nji ýyldaky Türkmen sporty barada azajyk durup geçmekçi.

Ýanwar aýynda Türkmenistanyň futbol boýunça çempiony Nebitçi GDA döwletleriniň çempionlarynyň futbol ýaryşyna gatnaşdy we toparçasynda 0 oçko bilen iň soňky boldy. Bu ýaryşa soňky ýyllarda Türkmenistan, Täjigistan, Gyrgyzystan ýaly döwletleň klublaryndan başgalar komandaň dublyny eltýärler. Biz esasy düzümi iberemizde-de hemmeden yzda. Masgaraçylyk!

Mart aýynda Aziýanyň Sambo federasiýasynyň goldamagy bilen Sambo we Söweş sambosy boýunça Aşgabatda Merkezi Aziýanyň çempionaty geçirildi. Gaty bir uly ýaryş-a däl welin, başlangyç üçin erbedem däl.

Mart-aprel aýlary futbol boýunça Milli ýygyndymyz Şri-Lankada AFC Challenge Cup 2012-ä gatnaşmak üçin saýlama oýunlaryny oýnapdy. Şonda ýygyndymyz üstünlikli çykyş edip, AFC-nyň pes derejeli Milli ýygyndylar üçin gurnaýan Challenge Cup 2012-niň final tapgyryna gatnaşmaga hukuk gazanan 8 Milli ýygyndyň biri bolupdy. Ýaryşyň final tapgyry 2012-nji ýylyň mart aýynda geçiriler. Ýeňiji bolan ýygyndy bolsa Asian Cup - 2015-ä gatnaşmaga hukuk gazanar.

Iýun aýynda janköýerleri gynandyran habarlaň biri futbol boýunça Olimpiýa ýygyndymyzdan geldi. London - 2012-iň Aziýa saýlama tapgyrynda toparçalara galmak üçin oýnalan soňky oýunda Olimpiýa ýygyndymyz Siriýalylara öz meýdançamyzda 0-4 hasap bilen utulyp, saýlama tapgyryň toparçalaryna galyp bilmändi. Ýogsam birinji oýunda Siriýaň meýdançasynda 2-2 hasap bilen deňme-deň hem oýnapdyk.

Iýul aýynda bolsa, edil Olimpiýa ýygyndymyz ýaly Futbol boýunça Milli ýygyndymyz hem janköýerlerini gynandyrypdy. Şonda Milli ýygyndymyz 2014-nji ýyldaky dünýä çempionatynyň Aziýa saýlama tapgyrynda toparçalara galmak üçin duşuşan soňky garşydaşy Indoneziýalylara 2 oýnuň netijesi boýunça asgyn gelipdi (1-1, 4-3) we Brazil - 2014-e gatnaşmak umydyny üzmeli boldy.

Noýabr aýynda Parižde agyr atletika boýunça dünýä çempionaty geçipdi we şonda iki sany agyr atletikaçymyz üstünliki çykyş edip London-2012-ä ýollanma alan ilkinji türkmenistanly bolupdylar. Soň ýene-de alanlar bar bolmagy mümkin, olardan habarym ýok.

Basketbol, Woleýbol ýygyndylarymyz hem 2011-nji ýylda Aziýa ýaryşlaryna gatnaşdylar öýdýän, bular barada anyk bilýän zadym ýok.

Sportymyzda-ha ýadyma düşýän esasy wakalar şular. 2011-nji ýylda umumy Türkmenistana degişli uzak wagtlap halkyň dilinden düşmedik wakalaryň biri, fewral aýynda TPI-däki talyplaň jenaýatçylykly işi we şondan soňky Türkmenistandaky talyplaryň ýagdaýy. Ýene bir esasy waka şanly Garaşsyzlygymyz ýubileý XX ýyllygy. Hä, ýene bir waka tas ýatdan çykýady. Iýul aýynyň 7-sine Büzmeýindäki bolan partlama belki-de 2011-nji ýylda Türkmenistanadaky wakalaryň iň esasysy bolsa gerek.

Indi gezek Sizde. 2011-nji ýyl Türkmenistan üçin nähili ýyl boldy? Esasy wakalar haýsylar? Eger isleseňiz 2011-nji ýylyň dowamynda öz şahsy durmuşyňyzdaky esasy wakalary hem paýlaşyp bilersiňiz.

Sag boluň. Täze ýylda Siziň ähliňize üstünlik arzuw edýän!