Pany dünýäň ilkinji tagamy

Biziň ýaşaymyz gelýär. Bu dünýä bolsa pany, wagtlaýyn. Pele ýaly futbolçy bolsaňam wagtlaýyn. Rokfeller ýaly baý bolsaňam. Baky durmuşam aňyrda. Şeýle bir aňyrda, hatda görüp gelenem ýok. Muňa akyl ýetireňsoň ýaşamagyň tagamy nämede diýeniňi duýman galýaň. Öz tejribämden aýdaýyn. Ömür beýige galmak ýaly bir zat. Beýige-de basgançak bilen galsaň gowy bolýar ahyryn. Bizem basgançaklara basyp gidip otyrys. Her döwrümiz bir basgançak. Ilkinji basgançak öýlenmekden başlanýar. Oňa çenli enäň gujagynda, ataň gerşinde geçirýäň günlerňi. Öýlenämege çenli ýanýoldaş saýlamak dünýäň ilkinji tagamy bosa gerek. Özüňe laýygyny, göwün söýeniňi gözläp, ähli gyzlary birýandan puçlap, gezip ýörýäň. Hiç biriniň puçlar ýaly däldigine düşünesiň gelenok. Ahyram biri puçlanman maňlaýyňdan çykýar. Söýmegem, söýmezligem hiç zada täsir edenok. Hersi özüçe durmuşa öwrenşip gidýär. Iň esasy zat şol durmuşy nähili gurmagy göz öňünde tutýanlygyňda. Söýüp ýaşamak, emma hiç kimem ýigrenip ýaşaşanok. Her kim perzent, zürýat edinjek. Hiç kimem (käbir binesip bendeler bolaýmasa, olara-da Alla kömek etsin, bu-da bir sabyr synagydyr) çagasyz galanok. Emma, çagalary başyna bela bolýanlar kän. Aýaly bilen oňuşmaýanlaram kän. Olaryň içinde söýüp öýlenenlerem kän. Şonuň üçin geljekki maşgalaly, özbaşdak ýaşaýyşyňy göz öňüne getirmek, ony kesgitlemek, gyzy söýüp ýa çala tanap ölenmekden has wajyp. Söýseňem, çala tanasaňam sen öz isleýşiň ýaly ýaşarsyň. Şol islegiňi kanagatlandyrjak ýa-da kanagatlandyrmajak gyzy bolsa, söýüşmänem tanasa bolýar. Sebäbi biziň hemmämiz adam. Sen nähili ýaşasyň gelýändigini aýtsaň, eneň-ataň şoňa laýyk maşgalany teklip edýär. Birinji basgançakda esasy zat näme? Söýüp öýlenmekmi? Ýa-da indiki basgançaga aýagyňy dogry basmakmy? Onda ýaşaýyşyň ilkinji tagamy diýip ýören söýgümiz gerek dälmi? Men söýgi gerek däl diýmeýärn. Men ony ýönekeý bir tagam, süýjülik hasap edýän. Bal süýji, emma ol palow ýaly bolmaýar. Ýaşlaryň köpüsi meniň bilen ylalaşmak islemez. Ýöne men öz tejribämden aýdýan.