Gezekli bentler

Salam mähribanlar. Biz Kozete agza bilen goşgy ýazmagy makul bildik. Şertimiz şeýle, bir tema tapyp, gezekli gezegine dowam etmeli. Aşakdaky goşgy ilkinjimiz. Nesip boldugyndan dowamam bolar. Bu ýere täzeçe bir zat goşjak bolduk. Halarsyňyz diýen umyt bilen başlaýas!Biziň ilkinji temamyz "Güýz bilen hoşlaşyk!"
K.
Ömrümiň bu güýzi hoşlaşýarmysyň,
Galdyryp yzyňdan yatlamalaryň?
Öz ýaryňa tarap howlugýarmysyň,
Unudyp saryja lybaslaň baryn?
D.
Ýeke pasyl ömre sygdyrdyň asyr,
Süýji gussalaňa galdyk ýassanyp.
Tylla deý gymmatly diýsem men, asyl,
Ýaşlygam seň bilen barýar gyssanyp.
K.
Gidersiň sen ýanyňda-da ýapraklar,
Ýeke dälsiň bulutlar hem seň bilen.
Galaryn yzyňda döküp gözýaşlar,
Geçen günlerimiň ahmyry bilen.
D.
Ahmyr penjesinden gutarjak özüm,
Gitseň ýanyň bilen äkit sen ony.
Şatlygam göräýsin, goý, indi gözüm,
Bahar bolup çyksyn bu gyşyň soňy.