Bodo Şeffer

Öz kesbiniň eýesiBu kişini kimdir biri bi­len tanyşdyran mahalyň oňa işewür diý­seňem, ýazyjy diýseňem, maliýe masla­hatçysy diýseňem gelişmän durmaýar. Çünki kesp-kär ony däl-de, ol eýeleýän kesbini bezeýär. “Maliýe garaşsyzlygyna uzaýan ýol”, “Nädip köp gazanmagy öw­renmeli”, “Ýeňijiniň kanuny”, “Puluň ze­nanlara nepi deger” diýen ýaly ençeme kitaplary okyjylara hödürlän bu adamyň terjimehalyny okanyňda, onuň üstünlige nädip ýetendigine göz ýetirip bolýar. 16 ýaşynda özbaşdak ýaşap başlan, 26 ýaşynda uly berginiň aşagynda ga­lan Bodo Şeffer ruhdan düşmändir. Has anyk aýtsak, onuň ruhdan düş­mezligine ýol bermedik adamlaryň yhlasy hem-de Bodo Şefferiň öz erjel­ligi durmuşda çykalgasyz ýagdaýyň ýokdugyny görkezýär.Bilimli ozar

Öz aýtmagyna görä, Bodo Şeffer 16 ýa­şynda dogduk ýurdundan çykyp, Ameri­kanyň Birleşen Ştatlaryna gidýär. Ol Ka­liforniýada orta mekdebi tamamlapdyr. Soň bolsa San-Fransiskodaky uniwersi­tetde okapdyr. Şol bir wagtda-da Kýoln şäherindäki okuw jaýlarynyň birinde hu­kuk boýunça bilim alan Bodo Şeffer ta­lyplaryň alyş-çalyş maksatnamasynyň çäklerinde Mehikodaky uniwersitetde okuwyny dowam etdirýär. Gwadalahara şäherinde ýer-ýurt tutunyp te­lekeçilik bilen meşgullanyp başlan Bodo Şeffer 26 ýaşynda uly synagla­ryň biri bilen ýüzbe-ýüz bolýar. Meksikadaky firmasynyň batmagy onuň öňünde çözülmesi kyn meseläni keserdip goýýar. Emma erjelligine syny oturan, eli uzadan ýerine ýetýän we diýen sözi gögerýän bir adam oňa hemaýat edýär. Bu barada ol žurnalistleriň birine beren interwýusynda giňişleýin düşündirýär.
Adada bolan waka

Bodo Şeffer “Gulf Stream” telegepleşigine beren interwýusynda bir wa­kany mysal getirýär. Ol edeni ugruna bolman lapykeç hala düşýär. Çün­ki gazanýany harçlaýanyndan köp bolanlygy sebäpli onuň tiz wagtdan gapjygy ýeňleýär. Şondan soň ol bu ýagdaýdan çykalga gözläp başla­ýar. Soňky puluna Bagam adalaryna gelip, kenarda oýa batyp oturan Bodo Şeffer elindäki doňdurmasyny iýip, onuň daşlygyny gyra zyňyp goýberýär. Şobada: “Bu ada meniňki, ony hapalama!” diýen hemleli se­si eşidip, Bodo Şeffer jogaby mähetdel etmeýär.

-Bu ýer seniň adaň däl, adamlaryň hemmesine degişli ortalyk ada.

Ýöne soň görüp otursa, şol ada dogrudanam ýaňky adama degişli eke­ni. Şol waka Bodo Şefferiň durmuşyny doly özgerdýär. Şol adanyň eýe­si 26 ýaşynda “men” diýen mahaly uly aladanyň aşagynda galyp ýören ýigidi şägirt edinýär. Onuň kömegi bilen Bodo Şeffer 6 ýylyň dowamyn­da nädip arzuwyňa ýetmelidigine düşünýär. “Bagtyýarlyk – bu bar zady­ňa kanagat etmekdir” diýýän Bodo Şeffer ýetilen sepgitler bilen kana­gatlanmaýar. Ol arkaýyn ýaşamaga ýeterlik derejede emläge eýelik edensoň, milliarderiň gözlegine çykýar. Şotlandiýada hususy galasy bo­lan asly amerikaly milliarder oňa indiki sepgide ýetmäge kömek edýär.

