Bu dünýeden gowy dünýe barmyka.

Düýnki geçiren agyr günümden soňra, bu gün ertir bilen Günüň
doguşyny synladym. Bulutlaryň yzyndan bütin dünýäni aýdynlatmak üçin Günüň çyrpynyşyny
synlamak nähili ajaýypdy. Bu Güneş meniň üçin dogýar diýdim, bu bulutlar,
ýagjak ýagyşlar, öwüsýän ýeller, uçjak guşlar hemmesi meniň üçin. Ukuda geçiren
wagty, edilen ýalňyşlyklary, käşgäleri zyňyp taşladym, biziň ýaşaýşymyz üçin
hemme zat şeýle höwes bilen çyrpynýarka, süýji ukuda görülen düşler nädip gözel
bolup bilerdi?.. Ýagyş bilen ýuwlan obam ajaýyp ys bilen kükräp dur. Mellegimizdäki
limon agajy daş töwerege ýaşyl umytlar çyzýar. Kakamyň meniň üçin bogan çemeni
stolumy bezäp dur. Hamala bu bägüller meniň üçin ýaradylan ýalydy. Şadyýan
bolmak üçin neneň köp sebäbimiz bar Allahym. Hamala toprak biz üçin çalyşýar,
howa biz üçin, suw biz üçin. Beýiklerde uçýan guşlar hamala, etmeli kän işiň
bar, ýaşamagyň gerek, dowam etmegiň gerek, durmuşdan ýeňilmezligiň gerek
diýýärdi bu gün. Bu gün üýtgeşik gün, men muny bilýärin.. özüni duýmagymy
isleýän bir gözellik, başyny sypalamagymy garaşýan bir çagajyk, men seniň üçin
diýýän bir güljagaz, jora sesi bar ýakynlarymda ýa – da telefonda bilýärin.
Ýerine ýetirmeli birnäçe gönükmeler, okamaly derslerim, kitaplarym bar. Bu gün
ajaýyp gün..

Her gün Güneş dogýan bolsa üstümize, her gün onlarça adamyň
topraga ýetirýan zeperine hem bakman gül açýan bolsa, baýlyk üçin arzuwlaryndan
hem geçip ýaşap ýören adamlaryň arasynda ynsanperwer kişiler bar bolsa, men
ýaşamaly. Reňk goşmaly durmuşyma. Men hem bar diýmeli. Bu gün täze bir söz
sözlemeli. Ýaşamak neneň oňat, muny bü gün görmegim gerek. Allahym şükürler
bolsun Saňa!!!

Bu dünýeden gowy dünýe barmyka

Söwer ýary söýmek,

Söýdürmek üçin?

Çünki gije ýyldyzlaram,

Gözlerin näz bilen gapyşýar.

Bu dünýeden gowy dünýe barmyka

Dostuňy tanatmak,

Dostuňy tanamak üçin?

Çünki menziller uzak,

Gözýetimde kötel ýollar tapyşýar.

Bu dünýeden gowy dünýe barmyka

Girip – çykyp, ýaşap ýörmegiň üçin?

Çünki hiç kimden minnetsiz,

Wagtly wagtynda Gün dogup ýaşýar.

Bu dünýede şa bol, ýa bol sen geda,

Söýgüliňe gowuş, ýa düş sen jyda,

Ýapyşarsyň her demiňe,

Diýersiň ýyrtyp ýakaň,

Bu dünýeden gowy dünýe barmyka?!

Bir günem hassasyň, ýatansyň,

Tükeniksiz gaýgy – gussa batansyň,

Ýene – de geler şol sowal,

Bu dünýeden gowy dünýe barmyka?

Ine – de alyp gitdiler, başga bir dünýä baka.

Taşladyň ýaryňy, söwer dostuňy,

Şalygy, gedalygy,

Misli barysy hiç eken.

Emma şeýdip gitmek üçin,

Bu dünýeden gowy dünýe barmyka?