Ölçeg (goşgy)

Ölçeg
“Boýuňa deň ölçelewer adamzat”
(Kakam Baba Nejebaly oglunyň öwütlerinden)

Ýaşaýşa inipdir her hil ölçegli,
Durmuş dürli yşnak beren ynsana.
Kim hars urup gömüp barýar geljegin,
Kimler köňlün gerer haýyr-yhsana.

Kä ýerde ýaýaplap, zanny ygrarsyz,
Hanha, dur gabardyp bibaş ýeňsesin.
Agasynyň el serýänden habarsyz,
Dannamaý sowrup ýör haram teňňesin.

Ezýetlerden ýüki ýeten, gamlanan,
Umytdan el üzmän gelýär elewräp.
Sülleren çal murta gara-çawlanan,
Haýbatly zenan garagnyň alawna.

Kimse sahawatly, serde pelsepe,
Bardyr har-harsyny dörjeýän çaýkel.
Kimse ertir ýykyljagyn bilse-de,
Tylla baryn harçlap ýasadýar heýkel.

Köplükde bildirmez gabagatlysyň,
Diýseler-de lapçylaryň käbiri.
Ýalandan ýasalan mahabatlaryň,
Myžžygyn çykarar çynyň labyzy.

Agyr arabany suýrege almaň,
Eşege-de tirkejek bolmaň ony.
Ýersiz ýere öwüp, ýerliksiz gülmäň,
Gelişmeýän bolsa dakmaň merjeni.

Bölek-bölek geler, ýumular gözler,
Goja Şar mizemez, dünýä dowamat.
Häli-häzir ýatda şol takwa sözler:
“Boýuňa deň ölçelewer adamzat.”

Seýidaly Babaýew.