Tottenham Hotspur - Rubin Kazan

Bu gün gije Euro Leagueniň toparçalarynda nobatdaky 3-nji tapgyryň oýunlary oýnalar. Gijäniň bizi gyzyklandyrjak esasy oýny bolsa Londonyň "White Hart Lane" stadionyndaky oýun bolar. Gurban Berdiýewli, Ýakup Orazsähedowly, Witaliý Kafanowly, Wahid Orazsähedowly Rubin bu gün taryhynda ilkinji gezek bir iňlis kluby bilen duşuşar. Rossiýanyň 2 gezek çempiony adyny göterýän Rubinliler şuwagta çenli ýewropada futbolyň ösen döwletleri hasaplanýan Italiýada, Ispaniýada, Germaniýada we Fransiýada bolup gördüler, emma Angliýada hiç bolup görmändiler.

Bu gün Angliýanyň paýtagty Londonda ýewropanyň abraýly klublarynyň biri bolan Tottenham bilen duşuşjak Rubinda ýaňy ýakynda uly bolmadyk operasiýa geçiren Dýadýun meýdançada bolmaz. "Toparymyzda problemalar bar. Hüjümde kimi oýnatjagym häzirlikçe näbelli. Dýadýun operasiýa geçirdi. Beýleki hüjümçilerimizden hem kiçiräk problemalylar bar. Hüjüm meselämiz entek sorag bolup galýar" diýip, Gurban Berdiýew şu gün Londanda beren interwýusynda belläp geçdi. "Şu günki myhmançylykdaky oýunda maksadymyz öýe oçkoly dolanmak. Oýna tutuş topar bolup ýokary derejede taýýarlandyk. Muny başarjagymyza ynanýarys. Galanynam görübereris" diýip Gurban Berdiýew sözleriniň üstüni ýetirdi.

Londonlylarda bolsa King, Dawson, Ćorluka, Gallas, Lennon hem-de Sandro şikesli. Toparynyň soňky ýagdaýlary barada interwýu beren baş tälimçi Rednapp: "Merkezi gorag - biziň şu günki iň uly problemamyz. Esasy merkezi goragçylarymyz şikesli, şol sebäplem komanda-da üýtgeşmeler etmegimiz mümkin. Eger şu oýunda-da 1-2 sany futbolçymyz şikes alaýsa, onda dynç güni ligada Blackburn bilen oýnajak oýnumyzda nähili düzüm bilen meýdança çykjagymyzy göz öňüme getirip bilemok" diýip belläp geçdi. Mundan başgada Rednapp soňky wagtlar klubdan gitjekligi barada gürrüňler ýaýran Rossiýaly hüjümçisi Powlýuçenkony esasy düzümde başlatmakçy bolýandygyny hem nygtady.

Tottenham mundan öň Ors komandalary bilen diňe bir gezek duşuşdy. Ýagny, Kubok UEFA 2008/2009 sezonynda Moskwaň Spartagy bilen 2-2 oýnapdy. Mundan başga-da Tottenham 2 gezek Kubok UEFA-ny alan klub.

Toparçada häzirlikçe 2 klubyňam 4 oçkosy bar. Bu gün Rubiniň sostawynda nesip bolsa ildeşim Wahid Orazsähedow hem bolar. Belkem esasy düzümde çykar. Özüm-ä oýun 1-1 bolaýarmyka öýdüp duryn. Hany göreris, belki Rubin laýyk 2 ýyl mundan öňki (20.10.2009ý) Nou Campdaky üstünligini bu gün White Hart Lanede hem gaýtalar.

Oýun Aşgabat wagty bilen gije sagat 00:00-da başlamaly. Haýsy kanal görkezýäninä bilemok. Ýöne görüp bilseňiz görüň diýjek men-ä. Göreniňe degýän oýun bolar nesip bolsa.

Suratlarda:
1. Rubin futbol klubynyň tälimçileri. Iki gyrakylar ildeşlerimiz Gurban Berdiýew hem-de Witaliý Kafanow.
2. Gurban Berdiýewiň şu günki žurnalistlar bilen duşuşygy.
3. Rubiniň Londonyň "White Hart Lane" stadionyndaky türgenleşiginden bir pursat. Öňdäki sary butsyly ildeşimiz Wahid Orazsähedow.

Orazsähedowyň sostawa alynmagyna esasy sebäp bolýan zat nämekä?

Sostawa mynasyp futbolçy(23%, 4 adam)

Tanşy güýçli bolany üçin(41%, 7 adam)

Beýleki oýunçylaryň şikeslilikleri sebäpli(29%, 5 adam)

Rubin nire, Wahid nire..(5%, 1 adam)