BEÝIKLERIŇ DURMUŞYNDAN ...

fakiir· 22 oktýabr 2011 ý. 16:17 · 286 gezek okaldy· halanan: 17ertir.com

Hijri 104-nji ýylda Kufe şäherinde aradan çykan meşhur alym Şaabi Kufe mesjidinde täsirli wagyzlar berýär, wagtal-wagtal-da diňleýjileriň pikirini sorap, jemagat bilen sowal jogap alyşýar eken.
Jemagatyň arasynda bir adam hiç gürlemez, diňe diňlär eken. Şaabi ony hem gürletmek isläp, ondan:
- Sen näme üçin hiç gürläňok? -diýip soraýar. Dymma adamyň jogaby örän manylydy. Ol özüniň dymmagynyň sebäbini şeýle düşündirýär:
- Men bu ýere özüm siziň ylmyňyzdan peýdalanmak üçin gelýärin. Özümden iliň peýdalanmagy üçin däl!.. Şonuň üçin-de diňe gulagymy ulanýan, dilimi däl. Çünki gulagymdan giren meniň peýdalanmagym üçin girýär. Dilimden çykan-da başganyň peýdalanmagy üçin çykýar!
Onuň bu jogabyny eşidip ýylgyran Şaabi:
- Eý dymma adam! Gürlemän-gürlemän bir gürlediň, ýöne gürlän şekilli gürlediň. Bu nähili ajaýyp düşünje? Käşge başgalar hem seniň ýaly gulagynydilinden has artygrak ulansa, öz peýdasy üçin diňlese!.. – diýýär.

Hijri 198-nji ýylda Mekgede dünýäden öten belli mutasawwyf Sufýan bin Uýeýne şeýle diýýär:
“Magşar güni üç topar adamyň bahanasy kabul bolmaz, utanjy-da çuň bolar. Olar şulardyr:
1. Ýagşy amalda we gözel ahlakda hyzmatçylary özünden ozduran baýlar!
2. Yzda galdyran mirasdüşeri sogapda, haýyr-sahawatda özünden ozduran mal eýeleri!
3 .Okadan okuwçysy ylmy bilen amal etmekde özünden ozduran ylym eýeleri!

Hijri 247-nji ýylda Bagdatda dünýä inen Gündogaryň ylym we tasawwuf – sopuçylyk ylmynyň belli wekillerinden ymam Şibliniň töweregine köp adam ýygnanyp ugraýar. Ýöne ol töweregindäkileriň şeýle känligine buýsanmaýar. Ol bularyň hakyky dostduklaryny ýa-da däldiklerini synap görmegi ýüregine düwýär. Ahyr bir gün, sähralykda mejlis gurap otyrkalar, bu pikirini amala aşyrmak üçin amatly ýagdaý ýüze çykýar. Ol birdenkä, ýeldirgän ýaly, daşynda tegelenişip oturan dostlaryna tarap eline ilen daşy, kesegi zyňmaga başlaýar. Muny görüp töweregindäkileriň köpüsi:
- Pirimiz aklyndan azaşypdyr. Gowusy, biz gaýdaly ...”- diýip, ondan daşlaşmaga başlaýarlar. Şibli bolsa, etek alty-ýeň ýedi bolup özünden gaçyp barýan dostlarynyň yzyndan gygyrýar:
- Nirä, meniň ýalan dostlarym, nirä?
- Biz seniň dostuň, ýöne seniň bize daş-kesek zyňmagyň näme?..
- Gitmäň, geliň meniň ýalan dostlarym, geliň. Eger siz hakyky dost bolan bolsaňyz, derrew meni taşlap gitjek bolmazdyňyz, dostdan gelen ýagşylyklaryň ýany bilen rahatsyzlyga-da sabyr etmegi başarardyňyz, bir çäre gözlärdiňiz. Diýmek, siz diňe ýagşy günde dostsuňyz. Heniz dostdan geljek zyýany-da sabyr bilen garşylap biljek kämillige ýetmänsiňiz!..

Arhiwiň ýagdaýy

● Doly tekst

● 11/11 teswir saklanypdyr

Ýazylan saýty: ertir.com · Çeşme: Web Archive nusgasy — ertir.com, 31 iýul 2012 ý. · Asyl sahypany gör ↗

Teswirler 11

Barter 22 oktýabr 2011 ý. 16:33 +7

awtor Allayalkasyn, gowy zatlar yazypsyn

Abat 22 oktýabr 2011 ý. 16:39 +4

Haladym,manyly hem gowy,hasam birinji yazanyn.

Abat 22 oktýabr 2011 ý. 16:39 +5

jelaletdin93 22 oktýabr 2011 ý. 16:51 +5

Ajaýyp👍

Free 22 oktýabr 2011 ý. 16:55 +6

Hakyky yashamaly prinsipler

Mirasymyz 22 oktýabr 2011 ý. 17:05 +6

Sagboluň, manyly wakalar eken.

FerNaNdoJYK 22 oktýabr 2011 ý. 20:40 +1

👍

network 22 oktýabr 2011 ý. 20:42 +2

Beyik bolmaga birneçe adim galdy..

pomidor 23 oktýabr 2011 ý. 07:19 +4

👍 haladym

shirturkmen 23 oktýabr 2011 ý. 07:27 +5

JANYN SAG BOLSUN, HOWRU KOP BOLSUN.

Ata 6 noýabr 2011 ý. 07:47 +2

hemmesi hem terbiyeleyiji gowy wakalar ekeni. Paylashanyna Allah razy bolsun, fakiir!

1-nji waka degishli shu soz yadyma dushdi: Allah bize 1 dil, 2 sany hem gulak beripdir. Kop dinlap, az gurlemelidigimiz ucindir belki. Yalnyshmasam, Nebe ya-da Rahman suresinde hem Allah sheyle diyyar: Men size bir dil, iki dodak bermedimmi?!
Bu yerde hem turkmenin nakyly bolan Dil bela, dish gala diyenine baryar. Dodaklarymyz bn dilimize bowet bolmak.

Hadysda ya hayyr/peydaly geplemegimizi ya-da dymmagymyz maslahat berilyar.

3-nji waka degishli bir shyhyn: mende 1.5 shagirdim bar diyenine barypdyr ekeni.