Tarpdan dörän şereket
Bodo Şeffer 800 dollar puly bilen uly bir şereketi esaslandyryp, özgele­riň serişdesiniň hasabyna uly girdeji alyp boljakdygyny subut edipdir. Munuň şeýledigini Bodo Şefferiň gürrüň edilýän şereketi hasabynda 8 million dollar möçberindäki emlägi bolan kompaniýa öwrendigi hem tas­syklaýandyr. Amerikaly dostunyň kömegi bilen dünýäde mümkin däl za­dyň ýokdugyny subut eden Bodo Şeffer şondan iki ýarym ýyl soň her aýda 100 müň marka gazanyp ugraýar. Biraz soň bolsa ilkinji millionyny bankdaky hasabyna geçirýär. Şonuň üçinem onuň çykyşlaryny dünýä­niň islendik künjünde – Amerikada-da, Aziýada-da, Awstraliýada-da uly höwes bilen diňleýärler.

Maliýe ugrunyň Mosarty
Germaniýalylaryň arasynda “Bodo Şefferiň fenomeni” diýen jümläniň ýör­günlidigini aýtmak gerek. Şeýle-de, olar bu meşhur watandaşlaryny ma­liýe ugrunyň Mosarty hasaplaýarlar. Olar Mosartdan öňem notalaryň bo­landygyny, emma onuň şol notalaryň üsti bilen adamzada müdimilik mi­ras goýup gidendigini aýdýarlar. Bodo Şeffer hem ýüzläp, müňlap ada­myň öňünde çykyş edeninde täze bir açyş edýändigini aýdanok-da, hemmämiziň bilýän zatlarymyza has ünsli çemeleşmegi ündeýär. Özgä­niň hasabyndaky serişdäni hem onuň, hem öz bähbidiňe ulanmak, iki ta­rapyňam utuşa galmagyny gazanmak üçin weli diňe Bodo Şeffer bolmak gerek. Onuň özüni gürletseň şeýle ukyba islendik adam hem eýe bolup bilýär. Muny “Arkalaşan dag aşar’ diýip düşündiresiň gelýär.

Bagta barýan ýollar

Geçen asyryň 90-njy ýyllaryndan özbaşdak işläp başlan Bodo Şeffer üs­tünlige ýetmegiň “syrlaryny” hemmeler bilen paýlaşyp ugraýar. 1989-njy ýyldan 2002-nji ýyla çenli aralykda “Hamburg Mannheimer-Versiche­rung” ätiýaçlyk kärhanasynyň gullukçysy bolup işlän bu kişi soň “Fin.wis.media GmbH” kompaniýasyny esaslandyrýar. Bu kompaniýa “AHEAD Products GmbH” şereketiniň düzümine girensoň Bodo Şeffer baş direktor bolýar. Emma ony wezipe basgançaklary däl-de, gönüden-göni adamlar bilen işleşmek gyzyklandyrýar. Şonuň üçinem ol her bir adamyň öz ykbalyny özgertmäge ukyplydygyny subut edýän teoriýany isleg bildirýänlere düşündirip ugraýar. Onuň kitaplarynyň içindenem şol pikir eriş-argaç bolup geçýär. Ol öz dünýägaraýşyňy üýtgetmegiň hasa­byna uly sepgitlere ýetip bolýandygyny Seneka, Benjamin Franklin, Deýl Karnegi, Entoni Robbins, Robert Kiýosaki, Dipak Çopra ýaly adamla­ryň mysalynda düşündirýär. Bodo Şefferiň sözleriniň näderejede özüne­çekijidigine bolsa onuň millionlarça nusgada dürli dillerde çap edilen ki­taplarynyň we audio kitaplarynyň üsti bilen göz ýetirip bolýar.

biznestm
03.12.2011