Witaliý Witalýewiç Kafanow — ussat tälimçi

Gurban Berdiýewi tanaýansyňyz. Onuň türkmendiginem bilýänsiňiz. Emma Gurban Berdiýewiň kömekçileriniň türkmendigini bilýäňizmi?! "Hawwa bilýäsläý" diýýäňizmi? Gaty gowy. Onda şu temany şolaň birine bagyşlaýan. Ýagny, Gurban Berdiýewiň eýýäm 15 ýyla golaý wagt bäri bile işleşýän kömekçi tälimçisi Witaliý Witalýewiç Kafanow barada ondan-mundan tapan maglumatlarymyň ählisini jemläp siz bilen paýlaşmakçy. Maksadym siziň temany okamagyňyzam däl, temany halamagyňyzam däl.. Maksadym: türkmen futboly baradaky türkmençe maglumatlara juda garyp bolan şu internede azda-kände goşant goşmak.



Doly ady: Witaliý Witalýewiç Kafanow.
Doglan ýeri we doglan güni: TSSR, Aşgabat şäheri - 24.05.1960ý.
Boýy: 1m 85 sm.
Milleti: türkmen/gazak/rus.
Maşgalasy: Aýaly we iki gyzy bar.
Wezipesi: Rossiýanyň Kazan şäheriniň ''Rubin'' futbol toparynyň Uly tälimçisi (Baş tälimçiň kömekçisi), Rossiýanyň ikinji Milli ýygyndysynyň derwezebanlarynyň tälimçisi.

Häzirki wagtda ildeşimiz Gurban Berdiýewiň wise prezidentlik edýän Rubin futbol toparynyň baş tälimçisiniň kömekçisi bolup işleýän Witaliý Witalýewiç Kafanow 1960-njy ýylyň 24-nji maýynda Aşgabat şäherinde (TSSR) dogulýar.

Kafanow futbolçylyk karýerasyna 11 ýaşynda Aşgabadyň ''Kalhozçy'' futbol klubynyň ýetginjekler komandasynda derwezeban bolup başlaýar. 22 ýaşynda (1982ý) bolsa şol klubyň esasy düzüminde çykyş edip başlaýar. 1986-njy ýyla çenli ''Kalhozçide'' futbol oýnan Witaliý, 1987-1988-nji ýyllarda Rossiýanyň Saratow şäheriniň ''Sokol'' futbol klubynda çykyş edýär. 1989-njy ýylda ýene-de Aşgabada dolanýar we 2 ýyllap ''Köpetdag'' futbol toparynda çykyş edýär. 1991-nji ýylda Rossiýanyň Swerdlowsk şäheriniň ''Uralmaş'' futbol klubyna gidýär we 1 sezon şol ýerde oýnaýar. Soňra karýerasynyň 4 ýylyny Gazagystanda geçirýär, ýagny, 1992-1993-nji ýyllarda Alma-Atanyň ''Kaýrat'' futbol toparynda, 1994-1995-nji ýyllarda bolsa Semipalatinskiň ''Ýelimaý'' futbol toparynda çykyş edýär. 1996-njy ýylda Aşgabadyň ''Nisa'' futbol toparyna dolanýar we şol ýyl futbolçylyk karýerasyny tamamlaýar. Milli ýygyndy karýerasynda degişlilikde 2 döwletiň Milli futbol ýygyndysynda (Gazagystan, Türkmenistan) çykyş edýär. Witaliý Kafanow 1992-nji ýylda Gazagystanyň Milli ýygyndysynyň 6 oýnunda, 1996-njy ýylda bolsa, Türkmenistanyň Milli ýygyndysynyň 2 oýnunda komandalarynyň derwezelerini goraýar.

Futbolçylyk karýerasy:
1982-1986ý - ''Kalhozçy'' (138 oýun - ? gol saldyrdy, 5 gol saldy)
1987-1988ý - ''Sokol'' (21 oýun - ? gol saldyrdy)
1989-1990ý - ''Köpetdag'' (77 oýun - ? gol saldyrdy)
1991ý - ''Uralmaş'' (15 oýun - 20 gol saldyrdy)
1992-1993ý - ''Kaýrat'' (74 oýun - 75 gol saldyrdy)
1994-1995ý - ''Ýelimaý'' (49 oýun - 38 gol saldyrdy)
1996ý - ''Nisa'' (? oýun - ? gol saldyrdy)

Witaliý Witalýewiç tälimçilik karýerasyna ''Köpetdag'' hem-de ''Nisa'' futbol klublarynyň çagalar komandalaryny türgenleşdirmek bilen başlaýar. Professional tälimçilik karýerasyna bolsa, Rossiýanyň Smolensk şäheriniň ''Kristall'' futbol klubynda baş tälimçiň kömekçisi bolup, 2001-nji ýylda başlaýar. Soňra şol ýylyň tomusynda klubyň Baş tälimçisi wezipesine bellenilýär. 2002-nji ýyldan bäri bolsa Rossiýanyň Kazan şäheriniň ''Rubin'' futbol klubynyň Uly/Cтарший tälimçisi (Baş tälimçiň kömekçisi) bolup işläp gelýär. Şeýle-de ol Rossiýanyň ikinji Milli ýygyndysynyň derwezebanlarynyň hem tälimçisidir.

Tälimçilik karýerasy:
2001ý - ''Kristall''
2002-nji ýyldan bäri - ''Rubin''

Witaliý Kafanow futbolçylyk karýerasynda 3 gezek (1992ý, 1994ý, 1995ý) Gazagystanyň çempiony bolmagy başarýar we Gazagystanyň çempionatynda 3 gezek çempion bolmagy başaran ilkinji futbolçy hökmünde taryha girýär. Mundan başga-da 2 gezek (1992ý, 1995ý) Gazagystanyň kubogyny hem eýelemegi başarýar.

Gazanan üstünlikleri:
1992ý, 1994ý, 1995ý - Gazagystanyň çempiony.
1992ý, 1995ý - Gazagystanyň kubogynyň ýeňijisi.



Witaliý Witalýewiç Kafanowyň futbolçylyk karýerasy o diýen şowly bolmasa-da, tälimçilik karýerasy erbet däl. Ildeşimiz Gurban Berdiýewiň ''Rubin'' futbol toparynyň gazanýan üstünliklerinde belli bir derejede Kafanowyň hem paýy bar. Sebäbi soňky 9 ýyldaky Rubinli derwezebanlaryň hemmesi hem Witaliý agaň elinden geçen derwezebanlardyr.
Şu temamyň soňunda Witaliý aga üstünlik arzuw edýän!

Gyzyklanyp okaryn diýseňiz aşakdaky linkde Kafanow bilen geçirilen gyzyklyja söhbetdeşlik bar:
http://smfootball.by.ru/imena/kafanov2.shtml

Bu linkem zyýan etmez:
Gurban Bekiýewiç Berdiýew — ussat tälimçi